ចន្ថា ចន្ទាកា៖ ខ្ញុំអរខ្លាំងពេលបានលេងប៉ះក្លឹបខ្លាំងនិងស៊ុតចូល១គ្រាប់

2020-08-05 02:44:38
បាល់ទាត់

2020-08-05 02:44:38
ចំនួនមតិ 0 | ចំនួនចែករំលែក 0

ចន្លោះមិនឃើញ

បង្ហាញខ្លួនជាកីឡាករបម្រុងសឹងគ្រប់ការប្រកួត ចន្ថា ចន្ទាកា ទើបតែបានលេងជាលើកទី១ ហើយជាប់ជម្រើស១១នាក់ដំបូង ក្នុងរដូវកាលឆ្នាំ២០២០។ ការបង្ហាញខ្លួនឱ្យអគ្គិសនីកម្ពុជាលើកនេះមិនធម្មតា ព្រោះត្រូវប៉ះក្រុមខ្លាំងបឹងកេត ប៉ុន្តែអ្វីដែលមិននឹកស្មានដល់ គឺគេអាចរកបាន១គ្រាប់ក្នុងជំនួបដ៏មានសម្ពាធ។ យ៉ាងណាមួយគ្រាប់នេះ បានធ្វើឱ្យគេសប្បាយចិត្តខ្លាំងបំផុត។

ចន្ថា ចន្ទាកា លេខ២៩/រូបភាពក្លឹបបាល់ទាត់អគ្គិសនីកម្ពុជា

ខ្សែប្រយុទ្ធ ចន្ទាកា ប្រាប់ថា ៖«...និយាយទៅអរហ្មង មានអារម្មណ៍អរខ្លាំងណាស់ ខ្ញុំអត់ដែលបានលេងក្លឹបខ្លាំងហើយ អត់ដែលបានរក (គ្រាប់)...ដល់ពេលរកបាន១អ៊ីចឹង ខ្ញុំអរខ្លាំង...ខ្ញុំអរខ្លាំងពេលបានលេងប៉ះក្លឹបខ្លាំងនិងស៊ុតចូល១គ្រាប់»។

ក្នុងបង្ហាញខ្លួនផ្លូវការលើកទីមួយ ហើយប៉ះក្លឹបសំបូរធន់ធាន ចន្ទាកា ថាលេងរៀងភ័យបន្តិច មិនអត់ទាន់ស៊ាំក្នុងការប្រកួតប្រជែង និងលេងមិនទាន់ត្រូវជាមួយមិត្តរួមក្រុម ប៉ុន្តែយ៉ាងណាគេលេងប្រកបដោយទំនុកចិត្ត និងភាពជឿជាក់។

ចន្ទាកា បញ្ជាក់ថា ៖«លើកដំបូងភ័យតែមានទំនុកចិត្តលើខ្លួនឯង។ ដំបូងអត់ទាន់ស៊ាំ ហើយក៏ពិបាកលេងជាមួយមិត្តរួមក្រុមដែរ»។

នៅកីឡដ្ឋានអគ្គិសនីកម្ពុជា ក្នុងសប្ដាហ៍ទី១០កាលពីពេលថ្មីៗ ក្លឹបបាល់ទាត់អគ្គិសនីកម្ពុជា បានចាញ់ក្រោមថ្មីជើងបឹងកេត ២-៤ ក្នុងការប្រកួតប្រជែងដណ្ដើមពានរង្វាន់លីគកំពូលកម្ពុជា រដូវកាលឆ្នាំ២០២០។ គ្រាប់បាល់របស់ក្លឹបអគ្គិសនីកម្ពុជា រកបានដោយខ្សែប្រយុទ្ធ ចន្ថា ចន្ទាកា នៅនាទី២៩ និងមួយគ្រាប់ទៀតរកបានដោយខ្សែប្រយុទ្ធ សៀន សុភក្ត្រា នៅនាទី៣៥៕