កម្ពុជា ត្រៀមរៀបចំព្រឹត្តិការណ៍ប្រណាំងកង់លំដាប់ពិភពលោកលើកទី១ ចម្ងាយ ៤៦៧ គីឡូម៉ែត្រ ឆ្លងកាត់ខេត្តចំនួន៣

2019-11-25 03:28:31
កីឡាផ្សេងៗ

2019-11-25 03:28:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ប្រណាំងកង់លំដាប់ពិភពលោកដំបូងគេបង្អស់នៅកម្ពុជានឹងធ្វើឡើងនៅថ្ងៃទី ៤,៥,៦ ខែមករា ឆ្នាំ២០២០ ខាងមុខ គឺឆ្លងកាត់ខេត្តសក្ដានុពលផ្នែកទេសចរណ៍ធំៗ ចំនួន៣ គឺខេត្ត កំពត ខេត្ត កែប និងខេត្តកោះកុង។

ថ្លែងមកកាន់អ្នកសារព័ត៌មានកាលពីថ្ងៃទី២៣ ខែវិច្ឆិកា ឆ្នាំ២០១៩ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រាប់ពីគោលដៅ និងទិសដៅសំខាន់ៗក្នុងការរៀបចំព្រឹត្តិការណ៍កីឡានេះឡើងលោកថា«ទី១ គឺយើងបានផ្សព្វផ្សាយពីតំបន់ទេសចរណ៍ដែលកម្ពុជាជាប់សមាជិកក្លឹបឆ្នេរស្អាតជាងគេលោកពិភពលោក។ ទី២ យើងចង់បង្ហាញពីផលិតផលទេសចរណ៍និងកីឡាដែលជាឧស្សាហកម្មលោកពិភពលោក។ ទី៣ គឺយើងបានរួមចំណែកក្នុងការយុទ្ធនាការស៊ីហ្គេម២០២៣ ដែលកម្ពុជានឹងធ្វើជាម្ចាស់ផ្ទះ។ ទី៤ គឺការអភិវឌ្ឍន៍វិស័យកីឡាប្រណាំងកង់កម្រិតខ្ពស់របស់ក្រុមជម្រើសជាតិកម្ពុជា ពោលគឺផ្ដល់ឱកាសដល់កីឡាករកម្ពុជាដើម្បីស្វែងរកបទពិសោធន៍លំដាប់អន្តរជាតិ»។ ជាងនេះទៅទៀត លោកទទូចឲ្យប្រជាជនក៏ដូចជាអ្នកសារព័ត៌មានចូលផ្សព្វផ្សាយឲ្យកាន់តែទូលំទូលាយផងដែរ។

គួររំលឹកដែលថា បច្ចុប្បន្នមានអ្នកប្រណាំងកង់អាជីពលំដាប់ពិភពលោក១១ក្រុមហើយ បានចុះឈ្មោះចូលរួមក្រុមទាំងនោះមាន៖ ម៉ាឡេស៊ី(ក្រុមជើងឯកតំបន់អាស៊ី) ឥណ្ឌូណេស៊ី ព្រុយណេ ហ្វីលីពីន អូស្ត្រាលី ប៉ូឡូញ ហូឡង់ អាល្លឺម៉ង់ កូរ៉េ ក្រុមជម្រើសជាតិម៉ាឡេស៊ី និងក្រុមជម្រើសជាតិកម្ពុជា និង៨ក្រុមផ្សេងទៀតដែលកំពុងតែរង់ចាំការបញ្ជាក់បន្ថែមរួមមាន៖ ជប៉ុន ចិន(២ក្រុម) ហុងកុង ថៃ បារាំង អាមេរិក និង កាហ្សាក់ស្ថាន៕

អត្ថបទ៖ Yorn Sovieth