Aguero យល់ថា ក្នុងលីគអង់គ្លេស មានតែក្លឹបមួយនេះទេ ដែលអាចបង្អាក់ Man City បាន

2019-11-05 14:41:10
បាល់ទាត់

2019-11-05 14:41:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Sergio Aguero យល់ថាមានតែក្លឹប Liverpool ទេ ដែលអាចបង្អាក់ដំណើរ Manchester City បាន។

កីឡាករអាហ្សង់ទីន បាននិយាយប្រាប់សារព័ត៌មាន France Football អំពីស្ថានភាពរបស់ក្លឹបប្រកួតប្រជែងជាមួយ Manchester City។ Aguero យល់ថា ប៉ុន្មានឆ្នាំដែលខ្លួនមកលេងនៅអង់គ្លេស Manchester City បានប្រជែងពាន Premier League ជាមួយក្លឹបធំៗដូចជា Manchester United និង Chelsea ជាដើម។

ទោះជាយ៉ាងណា ខ្សែប្រយុទ្ធរូបនេះ បានបញ្ជាក់ថា ក្លឹប Liverpool តែងតែជាគូប្រជែងស្វិតស្វាញមួយ សម្រាប់ក្លឹបយក្សមេឃខៀវ។ Sergio Aguero បានលើកឡើងទៀតថា រយៈពេល ៤រដូវកាលចុងក្រោយ ក្លឹបហង្សក្រហមបានឡើងទម្រង់លេងយ៉ាងខ្លាំង ហើយបានក្លាយជាក្លឹបប្រជែងពានជាមួយ Manchester City។

កីឡាករអាហ្សង់ទីនថា៖ "Liverpool គឺជាក្លឹបតែមួយគត់ ដែលអាចបង្អាក់ពួកយើងបាន។ ពួកគេបានព្យាយាមប្រឹងប្រែងដណ្ដើមពានលីគជាច្រើនឆ្នាំមកហើយ។ រដូវកាលមុនពួកគេធ្វើមិនបានសម្រេច ដូច្នេះពួកគេមានការផ្ដោតអារម្មណ៍ខ្ពស់ណាស់សម្រាប់ប្រជែងដណ្ដើមពានលីគរដូវកាលនេះ"។

Liverpool នឹងបើកទ្វារស្វាគមន៍ Manchester City ក្នុងប្រកួត Premier League នាចុងសប្ដាហ៍នេះ។ ក្លឹបហង្សក្រហមកំពុងឈរលេខ ១ ក្នុងតារាងលីគ ដោយនាំមុខក្លឹបយក្សមេឃខៀវចំនួន ៦ ពិន្ទុ៕

ប្រភព៖ Independent ប្រែសម្រួល៖ ហ៊ីម រស្មី