- 2015-10-16 21:24:11
- បាល់ទាត់
គ្រូ Southampton បដិសេធមិនទៅដឹកនាំជម្រើសជាតិហុល្លង់
- 2015-10-16 21:24:11
- ចំនួនមតិ 0 | ចំនួនចែករំលែក 0
គ្រូ Southampton បដិសេធមិនទៅដឹកនាំជម្រើសជាតិហុល្លង់
ចន្លោះមិនឃើញ
គ្រូបង្វឹកជនជាតិហុល្លង់ លោក Ronald Koeman បានបង្ហាញពីជំហរចង់ដឹកនាំក្លិប Southampton បន្តទៀត បើទោះជាថ្មីៗនេះមនុស្សជាច្រើនរំពឹងថាលោកអាចនឹងទៅដឹកនាំក្រុមជម្រើសជាតិ ហុល្លង់ យ៉ាងណាក៏ដោយ។
ភាពរង្គោះរង្គើនេះកើតឡើងបន្ទាប់ពីគ្រូបង្វឹកក្រុមជម្រើសជាតិបច្ចុប្បន្នគឺលោក Danny Blind កំពុងរងសម្ពាធក្រោយដឹកនាំក្រុមពណ៌ទឹកក្រូច ហុល្លង់ធ្លាក់ចេញពីវគ្គជម្រុះពានរង្វាន់ទ្វីបអឺរ៉ុបឆ្នាំ២០១៦។
Koeman បានបញ្ជាក់ថាមានការទាក់ទងឲ្យទៅដឹកនាំក្រុមជម្រើសជាតិហុល្លង់ក្ដី តែខ្លួនចង់ដឹកនាំក្លិបអាជីពនៅ Premier League ច្រើនជាង។ អ្នកចាត់ការវ័យ៥២ឆ្នាំ បាននិយាយថា៖ “ខ្ញុំគឺជាគ្រូបង្វឹកក្រុម Southampton ខ្ញុំស្រលាញ់ការងារនេះ ហើយចង់បន្តធ្វើវាទៀត។ កុងត្រាចាស់ជាមួយនឹងក្លិបនៅសល់១ឆ្នាំទៀតឯណោះ ដូច្នេះវាមិនអាចទៅរួចនោះទេ ដែលខ្ញុំត្រូវចាកចេញ”។
យ៉ាងណាក្ដី អតីតកីឡាករជម្រើសជាតិហុល្លង់ពីឆ្នាំ ១៩៨២ ដល់១៩៩៤រូបនេះ បានបង្ហើបថាលោកអាចនឹងទៅដឹកនាំក្រុមជម្រើសជាតិហុល្លង់នៅថ្ងៃណាមួយនាពេលអនាគត តែវាត្រូវអាស្រ័យលើ កត្តាជាច្រើន ហើយអ្វីដែលសំខាន់នៅពេលនេះ គឺហុល្លង់ត្រូវទទួលស្គាល់ភាពខ្សោយរបស់ខ្លួន ហើយសិក្សាពីវា។
Koeman ជាអ្នកចាត់ការមួយរូបដែលពោរពេញដោយបទពិសោធន៍ដឹកនាំក្រុមធំៗជាច្រើន។ ក្រៅពីធ្វើជាជំនួយការគ្រូជម្រើសជាតិពីឆ្នាំ១៩៩៧ ដល់១៩៩៨ និងជំនួយការគ្រូបង្វឹក Barcelona ពីឆ្នាំ១៩៩៨ ដល់២០០០ លោកបានធ្វើជាគ្រូបង្គោលក្នុងក្លិប Vitesse, Ajax, Benfica, PSV Eindhoven, Valencia, AZ និង Feyenoord មុនផ្លាស់មកកាន់ Southampton កាលពីឆ្នាំ២០១៤៕
ប្រែសម្រួល៖ រុន វីរ៉ុត ប្រភព៖ skysports