មកស្គាល់អតីតកីឡាកររហស្សនាម «ឃាតករឈាមត្រជាក់» ដៃគូរបស់ទូចអង្គរក្ស

2021-04-27 08:08:43
បាល់ទះ

2021-04-27 08:08:43
ចំនួនមតិ 0 | ចំនួនចែករំលែក 0

ចន្លោះមិនឃើញ

លេងមិនសូវចេះមាត់ករច្រើន ដែលស្រដៀងនឹងពាក្យចាស់លោកថា មឺសៗឆ្កឹះឆ្នាំងបាយធ្លុះលោក ភី ដារ៉ា ហៅស្មាត់ទួក ត្រូវបានអ្នកតាមដានបាល់ទះឱ្យរហស្សនាមថា «ឃាតករឈាមត្រជាក់»។

អេគីបមិនទាន់ចូលក្លឹបអាជីព

រហស្សនាមនេះលោក ដារ៉ា ទទួលបានតាំងតែពីដើរលេងជាមួយ ឆែលស៊ី តាក់ជើងទា ដាតាកែវ និងហុងសៀមរាប ដោយអុកឡុកអស់ហើយនៅប៉ែក ព្រំដែនកម្ពុជា-ថៃ ព្រមទាំងបានយកឈ្នះស្មាត់ធំៗស្រុកខ្មែរច្រើនគួរសមដែរ។

មិនតែប៉ុណ្ណោះស្មាត់ល្បីតាមស្រុកភូមិ ដារ៉ា តាក់ជើងទា និងឆែលស៊ី ក៏ធ្លាប់បានយកឈ្នះលើម៉ាប់ឆ្វេងបីស្មើនៅប៉ោយប៉ែតដែរ ដែលកាលនោះអេគីបរបស់សឺវីសឥតស្រមោលគឺពេញសាច់ខ្លាំងមានដូចជា ម៉ាប់ធំ ថនប៉ះសេ និងម៉ាប់ឆ្វេងខ្លួនឯងផ្ទាល់។

លោក ភី ដារ៉ា ពាក់លេខ៦

ប្រវត្តិបាល់ទះអាជីព

លោកដារ៉ា ដំបូងឡើយចេះលេងបាល់នៅអនុវិទ្យាល័យ ចាប់ពីថ្នាក់ទី៨ឡើងទៅ។ គេបានប្រកួតតំណាងវិទ្យាល័យបាត់ដឹង ឈ្នះអស់វិទ្យាល័យតាមស្រុក រួចក៏លេងតំណាងឱ្យខេត្តកំពង់ស្ពឺប្រកួតទូទាំងប្រទេស តែមិនទទួលបានជោគជ័យឡើយ។ ចប់បាក់ឌុបឆ្នាំ២០១១ គេបានឡើងមករៀនភ្នំពេញ និងបានចូលហាត់បាល់ទះនៅក្លឹបកងពលតូចអន្តាគមន៍លេខ៩ ចំណុះកងពលធំអន្តាគមន៍លេខ៣។

នៅកងពលតូចអន្តរាគមន៍លេខ៩ លោកជួយក្លឹបលើកពានមួយចំនួនដែរដូចជា ពានរង្វាន់ស្រាបៀរលីអូរដូវកាលដំបូង នៅខេត្តសៀមរាប និងពានមហាជនតាមបណ្ដាខេត្តផ្សេងៗទៀត។

ក្នុងឆ្នាំ២០១៥ លោកបានចេញពីកងពលទៅចូលរួមជាមួយក្លឹបបញ្ជាការដ្ឋានអង្គរក្សការពារផ្ទាល់ និងបញ្ចប់អាជីពនៅក្លឹបមួយនេះនៅឆ្នាំ២០១៩ រហូតដល់បច្ចុប្បន្ន។

ដោយចូលមុនទូចអង្គរក្ស នៅក្លឹបបញ្ជាការដ្ឋានអង្គរក្សការពារផ្ទាល់ ដារ៉ា ឈ្នះពានផ្ទៃក្នុង (ក្នុងអង្គភាព) បានចំនួនពីរដង និងពានរង្វាន់បាល់ទះស្រាបៀរលីអូមួយលើកនៅទឹកដីខេត្តបាត់ដំបង។

