PSG សុខចិត្តខាត១២២លានផោនត្រៀមលក់ Neymar ចេញក្នុងរដូវក្ដៅនេះ

2022-04-28 03:05:50
បាល់ទាត់

2022-04-28 03:05:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Paris Saint-Germain ត្រូវបានរាយការណ៍ថាមានគម្រោងចង់លក់ Neymar ចេញក្នុងរដូវក្ដៅនេះ ក្រោយកីឡាករសញ្ជាតិប្រេស៊ីលមិនបានជួយក្រុមឈ្នះពានធំៗណាមួយ។

Neymar បានចូលរួមជាមួយ PSG ក្នុងតម្លៃកំណត់ត្រាពិភពលោក១៩៨លានផោនកាលពីឆ្នាំ២០១៧ ផ្ទេរពីក្លឹប Barcelona។ ប៉ុន្តែ៥ឆ្នាំជាមួយក្លឹបយក្សរបស់បារាំង កីឡាករវ័យ៣០ឆ្នាំមិនទាន់បានជួយក្រុមសម្រេចគោលដៅឈ្នះពានធំណាមួយនៅឡើយ ជាពិសេស Champions League។

យោងតាមកាសែតអេស្ប៉ាញ AS ចុះផ្សាយថា PSG គ្រោងនឹងលក់ Neymar ចេញត្រឹមតម្លៃ៧៦លានផោនប៉ុណ្ណោះ។ ចំនួននេះធ្វើឲ្យក្លឹបខាតដល់ទៅ១២២លានផោន បើប្រៀបនឹងតម្លៃដែលបានទិញ Neymar ចូល។ យ៉ាងណាមិញ ៧៦លានផោនគឺជាតម្លៃទាបបំផុតដែល PSG ព្រមលក់ ប៉ុន្តែតម្លៃក៏អាចកើនឡើងជាងនេះដែរ ប្រសិនបើក្លឹបធំៗប្រជែងដេញថ្លៃយក Neymar។

រដូវក្ដៅខាងមុខ PSG ក៏មានគម្រោងចង់ដោះដូរច្រើនទាំងកីឡាករនិងអ្នកចាត់ការ។ លោក Mauricio Pochettino ត្រូវបាន PSG ត្រៀមបណ្ដេញចេញពីតំណែង និងចង់តែងតាំងលោក Conte ជំនួសវិញ។ កីឡាករ Paul Pogba និង Romelu Lukaku ជាមុខសញ្ញា PSG ទាក់ទងយកមកលេងនៅទីក្រុងប៉ារីស៕

ប្រភព៖ The Sun ប្រែសម្រួល៖ ហេង សុធារិទ្ធិ