ការប្រណាំងម៉ូតូហោះអន្តរជាតិ បញ្ចប់ដោយជោគជ័យ ត្រៀមលើកទី២ នៅចុងឆ្នាំ

2017-02-20 04:25:18
ព័ត៌មាន

2017-02-20 04:25:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រណាំងម៉ូតូហោះអន្តរជាតិ (Top 1 oil International Supercross ) ឆ្នាំ២០១៧ នៅទីលានព្រែកលាប បានបញ្ចប់ទៅដោយជោគជ័យហើយកាលពីម្សិលមិញនេះ ហើយរំពឹងថានឹងបង្កើតវាម្ដងទៀតនៅចុងឆ្នាំនេះ។

ការប្រកួតដ៏ស្វិតស្វាញខាងលើនេះ ធ្វើឡើងរយៈពេល២ថ្ងៃមកហើយ ដោយទើបតែបញ្ចប់កាលពីល្ងាចម្សិលមិញ។ ក្នុងនោះ គេបានបែងចែកជា៥ក្រុម ដោយមានកីឡាករចូលរួមជាច្រើនរួមទាំងបរទេសផងដែរ។ ដោយការបែងចែកជា៥ក្រុមនេះ រួមមានក្រុមសំខាន់ជាងគេ A ជាក្រុមសម្រាប់ជើងខ្លាំងពោរពេញដោយបទពិសោធន៍ហើយបើកទូលាយឱ្យបរទេសចូលរួមប្រកួតដូចជាថៃ ម៉ាឡេស៊ី ឥណ្ឌូនេស៊ី ហ្វីលីពីន និងវៀតណាម។ ក្រុម B ជាក្រុមថ្មីមានសមត្ថភាពមធ្យម ក្រុម C ជាក្រុមប្រណាំងម៉ូតូត្រៃមានបទពិសោធន៍ច្រើនឆ្នាំ ក្រុម D ជាក្រុមថ្មី បទពិសោធន៍តិច ប្រណាំងម៉ូតូត្រៃ និងក្រុម E ចុងក្រោយគេ ជាក្រុម VIP ដែលកីឡាកមានអាយុចាប់ពី៣០ឆ្នាំឡើងទៅ។

ចំពោះលទ្ធផលវិញ Sabay សូមលើកយកតែក្រុម A ដែលជាក្រុមពោរពេញដោយកីឡាករល្អៗមើលជម្រាបជូនប្រិយមិត្តប៉ុណ្ណោះ៖

ArunKrung Pinpon លេខ១ទទួលបានប្រាក់រង្វាន់ ៥០០ដុល្លារ ពានមួយ និងប្រេង Top1
Thod Saphon លេខ២ ទទួលបានប្រាក់លើកទឹកចិត្ត និងប្រេងរំអិល Top1
Apiwat Janchay លេខ៣ ទទួលបានប្រាក់លើកទឹកចិត្ត និងប្រេងរំអិលTop1
Glenn Aguilar លេខ៤ ទទួលបានប្រាក់លើកទឹកចិត្ត និងប្រេងរំអិលTop1
Mchhammao Dom លេខ៥ ទទួលបានប្រាក់លើកទឹកចិត្ត និងប្រេងរំអិលTop1

ក្រោយពីចប់ការប្រកួតនេះដែរ ឯកឧត្ដម មៀច សុផាន់ណា ប្រធានសហព័ន្ធកីឡាយានយន្តកម្ពុជា បានអបអរចំពោះការប្រកួតខាងលើ ព្រោះវាអាចសញ្ញាណមួយបញ្ជាក់ឱ្យដឹងថាកីឡាប្រណាំងម៉ូតូនៅកម្ពុជាកំពុងតែឈានទៅហើយ។ មួយវិញទៀត វាក៏បានបញ្ជាក់ប្រាប់ទៅពលរដ្ឋថាការប្រណាំងម៉ូតូមិនមែនជាល្បែងភ្នាល់លុយអ្វីនោះទេ ផ្ទុយទៅវិញវាជាកីឡាមួយប្រភេទ។

ដោយឡែក លោក ឡៅ លីហុក អគ្គនាយកក្រុមហ៊ុន Top1 បានបញ្ជាក់នេះជាការជោគជ័យខ្លាំងមួយសម្រាប់ក្រុមហ៊ុនរបស់លោកដែលបានបង្កើតកម្មវិធីនេះឡើយ។ មួយវិញទៀតវាជាសញ្ញាមួយអាចបញ្ជាក់បានថាកីឡាករប្រណាំងម៉ូតូនៅកម្ពុជាកំពុងតែឈានទៅមុខហើយ។ ខណៈដែលការប្រកួតខាងលើនេះនឹងបន្ដធ្វើទៀតនៅចុងឆ្នាំ២០១៧ខាងមុខ ហើយនឹងធ្វើឱ្យកាន់តែពិសេសឡើង។

លោក ឡៅ លីហុក អគ្គនាយកក្រុមហ៊ុន Top1

ចំពោះការប្រកួតខាងលើនេះដែរ ត្រូវបានអ្នករៀបចំបង្ហើបថាអាចនឹងចំណាយថវិកាអស់ប្រហែលជា៣ម៉ឺនដុល្លារអាមេរិក ព្រោះកីឡាករដែលមកចូលរួមទាំងអស់គឺខាងអ្នករៀបចំជាអ្នកចាត់ចែងជួលម៉ូតូនិងថ្លៃចំណាយផ្សេងៗទៀតទាំងអស់៕