អ្នកជិតខាង ទម្លាយពីរបៀបរស់នៅគ្រួសារ Ronaldo នៅអ៊ីតាលី

2020-07-14 07:28:22
បាល់ទាត់

2020-07-14 07:28:22
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី Elizabeth Borel ជាអ្នករស់នៅជាប់ផ្ទះគ្នាជាមួយ Cristiano Ronaldo ក្នុងទីក្រុង Turin ប្រទេសអ៊ីតាលី អស់រយៈពេល២ឆ្នាំមកហើយ។

កូនស្រីរបស់អតីតកីឡាករ Felice Farfallino ដែលធ្លាប់បានជួយអ៊ីតាលីឈ្នះពាន World Cup កាលពីឆ្នាំ១៩៣៤រូបនេះ បាននិយាយពីអារម្មណ៍និងអ្វីដែលអ្នកស្រីបានឃើញ ពីផ្ទះរបស់ Ronaldo កីឡាករល្បីឈ្មោះនៅលើលោកនេះ។ អ្នកស្រី Elizabeth Borel បានអះអាងថាតាំងពី Ronaldo មករស់នៅ អ្នកស្រីមិនដែលឮសំឡេងរំខាន ការផឹកស៊ី ច្រៀងរាំម្ដងណានោះទេ។ ជាធម្មតា អ្នកស្រីឃើញតែពេលកីឡាករ Juventus រូបនេះចេញពីផ្ទះ ជាមួយឡាន Rolls-Royce គេប៉ុណ្ណោះ។

ដោយឡែកនៅក្នុងផ្ទះរបស់អតីតកីឡាករ Real Madrid នេះវិញ អ្នកស្រីធ្លាប់មើលឃើញថាមានសួនផ្កាយ៉ាងស្រស់ស្អាត និងមានកន្លែងហាត់ប្រាណ អាងហែលទឹកផងដែរ។ អ្នកស្រីមិនដែលបាននិយាយជាមួយ Ronaldo នោះទេ ព្រោះរូបគេចាកចេញពីផ្ទះតែពេលទៅហ្វឹកហាត់ និងកម្មវិធីនានាប៉ុណ្ណោះ។ ដោយសូម្បីតែ Georgina ដែលជាសង្សារនោះ ក៏កម្រដើរខាងក្រៅខ្លាំងណាស់។

ប្រសិនបើនាងដើរទៅខាងក្រៅ ក៏មានអង្គរក្សពីក្រោយ និងអ្នកមើលថែកូនៗ២នាក់ផងដែរ។ ដូច្នេះហើយ មិនមានពេលសម្រាប់ឱ្យការជជែកគ្នានោះឡើយ។ បើនិយាយពី Cristiano Junior វិញ ក៏មិនដែលលេងជាមួយក្មេងៗក្បែរនោះដែរ។ ក្មេងប្រុសរូបនេះ ចេញពីផ្ទះតែពេលទៅហ្វឹកហាត់បាល់ទាត់ និងទៅសាលាប៉ុណ្ណោះ។ និយាយជារួមទៅ គ្រួសារកីឡាករបាល់ទាត់ល្បីឈ្មោះមួយនេះ ពិតជាស្ងប់ស្ងាត់ខ្លាំងណាស់៕