Paul Pogba ចិត្តបុណ្យមែន រៃអង្គាសប្រាក់ថ្ងៃខួបកំណើត ជួយប្រឆាំងជំងឺកូរ៉ូណា

2020-03-16 08:03:14
បាល់ទាត់

2020-03-16 08:03:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើក្រុមបិសាចក្រហម Manchester United កីឡាករ Paul Pogba បានយកឱកាសខួបកំណើតគម្រប់ខួប ២៧ឆ្នាំរបស់ខ្លួនមករៃអង្គាសប្រាក់ ដើម្បីជួយប្រយុទ្ធប្រឆាំងជំងឺកូរ៉ូណា ឬ Covid-19។

យោងតាមសារព័ត៌មាន BBC ខ្សែបម្រើសញ្ជាតិបារាំង បានបង្កើតផេករៃអង្គាសប្រាក់មួយ និងសន្យាផ្ដល់ជំនួយហិរញ្ញវត្ថុទៅឱ្យអង្កការ Unicef ដើម្បីជួយកុមារដែលឆ្លងមេរោគកូរ៉ូណា។

Paul Pogba និយាយថារូបគេនឹងផ្ដល់ប្រាក់ទ្វេគុណ បើប្រាក់រៃអង្គាសនេះកើនដល់ ២៧ ០០០ ផោន។ កីឡាកររូបនេះបន្ថែមថា ការរីករាលដាលទ្រង់ទ្រាយធំនេះ អាចប៉ះពាល់ខ្លាំង ជាពិសេសកុមារក្រីក្រ និងងាយរងគ្រោះ។

Pogba បញ្ជាក់ ៖«វាជាថ្ងៃខួបកំណើតខ្ញុំ ខ្ញុំសូមឱ្យខ្លួនឯង ក្រុមគ្រួសារ និងមិត្តភ័ក្ដិរបស់ខ្ញុំ មានសុខភាពល្អ។ ទោះបីជាយ៉ាងណា មិនមែនគ្រប់គ្នា សុទ្ធតែមានសុខភាពល្អទេឥឡូវនេះ។ ដូចនៅពេលនេះអ៊ីចឹង ពួកយើងត្រូវតែរួមរស់ជាមួយគ្នា»។

ថវិកាដែលទទួលបាននឹងត្រូវចំណាយលើស្រោមដៃ (អាចបោះចោលបាន) ម៉ាស់វះកាត់ និងវ៉ែនតាសម្រាប់បុគ្គលិកសុខាភិបាល។ គួរបញ្ជាក់ថា ក្នុងថ្ងៃខួបវ័យ២៦ឆ្នាំ Pogba ក៏ធ្លាប់បានធ្វើដែរ ដោយរូបគេប្រមូលថវិកាបាន ៧ ៣៦០ ផោនជួយដល់អង្គការទឹកស្អាត៕

ប្រភព៖ BBC ប្រែសម្រួល៖ អ៊ុំ សុភក្តិ