សេង កុសែន សោកស្ដាយដែល២ប្រកួតដំបូងបាន ០ពិន្ទុ

2021-03-30 07:35:57
បាល់ទាត់

2021-03-30 07:35:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារ សេង កុសែន បានបង្ហាញអារម្មណ៍សោកស្ដាយ ដែលពីរប្រកួតកន្លងមកក្រុម នគរបាលជាតិរបស់គេ ចាញ់ទាំងពីរលើកមាន ០ពិន្ទុឈរចំណាត់ថ្នាក់លេខ២ បើរាប់ពីបាតតារាង។

ក្លឹបដែលនគរបាលជាតិចាញ់ មានអគ្គិសនីកម្ពុជា (៣-២) និងអាស៊ីអឺរ៉ុបយូណាយធីត (៣-២) ដែលជាក្រុមមានសមត្ថភាពប្រហាក់ប្រហែលគ្នា និងធ្លាប់ចាញ់ពួកគេកាលពីរដូវកាលមុន។

ក្រោយមិនអាចជួយក្លឹបយក៦ពិន្ទុពីក្រុមទាំងពីរខាងលើ អតីតកីឡាករភ្នំពេញក្រោន បានបង្ហើបថា ៖«និយាយទៅពីរប្រកួតហ្នឹងស្ដាយណាស់ រកពិន្ទុអត់បាន ក្រុមធ្លាប់លេងជាមួយរហូតសោះ យើងរំពឹងថាបាន៣ពិន្ទុ ៣ពិន្ទុ តែចុងក្រោយចាញ់គេទាំងពីរប្រកួត»។

បើតាមសម្ដីរបស់អតីតកីឡាករបឹងកេត គឺ ក្រុមរបស់ខ្លួនធ្វើបានល្អខ្លាំង អំឡុងពេលហ្វឹកហាត់ ប៉ុន្តែហាក់ពិបាកពេលប្រកួតជាក់ស្ដែង។ កុសែន មើលឃើញថាក្រុមខ្លួនខ្វះខាតខ្លាំងលើការប្រាស្រ័យទាក់ទង ការគាំទ្រ និងឆន្ទៈ ដែលជាហេតុធ្វើមិនបានល្អដូចការចង់បានរបស់គ្រូបង្វឹក។

សេង កុសែន ពន្យល់ថា ៖«ទី១កត្តាគាំទ្រគ្នាយឺត ទី២គឺសំខាន់មែនទែនគឺការទំនាក់ទំនងគ្នា អ៊ីចឹងគួបផ្សំការទំនាក់ទំនងការគាំទ្រគ្នាយឺត អាហ្នឹងហើយ ហើយមួយទៀតគឺឆន្ទៈម្នាក់ៗ បើឆន្ទៈម្នាក់ៗអត់ខ្ពស់ទេ គឺយើងមិនងាយយកឈ្នះគេបានទេ អ៊ីចឹងចេញមកពីម្នាក់ៗ ត្រូវមានមហិច្ឆតាចង់ឈ្នះ ម្នាក់ៗគឺចេះជួយគ្នាអាហ្នឹងគឺល្អមែនទែន អ៊ីចឹងយើងខ្វះខាតការទំនាក់ទំនងគ្នា នៅលើទីលានសំខាន់ណាស់»។

យ៉ាងណាកីឡាករវ័យ៣១ឆ្នាំ និងមិត្តរួមក្រុម គ្មានការបាក់ទឹកចិត្តអ្វីឡើយ ដោយជំនួសមកវិញនូវការបន្តខិតខំប្រឹងប្រែងជាមួយក្លឹប និងប្ដេជ្ញាយកឈ្នះឲ្យបាននៅប្រកួតក្រោយៗ៕

រូបភាព៖ ក្លឹបបាល់ទាត់នគរបាលជាតិ

អត្ថបទ៖ អ៊ុំ សុភក្តិ