- 2021-04-29 07:25:10
- បាល់ទះ
ក្មេងៗឥឡូវបែបមិនស្គាល់ទេ នេះហើយឆ្វេងហ្ស៊ីន Super Star អង្គរក្សជំនាន់មុន គប់សេវារកតែទ្រូង!
- 2021-04-29 07:25:10
- ចំនួនមតិ 0 | ចំនួនចែករំលែក 0
ក្មេងៗឥឡូវបែបមិនស្គាល់ទេ នេះហើយឆ្វេងហ្ស៊ីន Super Star អង្គរក្សជំនាន់មុន គប់សេវារកតែទ្រូង!
ចន្លោះមិនឃើញ
ក្នុងជំនាន់លោកគ្រូ សោម ណារិទ្ធ បងប្រុសបង្កើតលោកគ្រូ សោម ចំណាប់ លោក ស៊ីន ចន្ថា ជាស្មាត់ឆ្វេងហ្ស៊ីនល្បីល្បាញលំដាប់ស្រុកខ្មែរ និងជា Super Star ប្រចាំក្លឹបបញ្ជាការដ្ឋានអង្គរក្ស ដែលឡើងខ្លាំងបំផុតអំឡុងឆ្នាំ ២០០៧ ដល់ឆ្នាំ ២០១៣ មានជំនាញគប់សេវានិងការម៉ាត់ផ្ដាច់។ ហើយខាងក្រោមនេះ ជាប្រវត្តិត្រួសៗពីលោកចន្ថាក្នុងអាជីពបាល់ទះ។
ប្រវត្តិបាល់ទះអាជីព
អតីតកីឡាករបាល់ទះនៃវិទ្យាល័យស្អាង ខេត្តកណ្ដាល បានចូលលេងឱ្យក្រុមភូមិភាគពិសេសក្នុងឆ្នាំ១៩៩៨-១៩៩៩ និងលើកពានជាក្រុមបានពីរដងគឺ ពានរង្វាន់ទូទាំងប្រទេស និងពានកងទ័ព។
ចូលដល់ឆ្នាំ២០០០ កីឡាករកម្ពស់១,៨២ម៉ែត្រ បានចេញពីភូមិភាគពិសេសទៅកាន់បញ្ជារដ្ឋានអង្គរក្ស និងជួយក្លឹបខ្លាំងមួយនេះ លើកពានច្រើនគួរសមដែររួមទាំងពានរង្វាន់ស្រាបៀរលីអូ។ បើតាមការឱ្យដឹងពីលោក ស៊ីន ចន្ថា អំឡុងពេលនោះមានតែក្លឹបអង្គរក្ស និងក្រសួងមហាផ្ទៃប៉ុណ្ណោះ ដែលប្រជែងដណ្ដើមពានគ្នា។
ដោយសារឈឺជង្គង់ លោកក៏បានសុំឈប់លេងបាល់នៅក្លឹបអង្គរក្សក្នុងឆ្នាំ ២០១៣ (បច្ចុប្បន្នបម្រើការនៅអង្គភាពមួយនេះ) និងឈប់លេងជាមួយគីឡូធំរហូតដល់បច្ចុប្បន្ន។ បើលេងក្រៅផ្លូវការលោកទើបតែចាប់ផ្ដើមប្រឡូកវិញនៅឆ្នាំ ២០២០ ប៉ុណ្ណោះ។
មានសមត្ថភាពល្អស្មាត់ឆ្វេងលំដាប់ជួរមុខរូបនេះ បានជាប់ជម្រើសជាតិបាល់ទះលើក្ដារក្នុងឆ្នាំ ២០១០ និងហាត់ត្រៀមលេងស៊ីហ្គេមឆ្នាំ ២០១១ នៅប្រទេសឥណ្ឌូនេស៊ី ប៉ុន្តែមិនទទួលបានផ្លែផ្កាអ្វីនោះទេ ព្រោះសមត្ថភាពមិនដល់គេ។ ឆ្នាំ២០១២ លោកមិនបានជាប់ទៀតឡើយ ព្រោះសហព័ន្ធបាល់ទះកម្ពុជា បានធ្វើការជម្រុះរកកីឡាករក្មេងៗមកជំនួស។
ជំនាញពិសេស!
