- 2019-05-04 06:01:05
- កីឡាផ្សេងៗ
គ្រូហែលទឹកសិង្ហបុរី សរសើរសិក្ខាកាមខ្មែរខិតខំរៀនសូត្រ និងយកចិត្តទុកដាក់
- 2019-05-04 06:01:05
- ចំនួនមតិ 0 | ចំនួនចែករំលែក 0
គ្រូហែលទឹកសិង្ហបុរី សរសើរសិក្ខាកាមខ្មែរខិតខំរៀនសូត្រ និងយកចិត្តទុកដាក់
ចន្លោះមិនឃើញ
គ្រូជំនាញមកពីសិង្ហបុរី និងជាគ្រូឧបទេសវគ្គបណ្ដុះបណ្ដាលមន្ត្រីគណៈកម្មការបច្ចេកទេសកីឡាហែលទឹកថ្នាក់ជាតិរយៈ៤ថ្ងៃនេះ សរសើរសិក្ខាកាមកម្ពុជាដែលចូលរួមមានការខិតខំរៀនសូត្រ យកចិត្តទុកដាក់។
លោក Ang Peng Wee គ្រូឧបទេសវគ្គបណ្ដុះបណ្ដាលមន្ត្រីគណៈកម្មការបច្ចេកទេសកីឡាហែលទឹកថ្នាក់ជាតិ បានឲ្យដឹងថា សូមថ្លែងអំណរគុណដល់សិក្ខាកាម មន្ត្រីបច្ចេកទេសទាំងអស់របស់សហព័ន្ធ ដែលចំណាយពេលសិក្សា និងសម្រួចសមត្ថភាពរបស់ខ្លួនឲ្យកាន់តែរីកចម្រើនជាងនេះទៅទៀត។ នេះជាការត្រៀមខ្លួនបានល្អសម្រាប់មន្ត្រីបច្ចេកទេស ដើម្បីរៀបចំការប្រកួតជ្រើសរើសជើងឯកយុវជនអាស៊ីអាគ្នេយ៍លើកទី៤៣ ខាងមុខនេះ រួមទាំងព្រឹត្តិការណ៍ស៊ីហ្គេមឆ្នាំ២០២៣ ពេលកម្ពុជាធ្វើម្ចាស់ផ្ទះថែមទៀតផង។
អ្នកជំនាញវ័យ៥៥ឆ្នាំរូបនេះបន្ថែមទៀតថា លោកពិតជាសប្បាយរីករាយណាស់ដែលបានមកជួយបង្ហាត់បង្រៀនក៏ដូចជាចែករំលែកបទពិសោធដល់សិក្ខាកាមកម្ពុជាឲ្យរឹតតែមានសមត្ថភាពខ្ពស់ជាងនេះ។ លោកមើលឃើញថាវគ្គសិក្សានេះ គឺរៀបចំបានល្អមែនទែនពីសំណាក់អគ្គលេខាធិការសហព័ន្ធខ្មែរកីឡាហែលទឹក វាខុសពីវគ្គសិក្សានៅប្រទេសផ្សេងៗដោយគ្រាន់តែធ្វើបន្តិចបន្តួចតាមអាងហែលទឹកប៉ុណ្ណោះ។
តាមរយៈការសិក្សា និងអនុវត្តផ្ទាល់ប៉ុន្មានថ្ងៃនេះ លោកជឿជាក់ថាសិក្ខាកាមចូលរួមទាំងអស់នេះមានសមត្ថភាព និងអាចធ្វើការរៀបចំការប្រកួតបានហើយ ព្រោះជាក់ស្ដែងឃើញថាអាចចាប់កំហុសឆ្គងរបស់កីឡាករបានច្រើន។ សិក្ខាកាមចេះកែប្រែរាល់កំហុសរបស់ខ្លួនអនុវត្តខុស យ៉ាងរីករាយ និងយកចិត្តទុកដាក់បន្ទាប់ពីលោកបានប្រាប់ ឬកែប្រែនៅពេលសិក្សាកន្លងទៅនេះ។
រំលឹកដែរថា វគ្គបណ្ដុះបណ្ដាលមន្ត្រីគណៈកម្មការបច្ចេកទេសកីឡាហែលទឹកថ្នាក់ជាតិនេះធ្វើឡើងរយៈពេល៤ថ្ងៃគឺចាប់ពីថ្ងៃពុធ ទី១ ដល់ទី៤ ខែឧសភា ២០១៩។ សម្រាប់គ្រូឧបទេសវិញគឺលោក Ang Peng Wee មកពីប្រទេសសិង្ហបុរី និងជាអ្នកជំនាញតំណាងមកពីសហព័ន្ធហែលទឹកអាស៊ីអាគ្នេយ៍។ សិក្ខាកាមចូលរួមសរុប៥៦នាក់៕
