- 2021-12-08 07:44:17
- កីឡាផ្សេងៗ
អត្ថន័យនៃសហប្រធានក្រុមប្រឹក្សាកីឡាអាស៊ីអាគ្នេយ៍ របស់ឯកឧត្ដម ថោង ខុន
- 2021-12-08 07:44:17
- ចំនួនមតិ 0 | ចំនួនចែករំលែក 0
អត្ថន័យនៃសហប្រធានក្រុមប្រឹក្សាកីឡាអាស៊ីអាគ្នេយ៍ របស់ឯកឧត្ដម ថោង ខុន
ចន្លោះមិនឃើញ
កិច្ចប្រជុំពិសេសរបស់ក្រុមប្រឹក្សាកីឡាអាស៊ីអាគ្នេយ៍ម្សិលមិញនេះគឺបានតែងតាំងឯកឧត្ដម ថោង ខុន ជាសហប្រធានក្រុមប្រឹក្សាកីឡាអាស៊ីអាគ្នេយ៍ (ស៊ីហ្គេម) ជាមួយភាគីខាងវៀតណាម ជាផ្លូវការហើយ។
ឯកឧត្ដម វ៉ាត់ ចំរើន អគ្គលេខាធិការ NOCC បានឲ្យដឹងថា ការតែងតាំងឯកឧត្ដម ថោង ខុន ជាសហប្រធាននេះគឺមានន័យថា រាល់កិច្ចការដែលទាក់ទងនិងស៊ីហ្គេមនៅកម្ពុជា (២០២៣) ដូចជាការប្រជុំនានា ការចាត់ចែង ឬការសម្រេចផ្សេងៗនោះឯកឧត្ដមមានសិទ្ធពេញលេញចាប់ពីពេលនេះតទៅ។ ចំពោះភាគីខាងវៀតណាមជាប្រធាននោះគឺធ្វើកិច្ចការ ឬការសម្រេចសម្រាប់តែលើស៊ីហ្គេម ឆ្នាំ២០២២ ដែលខ្លួនទទួលជាម្ចាស់ផ្ទះនោះទេ។
ការធ្វើជាសហប្រធាននេះដែរគឺដោយសារតែការលើកពេលរបស់វៀតណាម ចំពោះព្រឹត្តិការណ៍ស៊ីហ្គេម លើកទី៣១ ឆ្នាំ២០២១ ទៅ ២០២២។ ដូច្នេះការលើកពេលនេះធ្វើឲ្យប៉ះពាល់ដល់ការកំណត់នៃការប្រគល់សិទ្ធជាប្រធានដើម្បីបន្តដឹកនាំភារកិច្ចជាម្ចាស់ផ្ទះបន្ទាប់។ យ៉ាងណានៅពេលនេះកម្ពុជាក៏បានក្លាយជាសហប្រធានផងដែរដើម្បីបន្តធ្វើកិច្ចការតាមផែនការឆ្ពោះទៅស៊ីហ្គេម ២០២៣។
រំលឹកដែរថា ការតែងតាំងឯកឧត្ដម ថោង ខុន ជាសហប្រធានក្រុមប្រឹក្សាកីឡាអាស៊ីអាគ្នេយ៍(ស៊ីហ្គេម) តាមរយៈកិច្ចប្រជុំពិសេសតាមរយៈ ZOOM ម្សិលមិញនៅ NOCC។ នៅឆ្នាំ២០២៣ កម្ពុជានឹងធ្វើជាម្ចាស់ផ្ទះកីឡាស៊ីហ្គេម លើកទី៣២ បន្ទាប់ពីប្រទេសវៀតណាម៕