- 2015-06-03 20:10:26
- បាល់ទាត់
Ancelotti បដិសេធដឹកនាំ AC Milan ដោយសារចង់សម្រាក
- 2015-06-03 20:10:26
- ចំនួនមតិ 0 | ចំនួនចែករំលែក 0
Ancelotti បដិសេធដឹកនាំ AC Milan ដោយសារចង់សម្រាក
ចន្លោះមិនឃើញ
អតីតអ្នកចាត់ការក្រុម Real Madrid លោក Carlo Ancelotti បានបដិសេធត្រឡប់ទៅដឹកនាំក្រុមអ៊ីតាលី AC Milan វិញ ដោយលើកឡើងកាលពីយប់មិញថា លោកត្រូវការពេលសម្រាកពីការប្រកួតមួយរយៈពេល។
បុរសសញ្ជាតិអ៊ីតាលី វ័យ៥៥ឆ្នាំ ដែលត្រូវបានក្លិបយក្ស Real បណ្ដេញចេញពីតំណែងកាលពីសប្ដាហ៍មុនរូបនេះ ធ្លាប់បាននិយាយហើយថា លោកនឹងសម្រាកពីការងាររយៈពេល១២ខែ ហើយនឹងទៅទឹកដីប្រទេសកាណាដា នៅរដូវក្ដៅនេះ។
យ៉ាងណាក្ដី ម្ចាស់ក្លិប AC Milan លោក Silvio Berlusconi ដែលចង់បានលោក Ancelotti ទៅដឹកនាំក្រុមខ្លាំង នៅតែបញ្ជូន CEO របស់ក្លិបលោក Adriano Galliani ទៅកាន់ទីក្រុង Madrid ប្រទេសអេស្ប៉ាញថែមទៀត ដើម្បីចរចាគ្នា ដោយសង្ឃឹមថានឹងអាចល្បួងឲ្យអ្នកចាត់ការ ដែលធ្លាប់ដឹកនាំ Milan កាលពីឆ្នាំ២០០១ ដល់២០០៩រូបនេះ ត្រឡប់ទៅដឹកនាំជួយស្រោចស្រង់ក្រុមឡើងវិញ។
ប៉ុន្តែកាលពីយប់មិញ លោក Ancelotti បានបង្ហាញអារម្មណ៍ ដោយសរសេរបង្ហោះលើ Twitter ថា៖ "សូមអរគុណដល់ AC Milan សម្រាប់ការការចាប់អារម្មណ៍ និងការគាំទ្រ។ វាជារឿងដ៏ពិបាកមួយ ដែលត្រូវនិយាយថាទេ ទៅកាន់ក្លិបដែលខ្ញុំស្រលាញ់ ប៉ុន្តែខ្ញុំត្រូវការពេលសម្រាកខ្លះៗ។ ខ្ញុំសូមជូនពរពួកគេឲ្យសំណាងល្អគ្រប់យ៉ាង"។
ក្រោយការបដិសេធរបស់លោក Ancelotti ក្រុម AC Milan ដែលស្ថិតនៅចំណាត់ថ្នាក់លេខ១០ ក្នុងតារាង Serie A អាចនឹងផ្ដល់ឱកាសដល់អ្នកចាត់ការបច្ចុប្បន្ន លោក Filippo Inzaghi ដែលទើបតែដឹកនាំក្រុម១រដូវកាលដំបូង ឲ្យនៅដឹកនាំរដូវកាលថ្មីខាងមុខទៀត។
ចុះប្រិយមិត្តយល់ថា លោក Ancelotti អាចនឹងទៅដឹកនាំក្រុមណា នៅថ្ងៃអនាគត?
-ចុចអាន៖ Real Madrid បណ្ដេញអ្នកចាត់ការ Ancelotti ជាផ្លូវការ
ប្រែសម្រួល៖ វិន ជីវ័ន្ត ប្រភព៖ goal.com
