មកស្គាល់ស្មាត់ កុំកុំ ល្បីខ្លាំងជំនាញប្រើក្រញាំចាប់សេវា!

2021-04-23 03:03:24
បាល់ទះ

2021-04-23 03:03:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះមិនសូវល្បីល្បាញខ្លាំងដូចស្មាត់ផ្សេងៗ (Grade B) ប៉ុន្តែលោក សុង សុចិត្រា ត្រូវបានគេឱ្យរហស្សនាមថា «កុំកុំ» កីឡាករជំនាន់មុនប្រាកដជាស្គាល់លោក។ គេឱ្យរហស្សនាមមួយនេះ ព្រោះលោកមានមុខមាត់ស្រដៀងកុំកុំ និងពូកែប្រើក្រញាំចាប់សេវាមិនថាលោតគប់ឬអ្វីឡើយ ដែលមើលទៅប្រៀបដូចតារាក្បាច់គុន ហុងកុងពូកែក្លេកុំកុំដូច្នេះដែរ។ នេះបើផ្អែកតាមប្រភពដ៏គួរឱ្យទុកចិត្តមួយ។

ប្រភពសុំមិនបញ្ចេញឈ្មោះដដែល បានបញ្ជាក់បែបនេះថា ៖«គាត់ល្អណាស់! គេហៅគាត់តែកុំកុំទេ ហើយសឺវីសគប់គាត់ចាប់តែក្រញាំដៃទេ ក្រញ៉ាំគាត់ល្អណាស់ បើដាច់បាំងអីវិន(គេ)គប់វ៉រ គាត់ប្រើតែក្រញាំបាញ់ផុយទៅលើ»។

តាមពិតអតីតកីឡាកររបស់ស្នងការខេត្តកណ្ដាល លេងឡើងមុនទូចអង្គរក្សទៅទៀត ពោលគឺជំនាន់លោកគ្រូ សោម ចំណាប់ របស់ស្នងការ លោកគ្រូឆាត របស់ក្រសួងមហាផ្ទៃ និងលោកគ្រូជំនាញបាំង សាន សុក្រិត របស់ក្លឹបបាល់ទះវិសាខា។

ជុំវិញប្រវត្តិរបស់អតីតកីឡាករ ក្លឹបកងពលធំអន្តរាគមន៍លេខ៣នេះដែរ លោក ផាត សុភ័ក្រ ហៅទូចអង្គរក្សក៏បានឱ្យដឹងដូចគ្នាថា លោកសុចិត្រាចាប់សេវារឹងខ្លាំងណាស់។

លោក សុង សុចិត្រា រាប់ពីស្ដាំទី៣

អតីតស្មាត់ធំឡើងខ្លាំងអំឡុងឆ្នាំ២០១១-២០១៦ ទូចអង្គរក្ស បានពន្យល់ថា ៖«បាទ! គាត់ពូកែក្រញាំ និយាយទៅគាត់រឹង រឹងសឺវីស គាត់ស្មាត់គាត់ម៉ាត់ និងវ៉ៃសេវាលោតគប់ដែរ ក្រញាំគាត់ខ្លាំងណាស់ក្រញាំគាត់»។

ក្រៅពីរហស្សនាមខាងលើ អតីតកីឡាករក្រុមឆត្រយោង៩១១ ក៏មានរហស្សនាមមួយទៀតថា «យន្តតាខ្មៅ» ដែលល្បីនៅតំបន់ក្រុងតាខ្មៅអំឡុងពេលនោះ។

ចំពោះរហស្សនាមនេះដែរ លោក សុង សុចិត្រា បានឱ្យដឹងបែបនេះ ៖«បាទ! បាទ! កាលហ្នឹងខ្ញុំលេងនៅតាខ្មៅ ខ្ញុំលេងមិនសូវហត់ គេហៅមនុស្សយន្តមនុស្សយន្ត ខ្ញុំលេងធម្មតាៗ ស្មាត់ក៏ល្មមចាប់សឺវីសក៏ល្មម និយាយទៅមធ្យមៗទាំងអស់កាលមុន តែឥឡូវអត់ទេទៅលែងរួចហើយ។ ការលេងរបស់ខ្ញុំពីមុនមកគួរសមដែរ ទាំងស្មាត់ទាំងសារ៉េទាំងចាប់សឺវីស»។

ចំពោះអាជីពបាល់ទះក្នុងឆ្នាំ២០០៣ ដល់ ២០០៥ លោក សុង សុចិត្រា លេងឱ្យស្នងការខេត្តកណ្ដាល, ឆ្នាំ២០០៦-២០០៧ លេងឱ្យក្រុមឆត្រយោង 911 ជំនាញស្មាត់ដណ្ដើមបានលេខ ១ ពានរង្វាន់ខួបកងទ័ព, លេងឱ្យក្លឹបអង្គរក្សជំនាញ Libero, កងរាជអាវុធហត្ថលើផ្ទៃប្រទេស (PM A2) ដណ្ដើមបានលេខ១ដូចគ្នា។

ចេញពី PM លោកបានចូលលេងឱ្យក្លឹបកងពលធំអន្តរាគមន៍លេខ៣ ដល់ឆ្នាំ២០០៩ លេងលែងកើតក៏ឈប់ និងបានបម្រើការងារនៅស្ថាប័នមួយនេះរហូតមក ប៉ុន្តែមិនមែនផ្នែកកីឡាទេ។ បច្ចុប្បន្នលោកមានវ័យ៤១ឆ្នាំហើយ៕

អត្ថបទ៖ អ៊ុំ សុភក្តិ