Henry ៖ ឆ្នាំសូន្យនៅ Arsenal ពេលនេះកាលពី២០ឆ្នាំមុន ពីគ្រោះក្លាយជាលាភ

2019-08-04 00:02:00
បាល់ទាត់

2019-08-04 00:02:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលនេះកាលពី២០ឆ្នាំមុន Thierry Henry បានចាប់ផ្តើមដំបូងនៅ Arsenal ។ វាគឺមិនងាយស្រួលឡើយ ហើយ Henry ដែលកាលណោះមានវ័យ២២ឆ្នាំស្ទើរតែបោះបង់ដំណែងខ្សែប្រយុទ្ធ។

ឆ្នាំសូន្យ គឺជាពេលដែល Henry បានចាប់ផ្តើមនៅ Arsenal នៅរដូលកាល ១៩៩៩/២០០០ ហើយដំណើររឿងគឺវាយ៉ាងដូច្នេះ៖

ព្រឹកមួយកាលពី២០ឆ្នាំមុន កីឡាករបារាំងបានដើរសំដៅទៅការិយាល័យ Arsen Wenger ដើម្បីប្រាប់គ្រូបង្វឹកថាគាត់មិនចង់ធ្វើជាខ្សែប្រយុទ្ធទេ។

នេះមកពី Henry គ្មានជំនឿចិត្តគ្រប់គ្រាន់ថាអាចធ្វើជាខ្សែប្រយុទ្ធបាន ព្រោះគេធ្លាប់តែលេងជាខ្សែបម្រើស្លាប ដំណែងដែលគេជោគជ័យនៅអតីតក្លឹប Monaco ជោគជ័យ World Cup សម្រាប់ជម្រើសជាតិបារាំង ១៩៩៨ និង ខ្សែបម្រើនេះបានក្លាយជា top scorer នៅ Juventus។

ប៉ុន្តែ Henry បានផ្លាស់ប្តូរចិត្តនៅពេលដែលគាត់បានទៅដល់ទីលានហ្វឹកហាត់ ហើយគាត់បានប្រាប់ខ្លួនឯងថា "សាកម្តងមើល" សាកធ្វើខ្សែប្រយុទ្ធមើល។

Henry រងថ្មបាក់ក្រោយ Arsenal ខ្វះខ្សែប្រយុទ្ធ

Wenger បានចុះហត្ថលេខានាំយក Henry ដើម្បីជំនួសខ្សែប្រយុទ្ធ Nicolas Anelka។ Anelka ដែល Wenger បាននាំយកមកពីក្លឹប Paris St Germain ជាមួយតម្លៃត្រឹមតែ ៥០ ម៉ឺនផោន (ប្រហែល ៧០ ម៉ឺនដុល្លារ)។ ២ឆ្នាំក្រោយមក គ្រូបង្វឹកមានសញ្ញាប័ត្រអនុបណ្ឌិតសេដ្ឋកិច្ចមួយនេះ បានលក់ Anelka ទៅឲ្យ Real Madrid ក្នុងតម្លៃ ជាង ៣១ លានដុល្លារ កាលពីឆ្នាំ ២០០០ ហើយវាគឺជាតម្លៃខ្ពស់បំផុតមួយក្នុងជំនាន់នោះ។

Wenger បានប្រាប់ Henry វ័យក្មេងថា "អ្នកបានខ្ជះខ្ជាយពេលវេលាជាច្រើនលេងនៅស្លាប។ អ្នកគឺជាកីឡាករពាក់លេខ៩"។

ដូចដែល Henry គិតគឺថាគាត់គ្មានបទពិសោធន៍លេងជាខ្សែប្រយុទ្ធឡើយ។ ជាលទ្ធផលបង្ហាញថា Henry រកបានតែ២គ្រាប់ប៉ុណ្ណោះក្នុងចំណោម១៧ប្រកួតដំបូង។

នៅខាងក្រៅគាត់ហាក់បង្ហាញពីភាពអត់ធ្មត់ ប៉ុន្តែបន្ទាប់ពីស៊ុតបាន១គ្រាប់ជួយ Arsenal ឈ្នះ AIK Solna ៣-១ នៅវគ្គជម្រុះ Champions League ខ្សែប្រយុទ្ធរូបនោះបន្តគ្មានគ្រាប់បាល់៧ប្រកួតជាប់ៗគ្នាទៀត។

Henry រំលឹកថា "ខ្ញុំគិតថា គ្រូចង់ឲ្យខ្ញុំលេងប្រយុទ្ធកណ្តាល។ មិនអីទេ ប៉ុន្តែវាមានន័យថាខ្ញុំត្រូវការពេលវេលាបន្ថែមទៀតដើម្បីរៀនពីរបៀបរត់ ដែលខុសគ្នាទាំងស្រុងពីរៀបលេងរបស់ខ្ញុំពីមុន។ វាត្រូវការពេលបន្ថែមទៀត"។

Henry ពីគ្រោះក្លាយជាលាភ

បើករដូវកាល ១៩៩៩/២០០០ របស់ Henry ដំណើរការទៅដោយភាពអស់សង្ឃឹម។ ប៉ុន្តែ Henry ក៏ចាប់ផ្ដើមផ្លាស់ប្ដូរឡើងវិញនៅពេល Wenger ដាក់ឲ្យកីឡាករបារាំងវ័យក្មេងលេងជាមួយមិត្តរួមក្រុម ខ្សែបម្រើហូឡង់ Dennis Bergkamp ជាលើកដំបូង។

ចាប់ពីពេលនោះមក គ្មាននរណាចាប់អារម្មណ៍ពីការប្រកួតរបស់ Anelka ដែលកំពុងលេចធ្លោនៅ Real នាសម័យនោះទៀតទេ។ នៅខែមករា ឆ្នាំ២០០០ Henry បានស៊ុត២គ្រាប់ជួយ Arsenal ឈ្នះ ៤-១ លើ Sunderland ក្រោយមកស៊ុតក្បាច់ half-volley លើក្រុម Bradford និងបន្ទាប់មក Henry រកបាន៨ គ្រាប់ក្នុងចំណោម ១០ ប្រកួត។

ហើយចាប់ពីពេលនោះមក Henry បានក្លាយទៅជាកំពូលកីឡាករដ៏ឆ្នើមបំផុតក្នុងប្រវត្តិសាស្ត្របាល់ទាត់នាដើមសតវត្សទី២១។

អ្វីដែលគេមិនអាចបំភ្លេចបានពីកីឡាករបារាំងរូបនេះទៀតនោះគឺ Henry គឺជាកំពូលកីឡាករដែលនៅតែមានទម្លាប់ប្រើប្រាស់មធ្យោបាយសាធារណៈធ្វើដំណើរទៅមកពីផ្ទះទៅទីលានហ្វឹកហាត់របស់ Arsenal៕

អាន៖ Salah នឹងក្លាយជាកីឡាករដែលមានប្រាក់ខែច្រើនបំផុតនៅ Premier League ជាមួយកុងត្រាថ្មី

អាន៖ មកមើលលទ្ធភាព និង តំណែងដែល Griezmann អាចឈរជើងនៅ Barcelona

ប្រភព៖ Four Four Two ប្រែសម្រួល៖ សុខ លាងហ៊ត