- 2018-07-14 06:45:00
- បាល់ទាត់
កំពង់ត្រឡាច សង្ឃឹមលើកពាន Acleda cup ឆ្នាំនេះក្រោយលត់ ព្រែកព្នៅ ៩-០
- 2018-07-14 06:45:00
- ចំនួនមតិ 0 | ចំនួនចែករំលែក 0
កំពង់ត្រឡាច សង្ឃឹមលើកពាន Acleda cup ឆ្នាំនេះក្រោយលត់ ព្រែកព្នៅ ៩-០
ចន្លោះមិនឃើញ
លោក សៅ វង្សប្រាសាទ អ្នកចាត់ការក្រុមសាខាកំពង់ត្រឡាច មានក្ដីរំពឹងយ៉ាងខ្លាំងក្នុងការគ្រងជើងឯកពាន Acleda Cup 2018 ក្រោយក្រុមរបស់ខ្លួនយកឈ្នះ សាខាព្រែកព្នៅ ៩-០ មុននេះនៅទីលានវេស្ទើនក្នុងការប្រកួតសប្ដាហ៍ទី៣វគ្គសន្សំពិន្ទុពូល C។
អ្នកចាត់ការរូបនេះបានឲ្យដឹងថា ក្រុមរបស់លោកឆ្នាំនេះមានកម្រិតនៃការលេងខ្លាំងជាងឆ្នាំមុនៗ ដោយសារកីឡាករទាំងអស់បានប្រមូលផ្ដុំហ្វឹកហាត់រៀងរាល់ល្ងាច។ ក្នុងព្រឹត្តិការណ៍នេះមានតែការិយាល័យកណ្ដាល D ប៉ុណ្ណោះ ដែលស្ថិតក្នុងក្រសែភ្នែកជាក្រុមខ្លាំង ដែលជាដៃគូត្រូវប្រកួតប្រជែង។
លោកបញ្ជាក់ថា ទោះជាយ៉ាងណាក៏ក្រុមរបស់លោកមិនខ្លាចក្រុមណាៗដែរ ពីព្រោះឆ្នាំនេះកំពង់ត្រឡាចប្ដេជ្ញាលើកពាននេះឲ្យបាន។ ពីរឆ្នាំមកហើយ ដែលក្រុមនេះបានត្រឹមខកចិត្តនៅវគ្គផ្ដាច់ព្រ័ត្រ ពោលគឺជើងឯករងពីរឆ្នាំជាប់ៗគ្នា។
៩គ្រាប់របស់ក្រុម កំពង់ត្រឡាចមាន សូយ ដារិទ្ធ ១ គ្រាប់ ជូន សុមាន ២ គ្រាប់ សេង ប៊ុនណា ១ គ្រាប់ និង ស៊ុន ចាន់វិបុល ៥ គ្រាប់។ ក្រុមនេះឈ្នះ ៣ បីលើកក្នុងការប្រកួតសន្សំពិន្ទុបីលើកកន្លងមក។ ចំណែកគូលេងនៅទីលាននេះដែរ ដែលមកពីពូល D គឺ សាខាចោមចៅ ស្មើក្រុម សាខាវិមានចតុមុខ ១-១ ដែលមួយគ្រាប់របស់ចោមចៅរកបានដោយ ផាន់ គីណា សាខានេះឈ្នះ ១ ស្មើ ១ និងចាញ់ ១ ក្នុងការប្រកួតបីលើកកន្លងមក ។ ស្របពេលមួយគ្រាប់របស់សាខាវិមានចតុមុខ រកបានដោយកីឡាករ ថាវី សំណាង ហើយ ៣ ប្រកួតរបស់ក្រុមនេះឈ្នះ ២ ស្មើ១។
ទន្ទឹមគ្នានោះនៅទីលាន ស្កាយសមុទ្រឯនោះវិញ ក៏មានការប្រកួតចំនួន ២ គូផងដែរ ដោយគូទី១គឺ ក្រុមសាខាស្ទឹងមានជ័យលត់ក្រុម ស្រុកឧត្ដុង្គ ១០ ទល់ ៣ ដែល ១០ គ្រាប់របស់ស្ទឹងមានជ័យរកបានដោយកីឡាករ ភឿក សំបូរ ៧ គ្រាប់ ញឹម សុនី ១ គ្រាប់ និង ម៉ុក ណាទ្រី ២ គ្រាប់ ក្រុមនេះ ៣ ប្រកួតឈ្នះទាំង ៣ ។ ស្របពេល ៣ គ្រាប់របស់ ស្រុកឧត្ដុង្គ រកបានដោយ ឌុល ពន្លឺ ២ គ្រាប់ និង ធឿន វីរៈ ១ គ្រាប់ ក្រុមនេះ ៣ ប្រកួតចាញ់ទាំង ៣។
គូទី២នៅទីលានស្កាយសមុទ្រគឺក្រុម ពាមរក៏ ចាញ់ស្រុកបាទី ៣-១ ដោយ ១ គ្រាប់របស់ ពាមរក៏ រកបានដោយកីឡាករ ផៃ សុភាព បីប្រកួតរបស់ ពាមរក៏ ចាញ់ទាំង ៣ ខណៈ ៣ គ្រាប់របស់ក្រុមស្រុកបាទីរកបានដោយកីឡាករ ណៃ សំណាង ១ គ្រាប់ ណុន សុទ្រី ១ គ្រាប់ និង ប៉ែន លីកា ១គ្រាប់ ៣ ប្រកួតរបស់បាទីឈ្នះ ២ ចាញ់១៕
