- 2020-11-16 03:59:34
- បាល់ទះ
ស្រលាញ់បាល់ទះពេក លុច គឹមសៀន លាក់បាំងឪពុកម្ដាយជិត១ឆ្នាំ
- 2020-11-16 03:59:34
- ចំនួនមតិ 0 | ចំនួនចែករំលែក 0
ស្រលាញ់បាល់ទះពេក លុច គឹមសៀន លាក់បាំងឪពុកម្ដាយជិត១ឆ្នាំ
ចន្លោះមិនឃើញ
ចប់បាក់ឌុកឆ្នាំ២០១៣ លុច គឹមសៀន ឬតាក់មហាផ្ទៃ បានប្រាប់ឪពុកម្ដាយ មកធ្វើការយកប្រាក់រៀនមហាវិទ្យាល័យ ប៉ុន្តែធាតុពិតគេមិនបានធ្វើការដូចលោកទាំងពីរគិតឡើយ គឺគេមកសម្ងំហាត់បាល់ទះនៅក្លឹបក្រសួងមហាផ្ទៃ។ រយៈពេលជិត១ឆ្នាំ ទើបយុវជនបង្ហើបឱ្យដឹង។ នៅពេលដឹងថាគឹមសៀនមកហ្វឹកហាត់បាល់ទះដូច្នេះ តើលោកទាំងពីរមានប្រតិកម្មដូចម្ដេច?
ស្មាត់ធំមហាផ្ទៃ លុច គឹមសៀន បានបញ្ជាក់ថា ៖«ការពិតទៅគេហៅខ្ញុំ (ហាត់) តាំងពីខ្ញុំរៀនថ្នាក់ទី១១ ប៉ុន្តែខ្ញុំសុំថាចាំប្រឡងជាប់សិន។ ដល់ពេលខ្ញុំប្រឡងជាប់ទៅ…ក៏បានមកហ្វឹកហាត់ម៉ោ។ ឪពុកម្ដាយវិញ….ដំបូងម៉ោគាត់អត់ដឹង ខ្ញុំអត់ប្រាប់គាត់ ព្រោះអីគាត់ចង់ឱ្យយើងរៀនតែមួយមុខទេ។ ដល់ពេលអ៊ីចឹងហើយ ក៏យើងមកលេង...ក៏គាត់ឃើញយើង…គាត់សួរយើងថាបានរៀនអត់? យើងថាបានរៀន ពុងរៀន...យើងបានចូលលេងអ៊ីចឹងទៅ គាត់ឃើញយើងលេងតាមទូរទស្សន៍…(ខ្ញុំ)ក៏ប្រាប់គាត់តាមដំណើរ ក៏គាត់ពេញចិត្តឱ្យយើងហាត់ទៅ»។
អំឡុងពេលហាត់ យុវជនមកពីខេត្តកំពង់ស្ពឺ ទទួលបានប្រាក់ខែពីក្លឹបមហាផ្ទៃ និងអាហាររូបករណ៍ជំនាញព័ត៌មានវិទ្យា ពីសាកលវិទ្យាល័យបៀលប្រាយ។
បើតាមសម្ដីរបស់យុវជនវ័យ២៦ឆ្នាំ ដោយសារមានកម្ពស់ខ្ពស់ ១,៨៧ម៉ែត្រ និងដុងពីកំណើត គេលេងបាល់ល្អតាំងពីរៀននៅអនុវិទ្យាល័យ។ ត្រឹមថ្នាក់ទី៩ និងទី១០ គេបានយកឈ្នះស្មាត់គ្រាក់ៗក្នុងខេត្តកំពង់ស្ពឺ រួចបន្តដើរលេងតាមខេត្តផ្សេងៗទៀត។ គេឡើងខ្លាំងបំផុតនៅឆ្នាំ២០១៣។
ឱកាសក្លាយជាកីឡាករនៅមហាផ្ទៃ
ក្រោយចប់ថ្នា់ទី១២ ឆ្នាំ២០១៣ គេបានឡើងមកលេងនៅភ្នំពេញ និងបានយកឈ្នះក្មេងៗហ្វឹកហាត់នៅមហាផ្ទៃ ដែលមានអាយុស្របាលគ្នា។ ពេលនោះហើយ គេមានឱកាសចូលក្លឹបបាល់ទះដ៏ធំមួយនេះ។
ដឹងក្បួនច្បាប់នៃការហ្វឹកហាត់ និងរបៀបលេងស្តង់ដារ គឹមសៀន ឡើងខ្លាំងបំផុតនៅចន្លោះឆ្នាំ ២០១៦ ដល់ ២០១៧។ ចំណុចល្អរបស់គេគឺ ឡើងម៉ាត់ខាងស្ដាំដាច់ ចាប់សេវ៉ារឹង និងមានរនាំងធំ។ មានការខិតខំប្រឹងប្រែង គេបានជាប់ជម្រើសជាតិបាល់ទះលើក្ដារឆ្នាំ២០១៧ លេងនៅប្រទេសម៉ាឡេស៊ី និងធ្លាប់ជាប់ជម្រើសជាតិបាល់ទះឆ្នេរខ្សាច់នៅឆ្នាំ២០១៩។ ដោយមានបញ្ហាសុខភាព គឹមសៀន បានសុំឈប់វិញ ក្រោយហាត់បានរយៈពេល៦ខែ។
ពានរង្វាន់អំឡុងលេងនៅមហាផ្ទៃ
នៅមហាផ្ទៃធំរូបនេះ តែងជាប់ជម្រើស១១នាក់ដំបូង។ គេជួយឱ្យក្លឹបឈ្នះពានរង្វាន់បាល់ទះ Leo Cup ឆ្នាំ២០១៦ និងពានក្នុងស្រុកផ្សេងៗទៀត។
ស្ថានភាពគ្រួសារ និងកម្រិតវប្បធម៌
លុច គឹមសៀន កើតនៅភូមិត្រពាំងខ្យង ឃុំត្រពាំងគង់ ស្រុកសំរោងទង ខេត្តកំពង់ស្ពឺក្នុងគ្រួសារកសិករ។ ឪពុកឈ្មោះ ដួង ចន្ថា និងម្ដាយ វ៉ា សារ៉េត។ មានបងប្អូន៥នាកក់ ស្រី២ ប្រុស៣ គេជាកូនទី៣។ គឹមសៀន រៀនចប់វិទ្យាល័យ ហ៊ុន សែន ចំបក់ និងជាអតីតនិស្សិតព័ត៌មានវិទ្យាឆ្នាំទី៤ នៃសាកលវិទ្យាល័យបៀលប្រាយ។
បច្ចុប្បន្ន គឹមសៀន គ្មានឈ្មោះក្នុងបញ្ជីកីឡាករបាល់ទះរបស់ក្លឹបក្រសួងមហាផ្ទៃទៀតឡើយ ដោយគេកំពុងបម្រើការងារជាមន្ត្រី នៅអគ្គនាយកដ្ឋានអត្តសណ្ណាណកម្ម។
កាលពីពេលថ្មីៗនេះ លុច គឹមសៀន បានចូលរួមប្រកួតបាល់ទះដណ្ដើមប្រាក់លានក្រៅផ្លូវការមួយនៅក្រុងតាខ្មៅ ដោយទម្រង់លេងរបស់គេហាក់ធ្លាក់ខ្លាំង។ នេះក៏ដោយសាររូបគេ ជាប់រវល់ធ្វើការ មិនបានហ្វឹកហាត់ជាងកន្លះឆ្នាំមកហើយ៕