Messi បឹងកេតបង្ហើបមិត្តរួមក្រុម៣រូបនេះ លេងត្រូវជាមួយខ្លួនជាងគេ

2020-05-06 04:43:11
បាល់ទាត់

2020-05-06 04:43:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធកំពុងឡើងជើង ម៉ាត់ នូរុណ បានបង្ហើបប្រាប់ Sabay ថាកីឡាករបឹងកេតបីរូបគឺ ចាន់ វឌ្ឍនាកា សៀង ចន្ធា និង លី មីហ្សាន លេងត្រូវជាមួយគេជាងគេ បើធៀបនឹងកីឡាករផ្សេងទៀត។

កីឡាកររហស្សនាម Messi បានពន្យល់ថា ៖«ការលេងត្រូវគ្នា ដោយសារយើងហាត់ជាមួយគ្នា លេងជាមួយគ្នា អ៊ីចឹងយើងអាចយល់ចិត្តគ្នាច្រើន»។

ចំណុចសំខាន់ផ្សេងទៀតនោះ អតីតយុវជនថ្នាលក្លឹបភ្នំពេញក្រោន បានឱ្យដឹងពួកគេទាំងបីមានបច្ចេកទេសល្អ ការយល់ដឹងលើទីលានច្រើន ដែលធ្វើឱ្យរូបគេងាយសម្របខ្លួនតាម និងលេងឆាប់យល់ចិត្តគ្នា។

បើនិយាយពី លី មីហ្សាន អតីតខ្សែប្រយុទ្ធក្លឹបអគ្គិសនីកម្ពុជា មើលឃើញខ្សែបម្រើកណ្ដាលរូបនេះ មានបច្ចេកទេសល្អទាំងជំហរគ្រប់គ្រង និងបញ្ជូនបាល់។

ម៉ាត់ នូរុណ បន្ថែម៖ «ចំពោះភាពវ័យឆ្លាតរបស់គាត់ គឺការបញ្ជូនបាល់ និងគ្រប់គ្រងបាល់។ ការគ្រប់គ្រងបាល់របស់គាត់ គឺអត់ឱ្យខូចងាយៗទេ។ បើការបញ្ជូនបាល់ក៏ច្បាស់ល្អ ហើយតំបន់ហ្នឹងគេត្រូវការ អ្នកបញ្ជូនបាល់ច្បាស់ គាត់លេងតំណែងហ្នឹង គឺស័ក្ដិសមនឹងគាត់មែនទែន»។

លី មីហ្សាន បងប្រុស លី វ៉ាហេដ

ម៉ាត់ នូរុណ ជាអតីតយុវជនថ្នាលភ្នំពេញក្រោន ចាប់តាំងពីឆ្នាំ២០១៣ និងបានទៅលេងឱ្យអគ្គិសនីកម្ពុជានៅឆ្នាំ២០១៦ មុនបឹងកេតទិញយកនៅឆ្នាំ២០១៩ និងបានពាក់អាវលេខ១០ ជំនួសកីឡាករប្រេស៊ីល Maycon Calijuri ដែលចប់កុងត្រា ប៉ុន្តែរូបគេមិនបានលេងទេ ព្រោះមានរបួស ACL។

ចំណែកឆ្នាំ២០២០ Messi បានលេងជម្រើស១១នាក់ដំបូង ៣ប្រកួត និងរកគ្រាប់បាល់ឱ្យក្រុមបាន១គ្រាប់ ក្នុងជំនួបបឹងកេត ១-១ ជាមួយអង្គរថាយហ្គឺរ កាលពីសប្ដាហ៍ទី១។ យ៉ាងណារូបគេបានរងរបួសជាថ្មី ក្នុងការប្រកួតបឹងកេត ១-១ ជាមួយណាហ្គាវើលដ៍ នៃការដណ្ដើមពានរង្វាន់លីគកំពូលកម្ពុជាសប្ដាហ៍ទី៣ នៅកីឡដ្ឋានខេមបូឌាអ៊ែវេបឹងស្នោរ។ របួសសន្លាក់របស់គេ នៅមិនទាន់ជា ១០០%ឡើយ ប៉ុន្តែគេសង្ឃឹមនឹងអាចលេងបាន ពេលបាល់ទាត់ត្រឡប់មកវិញនាពេលខាងមុខ៕

អត្ថបទ៖ អ៊ុំ សុភក្តិ