- 2020-03-05 02:40:21
- ប្រដាល់
ជើងខ្លាំងមកពីកោះកុង សែន រ៉ាដេត នឹងឡើងសង្វៀនជាលើកទី២ នៅ PNN ថ្ងៃអាទិត្យនេះ
- 2020-03-05 02:40:21
- ចំនួនមតិ 0 | ចំនួនចែករំលែក 0
ជើងខ្លាំងមកពីកោះកុង សែន រ៉ាដេត នឹងឡើងសង្វៀនជាលើកទី២ នៅ PNN ថ្ងៃអាទិត្យនេះ
ចន្លោះមិនឃើញ
អ្នកប្រដាល់ល្បីឈ្មោះវ័យក្មេង សែន រ៉ាដេត នឹងឡើងប្រកួតលើកទី២របស់ខ្លួននៅសង្វៀន PNN ថ្ងៃអាទិត្យនេះនាជំនួបមិត្តភាពអន្តរជាតិជាមួយអ្នកលេងគុនថៃ អប់សែ។
បន្ទាប់ផ្អាកប្រកួតរយៈប្រហែល៣ឆ្នាំមកនេះ អ្នកប្រដាល់សាច់សល្អគ្រប់ក្បាច់ខាងលើនេះបានវិលចូលសង្វៀនគុនខ្មែរវិញបាន១ប្រកួតហើយកាលពីថ្ងៃសៅរ៍សប្ដាហ៍មុននេះនៅលើសង្វៀន CNC ។ នៅថ្ងៃអាទិត្យទី៨ ខែមីនា ២០២០ រូបគេនឹងត្រូវប្រកួតកម្ដៅសាច់ដុំជាថ្មីទៀតនៅ PNN ។
នៅប្រកួតទី១ របស់ រ៉ាដេត សប្ដាហ៍មុននេះគឺមានអ្នកគាំទ្រមួយចំនួនបានសរសើរថារូបគេនៅបង្ហាញទម្រង់វ៉ៃបានល្អប្រហែលពីមុនដែរ ប៉ុន្តែមួយចំនួនក៏លើកឡើងថាសមត្ថភាពមិនទាន់ដូចមុន ឬល្អដូចមុននៅឡើយទេ ដូចជាការចូលចាប់ជាដើម។ យ៉ាងណាមិញ ម្ចាស់ខ្លួនក៏បានឲ្យដឹងតាមបណ្ដាសារព័ត៌មានខ្លះៗដែរថា រូបគេនៅមិនទាន់ល្អ ឬស្ទាត់ដូចមុនទេ ការចេញកណ្ដាប់ដៃក៏មិនទាន់បានល្អ ការចាប់លេងជង្គង់ក៏អញ្ចឹងដែរ។ រ៉ាដេត បញ្ជាក់ថានឹងខំប្រឹងប្រែងហ្វឹកហាត់ពង្រឹងសមត្ថភាពបន្ថែមទៀត។
រំលឹកដែរថា សង្វៀនប្រដាល់របស់ PNN ដែលធ្វើឡើងរៀងរាល់ថ្ងៃអាទិត្យ និងកំពុងលេងខ្សែក្រវាត់ប្រាក់ ខ្សែក្រវាត់មាសនោះបានទុកឲ្យកីឡាករដែលជាប់វគ្គផ្ដាច់ព្រ័ត្រសម្រាករយៈពេលប៉ុន្មានសប្ដាហ៍សិន ហើយនឹងបន្តការប្រកួតវិញថ្ងៃទី១៥ មីនា ២០២០។ ដោយឡែកខាងរៀបចំកម្មវិធីសប្ដាហ៍នេះបានដាក់ សែន រ៉ាដេត ឲ្យប្រកួតមិត្តភាពអន្តរជាតិជាមួយលេងលេងគុនថៃ អប់សែ លើប្រភេទទម្ងន់ ៥៤គីឡូក្រាម។ ចំណែកគូអន្តរជាតិមួយទៀតនោះ ហ៊ីម គីមរៀង ក៏ត្រូវប៉ះថៃដែរ៕
