ម៉ាត់ ណូរុន តស៊ូទាំងអស់សង្ឃឹម២ឆ្នាំ ទម្រាំងើបផុតពីភពខ្មៅងងឹត

2020-10-06 04:41:18
បាល់ទាត់

2020-10-06 04:41:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធកំពុងលេចធ្លោបឹងកេត ម៉ាត់ ណូរុន បានរៀបរាប់ពីដំណើរជីវិតរបស់គេកាល ដែលកំពុងមានបញ្ហាបេះដូងអំឡុងឆ្នាំ២០១៥ ដល់ ២០១៧ គិតទៅមានរយៈពេលប្រមាណ២ឆ្នាំ ដើម្បីតស៊ូប្រឆាំងនិងវាសនា ទើបអាចវិលចូលទីលានវិញបាន។

គ្រប់គ្នាប្រហែលជាបានដឹងហើយថា កាលឆ្នាំ២០១៥ ម៉ាត់ ណូរុន កំពុងហ្វឹកហាត់ជាមួយ U18 ក្រោន ហើយបានបង្ហាញសមត្ថភាពលេចធ្លោមិនធម្មតា សឹងតែមិនគួរឲ្យជឿ។ ប៉ុន្តែទោះជាបង្ហាញសមត្ថភាពល្អបែបណា ក៏គេមិនអាចចូលលេងឲ្យក្រុមធំបាន ដោយសារបញ្ហាបេះដូង។

ក្រោយពេលដឹងថា ខ្លួនមានបញ្ហានេះ ហើយត្រូវគ្រូពេទ្យហាមមិនឲ្យលេងបាល់គេបានអស់សង្ឃឹមជាមួយវាសនាដែលធ្វើបាប។ គេតែងអង្គុយគិតតែម្នាក់ឯងអស់សង្ឃឹម នឹងជីវិតមួយនេះ ហើយថែមទាំងតូចចិត្តជាមួយខ្លួនឯង នៅពេលឃើញមិត្តភ័ក្ដិរបស់គេ ដែលហាត់ស្របាលគ្នាបានបង្ហាញខ្លួនក្នុងក្រុមជម្រើសជាតិ។ ដោយសារភាពងប់ងុល នឹងបាល់ទាត់ និងក្រោកឈរចង់ប្រឆាំង និងវាសនា ផងនោះ ណូរុន បានកែប្រែជីវិត ដោយដើរលេងបាល់សឹងរាល់ថ្ងៃតាមតារាងនានា (Futsal ) ដើម្បីជំនះជាមួយព្រហ្មលិខិត ដែលធ្វើបាបខ្លួន។

ក្នុងការដើរលេងបាត់ទាំងខ្លួនមានបញ្ហាបេះដូងនេះ ឪពុកម្ដាយរបស់គេតែងដាស់តឿន គ្រប់ពេលឲ្យចេះស្រលាញ់សុខភាព និងត្រូវតែតាមដានសុខភាពរបស់ខ្លួនឯងគ្រប់ពេល។ ប៉ុន្តែឪពុកម្ដាយរបស់គេ មិនបានបិទសិទ្ធិក្នុងការចូលរួមប្រកួតបាល់ទាត់ Futsal នានាឡើយ ពោលគឺមានការលើកទឹកចិត្តឲ្យជំនះឧបសគ្គនេះទៅវិញ ។

ដោយសារការលេងបាល់រាល់ថ្ងៃ ហើយសុខភាពរបស់គេធម្មតាពីមួយថ្ងៃទៅមួយថ្ងៃ គេក៏បានសាកល្បងចូលធ្វើតេស្តនៅក្លឹបអគ្គិសនីកាលឆ្នាំ២០១៧។ ពេលនោះ ណូរុន បាននិយាយថា « បង! បើធ្វើតេស្តទៅ មានក៏មានទៅ ហើយអត់វិញខ្ញុំសប្បាយចិត្តងាប់ហើយ »។ ក្រោយពេលត្រួតពិនិត្យសុខភាពទៅឃើញថា ធម្មតា ណូរុន ក៏ទទួលបានឱកាសក្លាយជាកីឡាករអគ្គិសនីជាផ្លូវការកាលឆ្នាំ២០១៧ តែម្ដង។

ម៉ាត់ ណូរុន កើតថ្ងៃទី១៧ ខែមិថុនា ឆ្នាំ១៩៩៨ គេជាខ្មែរឥស្លាម ឪពុកឈ្មោះ ណុះ ហាម៉ាត់ (អ្នកចំការ) ម្ដាយឈ្មោះ លី សារ៉ស់ (អាជីវករ លក់សាច់គោ) ទីកន្លែងកំណើតច្រាំងចំរេះ ភ្នំពេញ ។ គេមានបងប្អូន ៤ នាក់ជាកូនទី៤ បងប្រុសទី១ ឈ្មោះ ប៉ាត ទ្រី បងប្រុសទី២ ឈ្មោះ រ៉ អាត បងស្រីទី៣ ឈ្មោះ សាប ព្រីយ៉ាស់ ។

គេបានចូលហាត់នៅការពារជាតិកាលអាយុ ១២ ឆ្នាំ ដោយលេងឲ្យ U 14 ការពារជាតិ ហើយក៏បានជាប់ជម្រើសជាតិ U14 ផងដែរក្នុងឆ្នាំ២០១១ ដោយហាត់នៅទ័ពតែ ២ ទៅ៣ ខែប៉ុណ្ណោះ។ ក្រុមជម្រើសជាតិ U14 កាលនោះស្ថិតក្រោមការដឹកនាំរបស់លោក ប៊ួយ ដារី អតីតគ្រូបង្វឹកយុវជនរបស់ភ្នំពេញក្រោន។

យុវជនរូបនេះជាអតីតសិស្ស អនុវិទ្យាល័យចម្រើនជាតិ ចន្លោះថ្នាក់ទី១ ដល់ទី ៩ ក្រោយចូលហាត់នៅក្រោនឆ្នាំ២០១១ គេក៏ត្រូវបានក្លឹបមួយនេះរៀបចំឲ្យចូលរៀននៅ ប៊ែលធី ហើយក៏ទើបតែបានប្រលងជាប់បាក់ឌុបកាលឆ្នាំ២០១៨ ។

ដោយសារបង្ហាញទម្រង់លេងយ៉ាងល្អជាមួយអគ្គិសនី គេក៏ត្រូវបានក្លឹបបឹងកេត នាំមកចូលក្រុមដោយប្រកាសផ្លូវការកាលចុងឆ្នាំ២០១៨។ រដូវកាលមុន ២០១៩ កីឡាករខ្មែរឥស្លាមរូបនេះ មិនសូវបានជួយក្រុមឡើយ ដោយសារបញ្ហារបួសញាំញី។ ដោយឡែកឆ្នាំ២០២០ នេះគេបានជួយក្រុមពេញលេញ និងរកបានគ្រាប់បាល់ចំនួន ១៥ គ្រាប់គិតត្រឹមសប្ដាហ៍ទី១៦ នៃលីគកំពូលកម្ពុជា ៕