ឃើញ ជ័យ គឹមហុង បោះពាក្យថា ខ្សែក្រវាត់ TVK ជារបស់ខ្លួន ខាំ កូនខ្លា តបបែននេះវិញ

2022-03-11 07:43:39
ប្រដាល់

2022-03-11 07:43:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពេលឃើញ ជ័យ គឹមហុង បោះពាក្យសម្ដីថា «ខ្សែក្រវាត់ TVK Fighter ជារបស់ខ្លួនហើយ» ពេលនេះអ្នកលេងគុនខ្មែរមកពីក្លឹប ប៉ែនកាក់គុនខ្មែរ ខាំ កូនខ្លា បានតបបែបនេះវិញថា «គាត់ថាអីចឹងខ្ញុំនឹងខំប្រឹងហាត់ ដើម្បីយកខ្សែក្រវាត់នេះឲ្យបាន»។

ការលើកឡើងបែបនេះក្រោយពេល ខាំ កូនខ្លា យកឈ្នះពិន្ទុកីឡាករ សូដា សុភាព ដោយពិន្ទុក្នុងកម្មវិធីប្រកួតសន្សំពិន្ទុក្នុងពូល B ក្នុងកម្មវិធីប្រកួតប្រដាល់ដណ្ដើមខ្សែក្រវាត់ TVK Fighter កាលពីយប់មិញនេះ។ កីឡាករដដែលបានបន្ថែមថា គឹមហុង គាត់ល្អដើរបុក ដូច្នេះគេនឹងប្រឹងហាត់ពង្រឹងខ្លួនឯងដើម្បីទប់ក្បាច់របស់ គឹមហុង ឲ្យបាន។

កាលពីយប់មិញនេះដែរ គឹមហុង ក៏បានយកឈ្នះដៃគូ សាន្ត វាសនា ដោយផ្ដួលដៃគូរូបនេះឲ្យសុំចុះ ចាញ់នៅទឹកទី១ផងដែរ។ ក្រោយការប្រកួតនេះ អ្នកលេងមកពីក្លឹបឃ្លាំងមឿងកីឡាក៏បានបង្ហាញជំនឿចិត្តកាន់តែខ្ពស់ថា គេនឹងអាចឈ្នះខ្សែក្រវាត់មួយនេះ។ គឹម ហុង មើលឃើញថាកីឡាករទាំងអស់ ដែលជាបេក្ខភាពដណ្ដើមខ្សែក្រវាត់ខាងលើ ហាក់មានសមត្ថភាពប្រហាក់ប្រហែលគ្នា។

កាលពីម្សិលមិញនេះមានការប្រកួតសន្សំពិន្ទុចំនួន៤គូ ជាលទ្ធផលគឺជ័យ គឹមហុង ឈ្នះ សាន្ត វាសនា ដោយផ្ដួលឲ្យបោះបង់ការប្រកួតនៅទឹកទី១ ខណៈ ខាំ កូនខ្លា ឈ្នះពិន្ទុ សូដា សុភាព និង ឃួន ឡាំងកូស៊ីន ឈ្នះពិន្ទុកីឡាករ យ៉ន ពិសី ស្របពេល ធន់ អៀងឡេង ឈ្នះពិន្ទុកីឡាករ បាន លឹម ៕