ជួយប្រជាជនហ្វីលីពីនពីជំងឺកូរ៉ូណា Pacquiao ថាមិនខ្លាចស្លាប់ទេ

2020-03-24 02:19:27
បាល់ទាត់

2020-03-24 02:19:27
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមសារព័ត៌មាន The Manila Bulletin កីឡាករប្រដាល់ល្បីឈ្មោះ Manny Pacquiao បានឱ្យដឹងរូបលោក មិនខ្លាចស្លាប់ឡើយ ក្នុងការជួយពលរដ្ឋហ្វីលីពីន អំឡុងពេលវឹកវរដោយជំងឺរាតត្បាតកូរ៉ូណា។

វីរុសរាតត្បាតកូរ៉ូណា បានរីករាលដាលដល់ប្រទេសជាច្រើនលើពិភពលោក ខណៈការធ្វើដំណើរ ការលេងកីឡាករ និងព្រឹត្តិការធំៗផ្សេងៗ ត្រូវបានរឹតបន្តឹង និងបិទចោល។ កាលពីថ្ងៃច័ន្ទ មានមនុស្សច្រើនជាង ៣៤៣ ០០០ នាក់ទូទាំងពិភពលោក បានកើតជំងឺ Covid-19 និងច្រើនជាង ១៤ ០០០ នាក់បានស្លាប់។ ចំណែកប្រទេសហ្វីលីពីន ត្រូវបានគេរាយការណ៍ថា មានអ្នកឆ្លងជំងឺនេះ ៤៦២ ករណី និងស្លាប់ ៣៣ នាក់។

ជុំវិញបញ្ហានេះ Pacquiao បានប្រាប់សារព័ត៌មាន The Manila Bulletin កាលពីចុងសប្ដាហ៍ថា លោកព្រួយបារម្ភប្រជាជនរបស់លោកងាកទៅធ្វើអំពើលួច ប្រសិនបើលក្ខខណ្ឌនៃការរស់នៅក្នុងប្រទេស មានសភាពកាន់តែយ៉ាប់យ៉ឺនដោយសារជំងឺនេះ។

Pacquiao ពន្យល់ថា ៖«បើអ្នកជាអ្នកដឹកនាំ អ្នកត្រូវតែនាំមុខគេ។ អ្នកត្រូវតែដឹកនាំពួកគេ ហើយឱ្យពួកគេដឹងថា អ្នកនៅជាមួយពួកគេ។ ខ្ញុំកើតក្នុងគ្រួសារក្រីក្រ ខ្ញុំដឹងថាពួកគេមានអារម្មណ៍យ៉ាងណា»។

សមាជិកសព្រឹទ្ធសភាហ្វីលីពីន Pacquiao បានបរិច្ចាគ ៦០០ ០០០ ម៉ាស់ឱ្យអ្នកប្រយុទ្ធប្រឆាំងកូរ៉ូណាជួរមុខនៅហ្វីលីពីន ហើយបង្កើតក្រុមសហការជាមួយមហាសេដ្ឋី Jack Ma បរិច្ចាគឧបករណ៍ធ្វើតេស្ត VID-19 ចំនួន ៥០ ០០០។

អតីតអ្នកប្រដាល់ជើងឯកទម្ងន់ធ្ងន់ Pacquiao ក៏បានធ្វើការបង្ហាញខ្លួនជាសាធារណៈជាច្រើនលើកផងដែរ ដើម្បីបំផុសគំនិតកុំឱ្យប្រជាជនមានការភ័យខ្លាចខ្លាំង ចំពោះការគ្របដណ្ដប់ នៃ Covid-19 និងធ្វើយ៉ាងណាកុំឱ្យជំងឺនេះ ឆ្លងរីករាលដាលកាន់តែច្រើនទៀត។

Pacquiao បានចូលប្រឡូកក្នុងនយោបាយនៅឆ្នាំ ២០១០ ពេលលោកត្រូវបានគេបោះឆ្នោតជ្រើសតាំងជាតំណាងរាស្ត្រនៃខេត្ត Sarangani។ ឆ្នាំ២០១៦ លោកត្រូវបានបោះឆ្នោត ធ្វើជាសមាជិកព្រឹទ្ធសភារយៈពេល៦ឆ្នាំ៕

ប្រភព៖ Insider ប្រែសម្រួល៖ អ៊ុំ សុភក្តិ