- 2015-04-06 20:01:40
- ព័ត៌មាន
កីឡាករម្នាក់ឈ្នះមេដាយសំរឹទ្ធ គ្រូម្នាក់ប្រឡងជាប់អាជ្ញាកណ្តាលអន្តរជាតិនៅឡាវ
- 2015-04-06 20:01:40
- ចំនួនមតិ 0 | ចំនួនចែករំលែក 0
កីឡាករម្នាក់ឈ្នះមេដាយសំរឹទ្ធ គ្រូម្នាក់ប្រឡងជាប់អាជ្ញាកណ្តាលអន្តរជាតិនៅឡាវ
ចន្លោះមិនឃើញ
ក្រុមកីឡាការ៉ាតេដូកម្ពុជាបានឈ្នះមេដាយសំរឹទ្ធមួយគ្រឿង និងប្រឡងជាប់ជាចៅក្រមអាជ្ញាកណ្តាលអន្តរជាតិម្នាក់នៅព្រឹត្តិការណ៍ប្រកួតជើងឯកការ៉ាតេដូអាស៊ីអាគ្នេយ៍នៅទីក្រុងវៀងចន្ទន៍ ប្រទេសឡាវ កាលពីថ្ងៃទី១ ដល់ថ្ងៃទី៥ខែមេសាឆ្នាំ ២០១៥កន្លងទៅ។
លោក ឆាយ កៀក អនុប្រធានខេមរៈសហព័ន្ធការ៉ាតេដូកម្ពុជាបានឲ្យដឹងថា ក្រុមកីឡាការ៉ាតេកម្ពុជាដែលត្រូវបានបញ្ជូនទៅប្រទេសឡាវនេះ ៣នាក់ជាកីឡាករ គ្រូ៣នាក់សម្រាប់ប្រលងចៅក្រមអន្តរជាតិ ម្នាក់ប្រលងគ្រូដឹកនាំ និងម្នាក់ប្រលងគ្រូជំនួយ។ ព្រឹត្តិការណ៍ជើងឯកការ៉ាតេលើកទី៤នេះមានប្រទេសទាំងអស់ចូលរួមចំនួន៧។
ជាលទ្ធផលលោក ឆាយ កៀក បានប្រឡងជាប់ជាចៅក្រមអាជ្ញាកណ្តាលអន្តរជាតិដែលបានក្លាយជាគ្រូការ៉ាតេកម្ពុជាទីពីរបានក្លាយជាអាជ្ញាកណ្តាលអន្តរជាតិ ខណៈកីឡាករ ឈឿន ឆេងលីម ឈ្នះបានមេដាយសំរឹទ្ធក្នុងប្រភេទទម្ងន់៧៦គីឡូក្រាម។
លោកបានបញ្ជាក់យ៉ាងច្បាស់ពីផលប្រយោជន៍នៃវិញ្ញាបនបត្រអាជ្ញាកណ្ដាលអន្តរជាតិនេះដែលជាការទទួលស្គាល់របស់ពិភពលោកថា ប្រទេសកម្ពុជាមានអាជ្ញាកណ្ដាលត្រូវតាមស្តង់ដារ និងប្រើការបានទូទាំងពិភពលោក។
លោក ឆាយ កៀក បានបង្ហាញពីអារម្មណថា លោកពិតជាមានមោទនភាពដែលអាចជួយឲ្យប្រទេសកម្ពុជាមានអាជ្ញាកណ្ដាលត្រូវតាមស្តង់ដារពិភពលោក ហើយប្រទេសដទៃបានស្គាល់ពីជោគជ័យក្នុងវិស័យកីឡាការ៉ាតេនៅកម្ពុជានាពេលនេះ។
គណៈប្រតិភូកីឡាការ៉ាតេកម្ពុជានឹងវិើត្រឡប់មកពីទីក្រុងវៀងចន្ទន៍ប្រទេសឡាវមកកម្ពុជានាម៉ោង១រសៀលនេះនៅប្រលានយន្តហោះភ្នំពេញ៕
អត្ថបទ៖ស្រី សុវណ្ណដារ៉ា រូបថត៖ ឆាយ គៀក
