- 2021-09-15 06:39:03
- បាល់ទះ
ចិត្តបុណ្យណាស់! លោកគ្រូ ធី សុធា បង្ហាត់បាល់ទះក្មេងៗមិនយកប្រាក់ និងផលិតបានកីឡាករល្អៗច្រើន
- 2021-09-15 06:39:03
- ចំនួនមតិ 0 | ចំនួនចែករំលែក 0
ចិត្តបុណ្យណាស់! លោកគ្រូ ធី សុធា បង្ហាត់បាល់ទះក្មេងៗមិនយកប្រាក់ និងផលិតបានកីឡាករល្អៗច្រើន
ចន្លោះមិនឃើញ
ហេតុតែស្រលាញ់កីឡាបាល់ទះ លោក ធី សុធា បានចាប់ផ្ដើមបង្កើតតារាងដីវាលស្រែប្រក់មេឃមួយនៅឆ្នាំ២០១៧។ កាលនោះលោកជ្រើសបានកីឡាករកម្ពស់ខ្ពស់៦នាក់រួមមាន រិទ្ធ ពិសី (ហៅសី) អ៊ឹម ណារិទ្ធ (ហៅតាក់អន្លង់វែង) វណ្ណ គីលី (ហៅ Belly) ស៊ឹម ដែន (ហៅដែន) ម៉េង ស៊ីម៉ាក់ និង ព្រឿង ម៉េងអ៊ី។
លោក សុធី បានបង្ហាត់បង្រៀនពួកគេដោយមិនយកប្រាក់ ហ្វឹកហាត់ និងរស់នៅជាមួួយគ្នាបែបលក្ខណៈស្រុកស្រែ មានហូបគិតតាមមានហូប អត់ហូបគិតតាមអត់ហូប ប្រៀបបីដូចជាគ្រួសារតែមួយអ៊ីចឹង។
បច្ចុប្បន្នសិស្សរបស់លោកគឺ អ៊ឹម ណារិទ្ធ ហៅតាក់អន្លង់វែង ជាកីឡាករកំពុងហាត់ជម្រើសជាតិបាល់ទះឆ្នេរខ្សាច់ និងជាកីឡាកររបស់ក្លឹបស្នងការដ្ឋាននគរបាលរាជធានីភ្នំពេញ ចំណែក ស៊ឹម ដែន ធ្លាប់ទៅចូលរួមជាមួយក្រុម 911 នៃក្លឹបបញ្ជាការដ្ឋានអង្គរក្ស។ ដោយឡែកបួននាក់ទៀត មានឈ្មោះក្របខ័ណ្ឌនៅអង្គភាពកងពលលេខ៩ក្នុងខេត្តបាត់ដំបង។
គ្រូបាល់ទះវ័យ៣៩ឆ្នាំដដែល បានបង្ហាញការរំភើបរីករាយពេលឃើញសិស្សរបស់ខ្លួនមានសមត្ថភាពល្អ និងលេងនៅក្លឹបល្អៗ ខណៈលោកមិនចង់បានអ្វីក្រៅពីចង់ឃើញភាពរីកចម្រើនរបស់ពួកគេឡើយ។
លោកបញ្ជាក់ថា ៖«មានអារម្មណ៍ថាសប្បាយចិត្ត ហើយនិងមានចិត្តមួយដែលរំភើបក្នុងការងារដែលយើងប្រឹងប្រែងមក វាបានលទ្ធផលល្អខ្លះៗដែរ ហើយក៏ទឹកចិត្តហ្នឹងគឺមិនបញ្ហាអីទេជាមួយក្មេង ឱ្យតែគាត់មានអនាគត គាត់សម្រេចចិត្តដើរផ្លូវមួយណា សម្រេចចិត្តទៅរស់នៅកន្លែងណាក៏ខ្ញុំសប្បាយចិត្ត ជូនពរគាត់ ដើម្បីឱ្យគាត់មានមុខមាត់មានកិត្តិយសបន្តក្នុងវិស័យបាល់ទះយើង»។
ក្រៅពីអ្នកទាំង៦នាក់ខាងលើ លោកគ្រូសុធាក៏ផលិតបានកីឡាករល្អៗមួយចំនួនទៀតដែរ បើទោះសមត្ថភាពមិនល្អខ្លាំង ប៉ុន្តែអាចលេងលំដាប់ថ្នាក់ស្រុកឬខេត្តដែរ។
ចិត្តស្រលាញ់កាន់តែធំ បុរសមានដើមកំណើតនៅខេត្តបាត់ដំបង ក៏បានផ្លាស់មកតារាងជួលដំបូលថ្មី ចម្ងាយពីតារាងចាស់ប្រមាណ៥គីឡូម៉ែត្រ ស្ថិតក្នុងភូមិឃុំជ្រៃ ឃុំជ្រៃ ឃុំថ្មគោល ខេត្តបាត់ដំបង។ លោកបង្ហើបថាសព្វថ្ងៃលោកមានកូនសិស្សមួយចំនួនដែរ ប៉ុន្តែដោយសារប្រទេសកំពុងជួបវិបត្តិជំរាតត្បាតកាចសាហាវងឺកូវីដ-១៩ ក្រុមបាល់ទះឃុំជ្រៃរបស់លោកមិនបានប្រមូលផ្ដុំកីឡាករហ្វឹកហាត់ឡើយ។