ដោយមើលឃើញពីសមត្ថភាពដ៏ល្អ កីឡាករជំនាញដឺមីរូបនេះ និងមិត្តរួមក្រុមរបស់គេពីរបីនាក់ទៀត ត្រូវបានក្រុមហ៊ុនចម្ការកៅស៊ូវៀតណាមួយ ទិញយកទៅលេងពានរង្វាន់មួយក្នុងប្រទេសវៀតណាម មួយរដូវកាលមានរយៈពេល២ខែ ប៉ុន្តែបានត្រឹមលេខ២ប៉ុណ្ណោះ។

លោក ភី ដារ៉ា ពាក់លេខ៦

ឆ្នាំបង្កើតអេគីបជាមួយទូចអង្គរក្ស និងលេងឡើងខ្លាំងបំផុត

អតីតកីឡាករអង្គរក្សរូបនេះ លេងឡើងខ្លាំងបំផុតនៅអំឡុងឆ្នាំ ២០១៥ - ២០១៦។ អេគីបថ្មីរបស់លោកជាមួយទូចអង្គរក្សមានដូចជា ទូចអង្គរក្ស ភាកងពល ហុង ឆែលស៊ី និងរូបលោកផ្ទាល់ ចាប់ផ្ដើមនៅឆ្នាំ២០១៤ ដល់ ២០១៦។ ក្រុមមួយនេះលេងប្ដូរគ្នា ហើយភាគច្រើនលេងជាមួយគីឡូធំៗ ប៉ុន្តែបើប៉ះគីឡូល្មមៗមិនមានទូចអង្គរក្សទេ។

អតីតកីឡាករបាល់ទះនៃសាកលវិទ្យាល័យន័រតុន និងទូចអង្គរក្ស លេងយល់ចិត្តគ្នាណាស់ ដ្បិតពួកគេដើរជាមួយគ្នាតាំងពីក្មេងៗ សូម្បីរៀនក៏នៅសាកលវិទ្យាល័យ កន្លែងស្នាក់នៅ និងអង្គភាពលេងបាល់ក៏នៅជាមួយគ្នា។ លោកបានបញ្ចប់អាជីពបាល់ទះនៅឆ្នាំ២០១៩ ហើយបច្ចុប្បន្នស្មាត់ល្អរូបនេះ បម្រើការងារនៅអគ្គស្នងការនគរបាលជាតិ។

ចំណេះជំនាញក្នុងបាល់ទះ

កាលនៅជាកីឡាករលោក ភី ដារ៉ា ជំនាញដេញបាល់លឿន ពូកែធ្វើរនាំង និងកាងសេវា។ បើលេងបាល់ប្រកួតក្រៅផ្លូវការកាហ្វេគុយទាវ លោកដារ៉ាក៏ជំនាញបាល់បោកពីលើៗដែរ។ បច្ចុប្បន្នលោកនៅសល់ប្រហែល ៣០% នៃសមត្ថភាពពីមុន ហើយបើតាមការឱ្យដឹងលោកក៏នឹងត្រៀមហ្វឹកហាត់ ដើម្បីប្រឡូកតាមតារាងបាល់ទះនានាវិញ។

កម្រិតវប្បធម៌

ឆ្នាំ២០១១ ភី ដារ៉ា បានបញ្ចប់បាក់ឌុបនៅវិទ្យាល័យបាត់ដឹង ស្រុកឧដុង្គខេត្តកំពង់ស្ពឺ។ លុះដល់ឆ្នាំ២០១៥ បុរសវ័យ៣១ឆ្នាំរូបនេះ បានបញ្ចប់ថ្នាក់បរិញ្ញាបត្រជំនាញមន្ទីរពិសោធន៍ (Laboratory) ពីសាកលវិទ្យាល័យន័រតុន៕

អត្ថបទ៖ អ៊ុំ សុភក្តិ