- 2021-05-04 03:02:45
- បាល់ទាត់
ក្រោយប្រពន្ធស្លាប់ ឪពុក ឈិនជិន សុខចិត្តនៅម្នាក់ឯង ឲ្យកូនបន្តក្ដីស្រមៃអាជីពបាល់ទាត់នៅឆ្ងាយ
- 2021-05-04 03:02:45
- ចំនួនមតិ 0 | ចំនួនចែករំលែក 0
ក្រោយប្រពន្ធស្លាប់ ឪពុក ឈិនជិន សុខចិត្តនៅម្នាក់ឯង ឲ្យកូនបន្តក្ដីស្រមៃអាជីពបាល់ទាត់នៅឆ្ងាយ
ចន្លោះមិនឃើញ
លោក ហ៊ន ណារិទ្ធ ឪពុករបស់យុវជនលេចធ្លោ គីរីវង់សុខសែនជ័យ ហ៊ត ឈិនជិន សុខចិត្តរស់នៅស្រុកកំណើតតែម្នាក់ឯងខេត្តប៉ៃលិន ដោយជំរុញឲ្យកូនប្រុសបន្តអាជីពបាល់ទាត់ បើទោះប្រពន្ធស្លាប់ចោលកាលពីចុងឆ្នាំ២០២០ ថ្មីៗនេះ។
យុវជនវ័យ១៩ ឈានចូល២០ ឆ្នាំ ឈិនជិន បានរៀបរាប់ថា ក្រោយពេលម្ដាយស្លាប់គេចង់បោះបង់អាជីពបាល់ទាត់ចោលទៅហើយ ដោយគិតថា នឹងទៅរស់នៅជុំគ្នាពីរនាក់លោកប៉ារបស់គេនៅស្រុកកំណើតខេត្តប៉ៃលិន។ ប៉ុន្តែលោកប៉ារបស់គេបានជំរុញទឹកចិត្តកូនប្រុសដោយ សុខចិត្តរស់នៅម្នាក់ឯង មិនឲ្យកូនប្រុសបោះបង់អាជីពបាល់ទាត់ចោលឡើយ ហើយលើកទឹកចិត្តឲ្យកូនប្រុសប្រឹងប្រែងថែមទៀងផង។
បច្ចុប្បន្នលោកប៉ារបស់គេមានវ័យ៥៨ឆ្នាំហើយ ឈិនជិន មានបងប្អូន៤ នាក់ហើយគេជាកូនពៅ។ ចំណែកបងបងរបស់គេសុទ្ធតែជាប់បំពេញការងាររៀងៗខ្លួនអស់ហើយ។ ឪពុករបស់គេបាននិយាយមកកាន់គេថា «យើងដើរដល់ចំណុចនេះហើយ ត្រូវតែបន្តដើរឲ្យដល់គោលដៅកូនប្រុស»។ ក្រោយពេលទទួលបានការលើកទឹកចិត្តបែបនេះ ឈិនជិន ក៏ធ្វើតាមការណែនាំរបស់លោកប៉ារបស់គេ។
យុវជនកើតថ្ងៃទី១៥ ខែសីហា ឆ្នាំ២០០១ រូបនេះបានចូលលេងបាល់ទាត់ដំបូងជាមួយយុវជនក្រោមអាយុ ១៣ ឆ្នាំរបស់ខេត្តប៉ៃលិន កាលឆ្នាំ២០១៤ ក្រោយមកក៏ទទួលបានឱកាសចូលហាត់បាល់ទាត់នៅបាទីនៅឆ្នាំ២០១៦។ បន្ទាប់ពីទទួលបានការបណ្ដុះបណ្ដាលនៅសាលាបាល់ទាត់ជាតិបាទីចំនួន២ឆ្នាំ ពោលគឺចុងឆ្នាំ២០១៨គេក៏ត្រូវបានក្លឹបអាជីពបឹងកេតកោះហៅឲ្យចូលលេងនៅឈុតយុវជនក្រោមអាយុ១៨ឆ្នាំ។ បង្ហាញខ្លួនជាមួយយុវជនបឹងកេតបានតែមួយឆ្នាំកូនពៅក្នុងគ្រួសាររូបនេះក៏បានឡើងមកលេងឈុតធំតែម្ដង។ លេងឲ្យឈុតធំបឹងកេតឆ្នាំ២០២០មិនបានបង្ហាញខ្លួនលេងក្នុងលីគទេ ហើយរដូវកាលថ្មី២០២១គេក៏ផ្លាស់មកកាន់គីរីវង់សុខសែនជ័យ៕