- 2021-03-09 02:01:49
- បាល់ទាត់
ក្រោយចូលឈុតធំបឹងកេត វ៉ាំង ដាវីន ប្ដេជ្ញាខំហ្វឹកហាត់ ដើម្បីមានឱកាសបង្ហាញខ្លួន
- 2021-03-09 02:01:49
- ចំនួនមតិ 0 | ចំនួនចែករំលែក 0
ក្រោយចូលឈុតធំបឹងកេត វ៉ាំង ដាវីន ប្ដេជ្ញាខំហ្វឹកហាត់ ដើម្បីមានឱកាសបង្ហាញខ្លួន
ចន្លោះមិនឃើញ
ក្រោយបឹងកេតប្រកាសដាក់បញ្ចូលជាសមាជិកឈុតធំ កាលពីពេលថ្មីៗកន្លងទៅយុវជន វ៉ាំង ដាវីន បានប្ដេជ្ញាប្រឹងប្រែងហ្វឹកហាត់ ដើម្បីមានឱកាសបង្ហាញខ្លួនញឹកញាប់ និងជួយក្រុមទទួលបានលទ្ធផលល្អក្នុងឆ្នាំនេះតាមដែលអាចធ្វើបាន។
«គោលដៅបន្ទាប់ ខ្ញុំនឹងខិតខំប្រែងប្រែងហ្វឹកហាត់ ដើម្បីមានឱកាសបង្ហាញខ្លួនឱ្យបានច្រើន និងជួយក្លឹបឱ្យទទួលបានលទ្ធផលល្អនៅក្នុងឆ្នាំនេះទៀត»។ នេះជាការលើកឡើងរបស់ វ៉ាំង ដាវីន។
ទោះបីជាយ៉ាងណា យុវជនមកពីខេត្តកំពង់ឆ្នាំងថា រូបគេនៅខ្វះបទពិសោធដែលចាំបាច់ត្រូវការពេលវេលារៀនសូត្រ និងស្វែងយល់បន្ថែម ដ្បិតការប្រកួតរបស់គេនៅថ្នាលយុវជន មិនសូវមានការប្រកួតប្រជែងខ្លាំងក្លាដូចឈុតធំ។
កីឡាករដ៏ល្អវ័យ១៨ឆ្នាំបានបន្ថែមថា «បាទអ្វីដែលខ្ញុំនៅខ្វះខាតនៅស្ទើរ ទីមួយគឺបទពិសោធ។ បទពិសោធខ្ញុំ ខ្ញុំធ្លាប់តែលេងនៅយុវជន ហើយការប្រកួតប្រជែងល្មម ឥឡូវយើងឡើងមកឈុតធំ ការប្រកួតប្រជែងក៏ខ្លាំង ត្រូវការបទពិសោធច្រើន»។
មកទល់នឹងពេលនេះ យុវជនដែលអាចលេងបានច្រើនតួនាទីដូចជា ការពារ បម្រើការពារ និងបម្រើ បានហ្វឹកហាត់ និងលេងជាមួយឈុតធំខ្លះៗហើយ ដោយគេទទួលបានការណែនាំល្អៗ ពីគ្រូបង្វឹក រៀមច្បង និងមិត្តរួមក្រុម។ យ៉ាងណាសម្រាប់តួនាទីនៅឈុតធំ គេមិនទាន់ច្បាស់លេងតំបន់ណាឱ្យប្រាដកនៅឡើយ ដ្បិតគ្រូបង្វឹកកំពុងសិក្សាលើទម្រង់របស់គេ។
គួរបញ្ជាក់ថា កាលពីខែកក្ដដាឆ្នាំ២០២០ វ៉ាំង ដាវីន បានធ្វើតេស្តជាប់ឈុតយុវជន U18 បឹងកេត និងទទួលបានការសរសើរពីគ្រូបង្វឹក ឈុន សុធារ័ត្ន ថាគេអាចនឹងក្លាយជាគ្រាប់ពូជដ៏ល្អមួយសម្រាប់ក្លឹប និងជម្រើសជាតិកម្ពុជានាថ្ងៃអនាគត ដ្បិតគេមានទេពកោសល្យ និងការខំប្រឹងប្រែង។ អំឡុងពេលនោះដែរ គេក៏មានឈ្មោះធ្វើតេស្ត U19 ដើម្បីជម្រុះត្រៀមការប្រកួត AFC U-19 Championship 2020 ក្នុងចំណោមយុវជនជាង៣០នាក់៕