- 2014-10-24 17:40:29
- ប្រដាល់
រសៀលនេះ បឹងកេត ជួប ការពារជាតិ ស្អែកភ្នំពេញក្រោន ប៉ះ ត្រាយអាស៊ី
- 2014-10-24 17:40:29
- ចំនួនមតិ 0 | ចំនួនចែករំលែក 0
រសៀលនេះ បឹងកេត ជួប ការពារជាតិ ស្អែកភ្នំពេញក្រោន ប៉ះ ត្រាយអាស៊ី
ចន្លោះមិនឃើញ
ក្រុមបាល់ទាត់ចម្ការកៅស៊ូបឹងកេត នឹងត្រូវសាកជើងជាមួយម្ចាស់ផ្ទះក្រសួងការពារជាតិនៅរសៀលម៉ោង២ថ្ងៃនេះ នៅកីឡដ្ឋានកងយោធពលខេមរភូមិន្ទ (ស្តាតចាស់) ដែលនេះជាការប្រកួតមិត្តភាពកម្ដៅសាច់ដុំ និងស្វែងរកចំណុចខ្វះខាតរបស់ក្រុមមុនពេលដែលពានរង្វាន់សម្ដេច ហ៊ុន សែន និងលីក MCL 2015 ចូលមកដល់។
ប្រកួតមិត្តភាពពីរប្រកួតកន្លងមក បឹងកេត ធ្វើមិនបានល្អនោះទេ ស្មើ១ និងចាញ់១ បន្ទាប់ពីស្ថិតក្រោមការដឹកនាំរបស់គ្រូបង្វឹកថ្មី ពីព្រោះតែអវត្តមានកីឡាករសំខាន់ៗមួយចំនួនដែលជាប់កាតព្វកិច្ចជួយជម្រើសជាតិក្នុងវគ្គជម្រុះ AFF Suzuki Cup ប៉ុន្តែនៅសប្ដាហ៍នេះ បឹងកេត ជុំជើងគ្នាវិញអស់ហើយ ដូច្នេះអ្វីៗអាចនឹងប្រែប្រួល។
ក្រុមក្រសួងការពារជាតិ វិញក៏កំពុងញាប់ដៃញាប់ជើងដែរ សម្រាប់រដូវកាលខាងមុខនេះ ដោយបច្ចុប្បន្នក្លិបដែលធ្លាប់តែប្រើកីឡាករក្នុងស្រុកមួយនេះ កំពុងធ្វើតេស្តសមត្ថភាពកីឡាករបរទេសមួយចំនួនដើម្បីជួយក្រុមនាពេលខាងមុខ។
សម្រាប់ថ្ងៃសៅរ៍ ទី២៥ ខែតុលា ស្អែកនេះវិញ ភ្នំពេញក្រោន នឹងបើកកីឡដ្ឋានរបស់ខ្លួន ស្វាគមន៍ក្រុម ដែលដឹកនាំដោយជនជាតិជប៉ុន ត្រាយអាស៊ី។ ភ្នំពេញក្រោន ក៏ធ្វើមិនបានល្អប៉ុន្មានដែរនៅក្នុងការប្រកួតមិត្តភាពកន្លងមក ដោយសារតែអវត្តមានកីឡាករនាំលេងរបស់ខ្លួនដូច បឹងកេត ដែរ។ កីឡាករសំខាន់ៗរបស់ខ្លួននឹងចូលរួមក្នុងការប្រកួតនេះ ដើម្បីសមជើងជុំគ្នាត្រៀមខ្លួនចូលរួមយុទ្ធនាការ Toyota Mekong Club Championship នៅប្រទេសវៀតណាមនៅសប្ដាហ៍ក្រោយ។
ងាកទៅមើល ត្រាយអាស៊ី វិញ ហាក់មានសភាពស្ងប់ស្ងាត់បន្តិច ប៉ុន្តែក្រុមមួយនេះបានធ្វើការប្រមូលផ្ដុំហ្វឹកហាត់ជាប្រចាំ ហើយខ្សែប្រយុទ្ធដែលស៊ុតបញ្ចូលទីបាន៤គ្រាប់ឲ្យក្រុមជម្រើសជាតិកម្ពុជានៅវគ្គជម្រុះ AFF Suzuki Cup សុខ ចាន់រស្មី ទំនងអាចនឹងបង្ហាញវត្តមាននៅក្នុងការប្រកួតស្អែកនេះ។
ចុងសប្ដាហ៍នេះក្រុមនីមួយៗសុទ្ធតែមានកីឡាករគ្រប់ជើងទាំងអស់ ដូច្នេះចាំមើលថាតើលទ្ធផលចាញ់‑ឈ្នះអាចបណ្ដាលមកពីមូលហេតុអ្វីទៀត?
អត្ថបទ៖ អៀង សូទ្រី
