ខ្សែ​ការពារ​ហុល្លង់ Matthijs de Lig និង​មិត្ត​ស្រី ​អាច​នឹង​​រស់នៅ និងលេង​ឱ្យ​ក្លឹប​សេះបង្កង់ Juventus ​រយៈ​ពេល​៥​ទៅ​១០​ឆ្នាំ ព្រោះ​តែ​ពួកគេលង់​ស្នេហ៍​ទីក្រុង Turin ប្រទេស​អ៊ីតាលី។ នេះ​បើ​យោង​តាម​សម្ដីលោក Keye Molenaar ឪពុក​របស់​នាង AnneKee មិត្ត​ស្រី De Ligt។

លោក Molenaar បញ្ជាក់​ថា ៖«ពួកគេ​ធ្លាក់​ក្នុង​អន្លង់ស្នេហ៍ Turin ដូច្នេះ​ពួកគេ​នឹង​នៅ​ទី​នេះ​ ៥​ឆ្នាំ ឬ​អាច​ដល់​១០​ឆ្នាំ»។

ចំណែក De Ligt ផ្ទាល់​ក៏​​បាន​សារភាព​ថា ទីក្រុង Turin ក៏​ជា​កន្លែង​ល្អ​មួយ ដែល​រូបគេត្រូវការរៀនសូត្រច្រើន និងត្រូវ​អភិវឌ្ឍ​ខ្លួន​ក្នុង​រយៈ​ពេល​វែង​ដូច​គ្នា។

ខ្សែ​ការពារ​វ័យ​ក្មេង De Ligt ត្រូវ​បាន Juve ប្រជែង​​​យក​នឹង​ជាមួយ​ក្លឹប Barcelona និង​ PSG ក្នុង​តម្លៃ​ ៨៤​លាន​ដុល្លារ​ពី​ក្លឹប Ajax កាល​ពី​រដូវ​ក្ដៅ​មុន។

គួរ​បញ្ជាក់​ផង​ដែរ​ថា បើ​ទោះ​កីឡាករ​ពីរ​រូប​ Daniele Rugani,  Blaise Matuidi និង​​ Dybala របស់ Juventus ត្រូវ​បាន​រក​ឃើញ​ថា​មាន​ផ្ទុក Covid-19 ក្ដី​ ប៉ុន្តែ De Ligt និងមិត្តស្រី មិន​មាន​ផ្ទុក​ជំងឺ​កាច​សាហាវ​នេះ​ឡើយ។ យ៉ាងណា​កីឡាករ Juventus ទាំងអស់ ត្រូវ​បាន​ដាក់​ដាច់​ដោយឡែក។

បច្ចុប្បន្ន អីតាលី មាន​អ្នកផ្ទុក​វីរុស​កូវីដ​១៩​ជាង​៥ម៉ឺន​នាក់ និង​មាន​អ្នក​ស្លាប់​ជាង ៥​ពាន់​នាក់​ទូទាំង​ប្រទេស អាក្រក់​ជាង​ប្រទេស​ចិន​ទៅ​ទៀត៕