- 2020-04-22 08:11:34
- បាល់ទាត់
ចាន់ សុភា បង្ហើបថាណាហ្គាជួយឱ្យខ្លួនជាប់ជម្រើសជាតិ U18 កម្ពុជា
- 2020-04-22 08:11:34
- ចំនួនមតិ 0 | ចំនួនចែករំលែក 0
ចាន់ សុភា បង្ហើបថាណាហ្គាជួយឱ្យខ្លួនជាប់ជម្រើសជាតិ U18 កម្ពុជា
ចន្លោះមិនឃើញ
ខ្សែបម្រើការពារ ចាន់ សុភា បានបង្ហើបឱ្យដឹងថា រូបគេបានជាប់ជម្រើសជាតិកម្ពុជា នៃពានរង្វាន់ AFF U-18 Youth Championship ឆ្នាំ២០១៩ ក៏ព្រោះតែកម្លាំងចិត្តផ្ដល់ដោយក្លឹបណាហ្គាវើលដ៍។
តាមសម្ដីអតីតកីឡាករក្លឹបវេសស្ទឺនភ្នំពេញ និងអគ្គិសនីកម្ពុជា ណាហ្គាជាក្លឹបធំមួយនៅលីគកំពូលកម្ពុជា ដែលពោរពេញដោយការប្រកួតប្រជែង ហេតុនេះទើបជំរុញឱ្យគេខិតខំហ្វឹកហាត់។
សុភា បញ្ជាក់ ៖«ខ្ញុំជាប់ជម្រើសជាតិ U18 ហ្នឹងដោយសារណាហ្គា ដែលផ្ដល់ឱកាស ជំរុញឱ្យខ្ញុំខ្លាំង ព្រោះណាហ្គាជាក្លឹបមួយមានការប្រកួតប្រជែងខ្លាំង ធ្វើឱ្យខ្ញុំខំប្រឹងហាត់ខំប្រឹងប្រជែង ឱ្យខ្ញុំយកឈ្មោះ U18 បាន»។
ពានរង្វាន់ AFF U-18 Youth Championship ឆ្នាំ២០១៩ ត្រូវបានធ្វើឡើងនៅប្រទេសវៀតណាម។ ឆ្លងកាត់៥ប្រកួតវគ្គចែកពូល B កម្ពុជា ចាញ់ ៣ ឈ្នះ ២ ពោលគឺឈ្នះជាប្រវត្តិសាស្រ្តទៅលើ U18 ថៃ ៤-៣ និង U18 វៀតណាម ២-១។ សម្រាប់ជើងឯកនៃពានរង្វាន់នេះ គឺបានលើអូស្ត្រាលី (៥សម័យកាល) លេខ២បានលើម៉ាឡេស៊ី លេខ៣បានលើឥណ្ដូណេស៊ី និងលេខ៤បានលើមីយ៉ាន់ម៉ា។
គួរបញ្ជាក់ថា ចាន់ សុភា បានចូលរួមជាមួយណាហ្គាវើលដ៍នៅឆ្នាំ២០១៩ ក្រោយក្លឹបរបស់គេ វេសស្ទឺនភ្នំពេញ ប្រកាសផ្អាកសកម្មភាពនៅឆ្នាំដដែល។ អតីតយុវជនអាយុក្រោម១៧របស់បឹងកេត លេងឱ្យណាហ្គាបាន៥ប្រកួត គឺពានសម្ដេច ហ៊ុន សែន ២ដងនិងលីគកំពូលកម្ពុជា ៣ដង ចំណែករដូវកាលឆ្នាំ២០១៩-២០២០នេះ គេមិនទាន់ត្រូវបានគ្រូបង្គោលលោក មាស ចាន់ណា ដាក់ឱ្យលេងនៅឡើយទេ៕