បើតាមការឱ្យដឹងពីគ្រូបាល់ទះប្រចាំអង្គភាពកងពលលេខ៩ខេត្តបាត់ដំបងរូបនេះ គឺលោករីករាយក្នុងការទទួលក្មេងៗកំព្រាដែលគ្មានផ្ទះសំម្បែង ដែលចង់ហាត់បាល់ឱ្យស្នាក់នៅជាមួយបានម្នាក់ទៅពីរនាក់តាមលទ្ធភាពលោកមាន។ តែយ៉ាងណាពេលនេះលោកបង្ហើបថា ក្រុមកំពុងខ្វះខាត ហើយក៏មិនដឹងថាអាចដំណើរការការបង្ហាត់បណ្ដុះបណ្ដាលសិស្សបានដល់ពេលណាទៀតដែរ ខណៈកន្លងមកលោកពឹងផ្អែកលើជំនួយពីសប្បុរសជន អង្គភាពកងពលលេខ៩ និងថវិកាដ៏ស្ដួចស្ដើងផ្ទាល់ខ្លួនរបស់លោក។ ចំណែកតារាងថ្មីរបស់លោក មានគម្លាតឆ្ងាយពីភូមិផ្សេង ជាហេតុមិនសូវមានអ្នកទៅលេង ខណៈតម្លៃជួល ២០០ដុល្លារក្នុងមួយខែ។
លោកគ្រូ ធី សុធា បានសង្កត់ធ្ងន់ថា ៖«ទី១ ភាគច្រើនពីសប្បុរសជន ទី២ មានការឧបត្ថម្ភពីអង្គភាពកងពលលេខ៩មកខ្លះ យើងជួយរួមចំណែកគ្នាខ្លះៗដែរ ហើយទី៣ ខ្ញុំអ្នកក្រោយគេគឺថាខាងបាល់ខាងវីឡេ ព្រោះសមត្ថភាពខ្ញុំមិនមានមិនអីទេ ចឹងខ្ញុំអាចនៅក្រោយគេ សមត្ថភាពខ្ញុំវាខ្សត់ខ្សោយ គ្រាន់និយាយថាទី១សំខាន់ខាងសប្បុរសជនយើងខាងខេត្តបាត់ដំបងគាត់ជួយច្រើន គាត់ជួយជាវីឡេ ជួយជាបាល់ និងថវិកាអីជាដើម ហើយអង្គភាពរបស់ខ្ញុំខាងកងពលលេខ៩ គាត់មានជា១ឆ្នាំម្ដង គាត់មិនអាចមានលទ្ធភាពគ្រប់គ្រាន់ទេ គ្រាន់ថាគាត់បានជំនួយមកយើងខ្លះៗដែរដូចជាអង្ករ ប្រាក់បាយទឹក វីឡេ បាល់អីចឹងទៅ»។
ឆ្លៀតក្នុងឱកាសនេះលោកគ្រូសុធា សូមថ្លែងអំណអរគុណដល់លោកគ្រូៗ និងរៀមច្បង រួមទាំងសប្បុរសជនទាំងអស់ ដែលបានជួយជ្រោមជ្រែងបណ្ដុះបណ្ដាល និងផ្ដល់ជាជំនួយខ្លះៗដល់រក្រុមបាល់ទះរបស់លោក។ លោកបានប្ដេជ្ញាខំប្រឹងប្រែង បណ្ដុះបណ្ដាលក្មេងៗ ដើម្បីឱ្យពួកគេមានជំនាញ សុខភាពល្អ និងជៀសឆ្ងាយពីគ្រឿងញៀន។
គួរបញ្ជាក់ថាសព្វថ្ងៃលោក ធី សុធា ជាគ្រូបាល់ទះមួយរូបនៅក្នុងអង្គភាពកងពលលេខ៩ខេត្តបាត់ដំបង ហើយលោកបានជួលតារាងបាល់ទះដំបូលមួយនៅក្នុងភូមិជ្រៃ ឃុំជ្រៃ ឃុំថ្មគោល ខេត្តបាត់ដំបង ដើម្បីបង្ហាត់បង្រៀនក្មេងៗដែលស្រលាញ់វិស័យមួយនេះ។
សម្រាប់ប្រិយមិត្តដែលស្រលាញ់វិស័យបាល់ទះ និងចង់ជួយជាបាល់វីឡេ និងថវិកាតិចច្រើនក្ដីអាចទាក់ទងទៅលេខលោកគ្រូផ្ទាល់ ០៩៥ ៩៣៩ ១៩៣ - ០៨១ ៤៣៤ ៤៨៤ - ០៨៨ ៣៧៣ ៣១៨៦៕