លីគ Futsal ធំ ប្រាក់រង្វាន់ ១៥ ០០០ដុល្លារនឹងចាប់ផ្ដើមរដូវកាលថ្មីឆាប់ៗនេះ

2022-12-26 06:13:49
បាល់ទាត់

2022-12-26 06:13:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតលីគ Futsal ធំនៅកម្ពុជា Ganzberg Cup រដូវកាលទី៦ដែលមានក្រុមចូលរួមសរុប៣២ក្រុមនឹងចាប់ផ្ដើមដំណើរការប្រកួតនៅថ្ងៃទី៨ខែមករាឆ្នាំ២០២៣ខាងមុខនេះហើយ។

ក្រោយពីជោគជ័យ៥សម័យកាលកន្លងមក Ganzberg Cup រដូវកាលទី៦ក៏បានលេចចេញរូបរាងមកហើយដែរ។ ក្នុងរដូវកាលនេះ នឹងមានក្រុមចូលរួមសរុប៣២ក្រុមមកពីបណ្ដាខេត្តក្រុងនានានៅព្រះរាជាណាចក្រកម្ពុជា។ ការប្រកួតដែលអ្នកនិយមលេង Futsal ទាំងអស់ទន្ទឹងរង់ចាំនេះ នឹងចាប់ផ្ដើមប្រកួតនៅថ្ងៃទី៨ខែមករាឆ្នាំ២០២៣តទៅ ក្រោយពីធ្វើការចាប់គូប្រកួតរួចរាល់ ដោយប្រើរូបមន្ដចាញ់ធ្លាក់តែម្ដង មិនមានការជម្រុះតាមពូលទៀតនោះទេ។

ពានដែលមានប្រាក់រង្វាន់រហូតដល់ ១៥ ០០០ដុល្លារនេះ នឹងប្រើប្រាស់រយៈពេលប្រកួតដល់ទៅ៤ខែចាប់ពីខែមករាឆ្នាំ២០២៣ទៅ។ វានឹងបញ្ចប់មុនល្មមសម្រាប់ការប្រកួតស៊ីហ្គេមដែលកម្ពុជាធ្វើជាម្ចាស់ផ្ទះ។ ច្បាប់នៃការប្រកួតគឺដូចទៅនឹងការប្រកួតកន្លងទៅដែរ ដោយក្រុមមួយអាចមានកីឡាករបរទេសប៉ុន្មាននាក់ក៏បាន ប៉ុន្តែពេលប្រកួតមិនអាចដាក់ទាំងអស់នោះទេ។ កីឡាករអាជីពក៏អាចចូលលេងបានដូចគ្នា តែត្រូវកំណត់ត្រឹម២នាក់នៅលើទីលានប៉ុណ្ណោះ។

ពានរង្វាន់ខាងលើនេះនឹងមានផ្សាយផ្ទាល់នៅលើទូរទស្សន៍ PNN ផងដែរ រៀងរាល់ថ្ងៃអាទិត្យ ហើយទីលាននៃការប្រកួតធ្វើឡើងនៅទីលាន T-Soccer ក្បែរអង់តែនទួលគោក រាជធានីភ្នំពេញ៕

អត្ថបទ៖ ប្រុស យុទ្ធ