អ្នកចាត់ការទូទៅ SRU Stadium បញ្ជាក់មូលហេតុរៀបចំ Siem Reap Super Asia Cup 2020

2020-01-13 08:02:11
បាល់ទាត់

2020-01-13 08:02:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបបាល់ទាត់ សៀមរាបយូណាយធីត សហការជាមួយ Bolabros និង Karki Jersi នឹងរៀបចំការប្រកួតបាល់ទាត់ពានរង្វាន់មិត្តភាពអន្តរជាតិ Siem Reap Super Asia Cup 2020 ដែលចាប់ផ្ដើមពីថ្ងៃព្រហស្បតិ៍ ទី២៣ ដល់ថ្ងៃទី២៦ ខែមករា នៅកីឡដ្ឋាន SRU ខេត្តសៀមរាប ដោយមានការចូលរួមពីក្លឹបអង្គរថាយហ្គឺរ, វិសាខា, Bhayangkara FC ពីឥណ្ឌូនេស៊ី និងក្លឹបម៉ាឡេស៊ី Petaling Jaya City FC។

ជាលទ្ធផលពីការចាប់គូកាលពីរសៀលថ្ងៃសុក្រ ទី១០ ខែមករា អង្គរថាយហ្គឺរ ត្រូវជួបជាមួយ Petaling Jaya City FC ថ្ងៃព្រហស្បតិ៍ ទី២៣ ខែមករា និង វិសាខា ប៉ះ Bhayangkara FC នៅថ្ងៃសុក្រ ទី២៤ ខែមករា។ ក្រុមឈ្នះនឹងឡើងប៉ះគ្នាយកជើងឯកនៅថ្ងៃអាទិត្យ ទី២៦ ខែមករា និងក្រុមចាញ់ជួបគ្នាយកលេខ៣នៅថ្ងៃសៅរ៍ទី២៥ ខែមករា។

លោក ប៊ួយ ដារី អ្នកចាត់ការទូទៅក្លឹបពាក់កណ្ដាលអាជីពសៀមរាបយូណាយធីត និងកីឡដ្ឋាន SRU ឲ្យដឹងថា Siem Reap Super Asia Cup បង្កើតឡើងដើម្បីសាកល្បងទីលាន និងការរៀបចំរបស់ខ្លួនក្នុងព្រឹត្តិការណ៍ធំបែបនេះ។ លោកសង្ឃឹមថា នឹងមានអ្នកគាំទ្រច្រើន ព្រោះមានការចូលរួមពីក្លឹបសម្បូរប្រជាប្រិយនានា ជាពិសេសអង្គរថាយហ្គឺរដែលមានប្រិយមិត្តយ៉ាងច្រើនសន្ធឹកសន្ធាប់នៅខេត្តសៀមរាប។

គួរដឹងដែរថា ការប្រកួតទាំងអស់នឹងប្រព្រឹត្តទៅនៅកីឡដ្ឋាន SRU វេលាម៉ោង៤ល្ងាចដូចគ្នា។ សំបុត្រចូលរួមទស្សនាមានតម្លៃ ៤០០០ រៀល សម្រាប់កន្លែងគ្មានដំបូល ហើយប្រសិនបើទិញសរុបសម្រាប់៤ប្រកួតតែម្ដង លោកអ្នកនឹងចំណាយត្រឹម១២០០០រៀលប៉ុណ្ណោះ។ ដោយឡែកសម្រាប់កន្លែងមានដំបូលវិញ តម្លៃ ១០០០០ រៀល ហើយក្នុងករណីទិញទុកទាំង៤ប្រកួតនឹងចំណាយត្រឹម៣០០០០ រៀល ប៉ុណ្ណោះ៕

អត្ថបទ៖ វ៉ាន់ សក្ដិ