១- គប់សេវា៖ ស្មាត់ឆ្វេងអង្គរក្សដដែល ចាប់ផ្ដើមចេះគប់សេវាឆ្នាំ ២០០៨ ហើយជំនាន់នោះមានអ្នកចេះលោតគប់ប៉ុន្មាននាក់ប៉ុណ្ណោះ ដូចជាស្មាត់បឿន និងស្មាត់ឡាន់ជាដើម។ លោកលោតគប់សេវាល្អ លឿនហើយហើរ ពិបាកក្នុងការចាប់ ធ្វើឱ្យអ្នកលេងតាមបណ្ដាខេត្តខ្លាចរអាសឹងគ្រប់គ្នា។
ចំពោះបាល់ប្រកួតក្រៅផ្លូវការ ចាប់សេវាពីរឬបីនាក់ គឺមិនងាយចាប់សេវាលោតគប់របស់ស្មាត់ឆ្វេងនេះឡើយ ពោលទាល់តែចាប់បួននាក់ ទើបទៅរួច។ ហើយបើដើរលេងតាមខេត្ត លោកមានអេគីបផ្ទាល់ខ្លួនមួយ ដោយមានលោកគ្រូ សាន សុក្រិត បច្ចុប្បន្នជាគ្រូបង្វឹកនៅក្លឹបបាល់ទះវិសាខា ជាអ្នកប៉ះសេ និងធ្វើរនាំង និងស្មាត់ឆ្វេងគាអង្គរក្ស។ ភាគច្រើនលោកចន្ថា និយមតឱ្យគូភាគីពីរបី-ពីរបួន-ឬបីទល់នឹងប្រាំនាក់ជាដើម។ ជំនាន់នោះក្រៅពីលោកគ្រូ សោម ចំណាប់ គ្មានអ្នកណាហ៊ានលេងជាមួយស្មាត់ធំរូបនេះទេ។
បើរំលឹកការប្រកួតក្រៅផ្លូវការនៅឯក្រៅប្រទេស ដូចជាវៀតណាម ម៉ាឡេស៊ី និងឥណ្ឌូណេស៊ីជាដើមនោះ ក្រុមលោកមិនងាយចាញ់ឡើយ។ មិនតែប៉ុណ្ណោះក្រុមរបស់លោក ធ្លាប់តឱ្យជម្រើសជាតិម៉ាឡេស៊ី និងឥណ្ឌូណេស៊ីបួននាក់ទល់ប្រាំនាក់ទៀតផង។ កាលនោះក្រុមលោកមានលោកគ្រូ សោម ចំណាប់ ភាកងពល ចក់លីប័ររ៉ូមហាផ្ទៃ ផលពិសីមហាផ្ទៃ ខននិងបឿនជាដើម។
២- ការម៉ាត់៖ លោកគ្រូក្នុងក្លឹបអង្គរក្សរូបនេះ លេងឡើងខ្លាំងបំផុតនៅឆ្នាំ ២០០៧ ដល់ឆ្នាំ ២០១៣ ហើយគ្មានអ្នកណាលើរូបលោកដែរនៅក្នុងស្រុកខ្មែរ។ លោកម៉ាត់ច្បាស់ធ្ងន់ដាច់ល្អ បាំងធំចូលចិត្តវ៉ៃជះយកដៃ មិនសូវចូលចិត្តវ៉ៃពន្លិច ចូលចិត្តត្រាវែខ្លី បើបាំងមួយវ៉ៃលិច១ម៉ែត្រៗ ទាំងការប្រកួតអាជីព និងក្រៅផ្លូវការ។ បាំងមួយបាំងពីរ គ្មានក្នុងកែវភ្នែករបស់លោកទេ។
ហេតុស្រលាញ់វិស័យបាល់មួយនេះ បើទោះសព្វថ្ងៃមានវ័យ៤២ឆ្នាំទៅហើយក្ដី លោកក៏នៅតែប្រឡូកឡើងវិញ និងបានជួយបណ្ដុះបណ្ដាលក្មេងៗជំនាន់ក្រោយមួយចំនួនដែររស់នៅក្នុងភូមិទួលក្ដី ឃុំត្រើយស្លា ស្រុកស្អាង ខេត្តកណ្ដាលរបស់លោកទៀតផង។
ជាចុងក្រោយក្នុងនាមជាអតីតកីឡាករអាជីព និងស្មាត់ឆ្វេងល្អលំដាប់ស្រុកខ្មែរមួយរូប លោក ស៊ីន ចន្ថា សូមសំណូមពរដល់ក្មេងៗជំនាន់ក្រោយ កុំឱ្យលេងបាល់ទះជាប់ដៃ ព្រោះវាបង្ហាញពីភាពមិនរីកចម្រើននៃបាល់ទះខ្មែរ ស្របពេលវិស័យមួយនេះកំពុងទទួលបានការគាំទ្រយ៉ាងខ្លាំងក្លាពីមហាជន៕