- 2020-02-12 03:20:50
- បាល់ទាត់
មូលហេតុសំខាន់៣ Man City មិនអាចឈានដល់កម្រិតកំពូលដូចរដូវកាលមុន
- 2020-02-12 03:20:50
- ចំនួនមតិ 0 | ចំនួនចែករំលែក 0
មូលហេតុសំខាន់៣ Man City មិនអាចឈានដល់កម្រិតកំពូលដូចរដូវកាលមុន
ចន្លោះមិនឃើញ
Manchester City បានប៉ាវយកពាន Premier League ២រដូវកាលជាប់គ្នា ក្នុងនោះពួកគេកើបបានពិន្ទុសរុបទាំងពីរលើកចំនួន ១៩៨។
ក្រុមរហស្សនាមថាមេឃខៀវបំបែកកំណត់ត្រារកបាន១០០ពិន្ទុលើកដំបូងនៅលីគកំពូលអង់គ្លេសថែមទាំងលើកពានក្នុងស្រុកទាំងអស់នៅរដូវកាលតែមួយរួមមាន Premier League, FA Cup, League Cup គ្មានក្រុមណាធ្លាប់ធ្វើបានក្នុងប្រវត្តិសាស្ត្រ។
យ៉ាងណាក្រុមការពារតំណែងជើងឯកមកពីទីក្រុង Manchester ត្រូវធ្លាក់ទម្រង់លេងសឹងមិនគួរឲ្យជឿនៅរដូវកាលនេះ ត្បិតឈរលេខពីរប៉ុន្តែពួកគេចាញ់ប្រៀប Liverpool ដែលឈរកំពូលតារាងរហូត២២ពិន្ទុ។ មានមូលហេតុសំខាន់៣ដែលធ្វើឲ្យ City ថមថយដូច្នេះ៖
១. បញ្ហាខ្សែការពារ
Manchester City មិនអាចរកអ្នកជំនួសប្រធានក្រុម Vincent Kompany បានទេ ក្រោយខ្សែការពាររូបនេះចាកចេញទៅលេងក្នុងប្រទេសកំណើត។ Nicolas Otamendi និង John Stones លេងមិនស៊ីចង្វាក់គ្នាសោះនៅតំបន់កណ្ដាល ខណៈ Laporte បានអវត្តមានជាច្រើនប្រកួតដោយសាររបួសធ្វើឲ្យ Pep ទម្លាក់ Fernandinho ពីខ្សែបម្រើឲ្យមកចុះការពារវិញ។ City របូត២៩គ្រាប់នៅ Premier League រដូវកាលនេះ បើធៀបរដូវកាលមុនពួកគេរបូតតែ២៣គ្រាប់ប៉ុណ្ណោះពេញមួយរដូវកាល។
២. ការសម្រេចទីមិនល្អ
ជាការពិត City មានឱកាសច្រើនជាងគូប្រជែងសឹងគ្រប់ប្រកួតនីមួយៗ។ យ៉ាងណាការសម្រេចទីរបស់ក្រុមរហស្សនាម ពណ៌ផ្ទៃមេឃគឺមិនបានល្អសោះ និយាយស្រួលស្ដាប់គឺល្អមើល តែមិនល្អស៊ី។ គេអាចមើលការប្រកួតទល់នឹង Tottenham ជាឧទាហរណ៍ស្រាប់។ City មានឱកាសជាច្រើនប៉ុន្តែធ្វើមិនបានសម្រេច ខណៈ Spurs មានឱកាសតិចតែរកបាន២គ្រាប់។ នេះគេនៅមិនទាន់រាប់ការទាត់ប៉េណាល់ទីផង។ Raheem Sterling ស៊ុតមិនចូល២លើក, Gabriel Jesus ស៊ុតមិនចូល៤លើក សម្រាប់ការព្យាយាមទាត់៦ដង។
៣. មេរោគឈ្មោះថា "Liverpool”
មូលហេតុ២ខាងលើអាចយកជាការបាន ប៉ុន្តែបើមើលឲ្យល្អិតទៅ Manchester City មិនអន់ទេ គ្រាន់តែ Liverpool រដូវកាលនេះល្អខ្លាំងពេកទើបធ្វើឲ្យពួកគេពិបាកតាម។ ក្រុមលោក Pep ឈ្នះ១៦ ស្មើ៣ និងចាញ់៦ ជាស្ថិតិមួយមិនអន់ឡើយ ប៉ុន្តែ Liverpool វិញលេង២៥ ឈ្នះ២៤ ស្មើ១ និងមិនដែលចាញ់សោះ។ ការខ្លាំងហួសហេតុបែបនេះ វាជាបន្ទុកដ៏ធ្ងន់សម្រាប់ City ក្នុងការប្រជែងពាន Premier League វាប្រៀបបាននឹងមេរោគដែលពិបាករកថ្នាំព្យាបាល៕