- 2019-05-21 03:00:41
- ប្រវត្តិ
បាត់មុខយូរ ផៃ ប៊ុនជឿ តាមពិតទៅធ្វើការនៅថៃ តែចង់ធ្វើការប្រដាល់ដែរ
- 2019-05-21 03:00:41
- ចំនួនមតិ 0 | ចំនួនចែករំលែក 0
បាត់មុខយូរ ផៃ ប៊ុនជឿ តាមពិតទៅធ្វើការនៅថៃ តែចង់ធ្វើការប្រដាល់ដែរ
ចន្លោះមិនឃើញ
អតីតជើងខ្លាំងប្រដាល់គុនខ្មែរ ផៃ ប៊ុនជឿ ត្រូវបានអ្នកគាំទ្រកីឡាប្រដាល់សម័យមុនពេញចិត្តយ៉ាងខ្លាំង និងស្ថិតនៅក្នុងចិត្តអ្នកគាំទ្រប្រដាល់រហូតអំពីសមត្ថភាពកម្រិតខ្ពស់របស់គាត់។ អតីតកីឡាករប្រដាល់រូបនេះពូកែទាត់បំផុតដែលពេលខ្លះគេហៅថា អ្នកលេងរន្ទៈជើងគុនខ្មែរ។
យ៉ាងណា ក្រោយពេលឈប់ពីប្រដាល់ប្រហែលជា១០ឆ្នាំកន្លងទៅនេះ អ្នកគាំទ្របាត់ដំណឹងសូន្យអំពីខ្សែជីវិតរបស់លោក ផៃ ប៊ុនជឿ។ គេមិនដឹងថា លោកកំពុងធ្វើការអ្វី? រស់នៅកន្លែងណា ហើយមិចមិនឃើញចូលរួមក្នុងសកម្មភាពកីឡាប្រដាល់?
Sabay បានសាកសួរតាមរយៈ Facebook ព្រឹកថ្ងៃទី២១ ខែឧសភានេះ អតីតជើងខ្លាំង ផៃ ប៊ុនជឿបានឆ្លើយតបថា លោកសុខសប្បាយធម្មតាទេ។ លោកកំពុងរស់នៅខេត្តបន្ទាយមានជ័យ និងមិនមានការងារអ្វីធំដុំឡើយ។ ភាគច្រើនលោកទៅធ្វើជាកម្មករនៅប្រទេសថៃ។
លោកបានបន្តថា តាមពិតលោកក៏ចង់ធ្វើការងារពាក់ព័ន្ធនឹងកីឡាប្រដាល់ដែរ ប៉ុន្តែមិនដឹងរកវិធីណាដើម្បីបានធ្វើការងារពាក់ព័ន្ធនឹងប្រដាល់។ ពេលសួរថា ហេតុអ្វីបានជាលោកមិនបើកក្លឹបបង្ហាត់ប្រដាល់ដល់ក្មេងៗ? លោកបានឆ្លើយថា លោកក៏ចង់បើកក្លឹបជួយបង្ហាត់ដល់ក្មេងៗជំនាន់ក្រោយដែរ ប៉ុន្តែលោកគ្មានលុយឡើយ។
លោក មាស សុខគ្រី បង្វឹកប្រដាល់បានឲ្យដឹងថា ផៃ ប៊ុនជឿ បានហ្វឹកហាត់ជាមួយលោកនៅក្លឹបសមាគមកីឡាប្រដាល់ក្រសួងមហាផ្ទៃ។ ភាគច្រើនគាត់ហ្វឹកហាត់ជាមួយ គ្រាក់ សម្ពស្សដែលអ្នកទាំងពីរជាកីឡាករពូកែទាត់ដូចគ្នា។
ផៃ ប៊ុនជឿ មានដៃគូប្រកួតដ៏គួរឲ្យចាប់អារម្មណ៍បំផុតគឺ ឡឹក វិបុល ដែលភាគច្រើនប្រកួតនៅសង្វៀនប៉ុស្តិ៍លេខ៥។ អ្នកទាំងពីរនេះវ៉ៃគ្នាច្រើនដង ហើយមានឈ្នះ មានចាញ់ដូចគ្នា។ ចំណែក ឡៅ ស៊ីណាត ដែលជាអាជ្ញាកណ្តាលបច្ចុប្បន្នក៏ធ្លាប់សន្លប់ក្រោមកណ្តាប់ដៃរបស់ ប៊ុនជឿ ដែរដែលពេលនោះ ស៊ីណាត អាយុមិនទាន់២០ឆ្នាំផង ខណៈប៊ុនជឿជារៀមច្បងល្បីឈ្មោះរួចទៅហើយ៕
