អតីតខ្សែប្រយុទ្ធក្លឹប Brighton ម្នាក់ក្លាយជាមេធាវី ព្រោះអាជីពបាល់ទាត់មិនជោគជ័យ

2019-07-13 02:00:00
បាល់ទាត់

2019-07-13 02:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីគ្រាប់បាល់ស៊ុតចូលលឿនបំផុតក្នុងប្រវត្តិសាស្ត្របាល់ទាត់ Maheta Molango ក៏មានឈ្មោះនៅក្នុងបញ្ជីនោះដែរ។

Maheta Molango គឺជាកីឡាកររកគ្រាប់បានលឿនបំផុតលំដាប់ទី២ ដោយចំណាយពេលត្រឹម ១២វិនាទី ស៊ុតឲ្យក្រុម Brighton ទល់នឹង Reading កាលពីឆ្នាំ ២០០៤។

Molango បានចុះកុងត្រារយៈពេល៣ឆ្នាំជាមួយ Brighton & Hove Albion ពីឆ្នាំ ២០០៤-០៧។ កាលណោះ Brighton លេងនៅលីគលំដាប់ទី២របស់អង់គ្លេសនៅឡើយ។ ប៉ុន្តែអតីតយុវជន Atletico Madrid លេងឲ្យ Brighton បានតែ១រដូវកាលប៉ុណ្ណោះ ក៏ត្រូវក្លឹបដាក់ឲ្យខ្ចីជើងរយៈពេលវែងរហូតដល់ចប់កុងត្រា។

Molango ផ្តើមទៅលេងទៅក្លឹបនានានៅលីគ League Two និង Tercera Division សុទ្ធសឹងជាលីគលំដាប់ទាបកម្រិតទី៤ របស់អង់គ្លេស និង អេស្ប៉ាញ ដូចជា៖ ទៅលេងឲ្យក្លឹប Lincoln City (២០០៥-០៦) ក្លឹប UB Conquense នៅអេស្ប៉ាញ (២០០៦) និង ចុងក្រោយត្រលប់ទៅលេងនៅក្លឹប Grays Athletic នៅអង់គ្លេសវិញ មុនពេលដែលលោកផ្អាកការងារពីវិស័យបាល់ទាត់ទៅប្រឡូកក្នុងវិស័យច្បាប់វិញម្តង។

អតីតខ្សែប្រយុទ្ធ Brighton រូបនេះចូលលេងបាន ៣៣ ប្រកួត និង ទាត់ចូលតែ ៣គ្រាប់ប៉ុណ្ណោះគិតចាប់តាំងពីឆ្នាំ ២០០៤-០៧។

ពីកីឡាករបាល់ទាត់ ក្លាយទៅជាមេធាវី

ដោយMolango មានបរិញ្ញាបត្រ២ គឺបរិញ្ញាបត្រផ្នែកច្បាប់ និង បរិញ្ញាបត្រផ្នែកវិទ្យាសាស្ត្រនយោបាយពីសាកលវិទ្យាល័យ Charles III ពីទីក្រុងម៉ាឌ្រីដ ក្រោយលោកចាកចេញពីក្លឹបបាល់ទាត់ លោកបានទៅធ្វើការនៅការិយាល័យមេធាវីមួយកន្លែងនៅប្រទេសអេស្ប៉ាញក្នុងឆ្នាំ២០០៧។

នៅឆ្នាំ ២០០៨ អតីតកីឡាករនៅលីគអង់គ្លេសរូបនេះបានបន្តយកអនុបណ្ឌិតផ្នែកច្បាប់ពីសាកលវិទ្យាល័យនៅទីក្រុងវ៉ាស៊ីនតោន។

បន្ទាប់ពីចប់ការសិក្សា លោកបានត្រលប់មកអេស្ប៉ាញវិញធ្វើការនៅការិយាល័យមេធាវីដដែល ប៉ុន្តែលោកឆ្លៀតធ្វើជាកីឡាករបាល់ទាត់ក្រៅម៉ោងឲ្យក្លឹប FC Villanueva del Pardillo រវាងឆ្នាំ ២០១០។

បច្ចុប្បន្ន Molango គឺជានាយកប្រតិបត្តិរបស់ Segunda Division ដែលជាលីគលំដាប់ទី២នៅអេស្ប៉ាញ។ ក្រៅពីតួនាទីជាប្រធានគ្រប់គ្រងលីគ លោកក៏ជានាយកប្រតិបត្តិរបស់ក្លឹបបាល់ទាត់ Real Club Deportivo Malloca ស្ថិតនៅលីគលំដាប់ទី២របស់អេស្ប៉ាញផងដែរ៕