Man City ធ្លាប់មានកីឡាករ ដែលជាអតីតយោធា Nazi អាល្លឺម៉ង់

2020-05-12 14:25:39
ប្រវត្តិ

2020-05-12 14:25:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Manchester City ក៏មានប្រវត្តិយូរក្រាស់ក្រែលដែរក្នុងបាល់ទាត់អង់គ្លេស។ ក្នុងទំព័រប្រវត្តិសាស្ត្រទាំងនោះ ក្លឹបក៏ធ្លាប់នាំចូលកីឡាករ ដែលជាអតីតយុទ្ធជនរបស់កងឆត្រយោងរបស់ Nazi អាល្លឺម៉ង់ទៀតផង។ កីឡាករនោះគឺ អ្នកចាំទី Bert Trautmann។

កើតនៅឆ្នាំ១៩២៣ លោក Trautmann ធ្លាប់ជាយុវជនអ៊ីទ្លែរ មុននឹងបម្រើការក្នុងកងឆត្រយោង Nazi។ លោកបានប្រឡូកក្នុងសមរភូមិដំបូងនៅឆ្នាំ១៩៤១ ដោយបានចូលក្នុងសមរភូមិប៉ូឡូញ លុះក្រោយមកចូលរួមក្នុងសមរភូមិសូវៀត។ នៅពេលដែលក្រុម Nazi ជិតចាញ់ Trautmann ត្រូវបានទាហានបរទេសចាប់បានជាច្រើនដង ហើយចុងក្រោយទាហានអង់គ្លេសចាប់លោក ហើយបញ្ជូនទៅជំរំអ្នកទោសសង្គ្រាម។

លោក Trautmann បានលេងបាល់ទាត់ជាច្រើនប្រកួតក្នុងជំរំអ្នកទោសសង្គ្រាម។ តាមពិតដំបូងលោកមិនមែនជាអ្នកចាំទីទេ តែពេលលោករបួស លោកក៏ចាំទីជំនួស ក៏ធ្វើឲ្យលោកល្បីខាងចាំទីតែម្ដង។

លោកលេងក្នុងលីគមិនអាជីពនៅពេលដំបូងៗ លុះនៅឆ្នាំ១៩៤៩ Manchester City បាននាំលោកចូល។ កាលនៅក្លឹបអង់គ្លេសនេះ លោកត្រូវបានជនជាតិអង់គ្លេសប្រតិកម្មណាស់ដែរ តែលោកនៅតែស៊ូទ្រាំបាន។ លោកលេងបាន ៥៤៥ប្រកួតក្នុងរយៈពេលជាង ១៥ឆ្នាំ នៅ City ដោយលោកបានចេញពីក្លឹបនៅឆ្នាំ១៩៦៣។ លោកបានលេងបន្តិចបន្តួចក្រោយចេញពី Man City។

ដោយសារតែបញ្ហានយោបាយ លោកមិនអាចលេងតំណាងអាល្លឺម៉ង់បានទេ។ លោកបានចេញទៅដឹកនាំក្លឹបដែរ តែរបៀបថាជាបង្ហាត់បង្រៀនក្បួនបច្ចេកទេសច្រើនជាង។

ទោះជាលោកមិនអាចលេងតំណាងអាល្លឺម៉ង់ លោកទទួលបានមេដាយអាល្លឺម៉ង់ថ្នាក់សហព័ន្ធ និងមេដាយចក្រភពអង់គ្លេសថ្នាក់ទី ៤ ចំពោះការផ្សារភ្ជាប់ទំនាក់ទំនងរវាងអង់គ្លេស និងអាល្លឺម៉ង់តាមរយៈវិស័យបាល់ទាត់។