គ្រូជម្រើសជាតិបារាំងថា Anthony Martial ធ្វើឲ្យអ្នករិះគន់បាត់មាត់

2015-10-06 22:06:40
បាល់ទាត់

2015-10-06 22:06:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធវ័យក្មេងរបស់ក្លិប Manchester United កីឡាករ Anthony Martial ត្រូវបានគ្រូបង្វឹកក្រុមជម្រើសជាតិបារាំង លោក Didier Deschamps សរសើរមិនដាច់ពីមាត់ ថាអាចធ្វើឲ្យអ្នករិះគន់ស្ងាត់មាត់ តាមរយៈទម្រង់លេងល្អរបស់ខ្លួន។ ការនិយាយដូច្នេះ គឺក្រោយពីលោកបានកោះហៅកីឡាករវ័យ១៩ឆ្នាំរូបនេះ ចូលក្រុមឈុតធំបារាំងសម្រាប់ការប្រកួតមិត្តភាពទល់នឹងអាមិននៀ និងដាណឺម៉ាក ក្នុងសប្តាហ៍នេះ។

Anthony Martial ពេលស៊ុតបញ្ចូលទីឲ្យ Man Utd

នៅក្នុងសន្និសីទសារព័ត៌មាន លោក Deschamps បាននិយាយពាក់ព័ន្ធនឹងអតីតកីឡាករក្រុម Monaco ខាងលើថា៖ "មានការវិភាគជាច្រើនទៅលើកីឡាករ Martial តាំងពីដំបូងមកម្ល៉េះ ដែលវាបានក្លាយជាបន្ទុកយ៉ាងធ្ងន់ដល់រូបគេ។ Martial រងការិះគន់យ៉ាងខ្លាំង ប៉ុន្តែទីបំផុតគេបានធ្វើឲ្យការទាយទុកកន្លងមករបស់អ្នករិះគន់ទាំងនោះខុសស្រឡះ តាមរយៈការបង្ហាញទម្រង់លេងដ៏គួរឲ្យភ្ញាក់ផ្អើល រួមទាំងការស៊ុតបញ្ចូលទីជាច្រើនគ្រាប់"។

គ្រូបង្វឹកសញ្ជាតិបារាំង បានបញ្ជាក់បន្ថែមថា៖ "ការដាក់ Anthony Martial ចូលក្រុមជម្រើសជាតិព្រោះខ្ញុំយល់ឃើញថា រូបគេជាកីឡាករមានសមត្ថភាព បើទោះជាគេជាមនុស្សមិនសូវចេះនិយាយច្រើន មិនសំញ៉ែង និងអៀនប្រៀន តែវាមិនមែនជាបញ្ហាសម្រាប់ខ្ញុំ និងកីឡាករទាំងអស់ក្នុងក្រុមជម្រើសជាតិនោះទេ"។

លោក Didier Deschamps គ្រូបង្វឹកក្រុមជម្រើសជាតិបារាំង

Martial មិនទាន់ស៊ុតចូលបាននៅឡើយទេ សម្រាប់ការប្រកួតឲ្យជម្រើសជាតិឈុតធំក្រោយបង្ហាញខ្លួនលើកដំបូងកាលពីខែមុន តែកីឡាករវ័យ១៩ឆ្នាំរូបនេះ ធ្វើបានយ៉ាងល្អក្នុងការបង្ហាញខ្លួនឲ្យបិសាចក្រហម Man Utd ដោយ៤ប្រកួតដំបូង អាចស៊ុតបញ្ចូលទីបាន៤ គ្រាប់៕