មកដឹងរឿងបុរសខ្មែរម្នាក់ ជិះកង់ឆ្លង ៥ប្រទេស បានជោគជ័យមិនដូចការគិត

2019-05-03 23:04:00
កីឡាផ្សេងៗ

2019-05-03 23:04:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ចន ខារីន បានបង្កើតកំណត់ត្រាផ្ទាល់ខ្លួនមួយក្នុងការជិះកង់ឆ្លងកាត់៥ប្រទេសគឺកម្ពុជា ឡាវ ថៃ ម៉ាឡេស៊ី និងចុងក្រោយសិង្ហបុរីដែលត្រូវពេល២៥ថ្ងៃទើបឆ្លងផុត២២ដំណាក់ចម្ងាយ៣០០០គីឡូម៉ែត្រទើបសម្រេចគោលដៅ។

លោក ចន ខារីន ផ្តល់បទសម្ភាសន៍

បុរសវ័យ៣៧ឆ្នាំបានរៀបរាប់ថា គម្រោងជិះកង់ឆ្លងកាត់៥ប្រទេសនេះកើតចេញពីគំនិតផ្ទាល់ខ្លួនរបស់លោកដើម្បីបង្កើតកំណត់ត្រាផ្ទាល់ខ្លួនប៉ុណ្ណោះ។ លោកមិនបានសហការជាមួយអាជ្ញាធរគ្រប់តំបន់ឆ្លងកាត់ពីប្រទេសមួយទៅប្រទេសមួយឡើយ។

ក្រុមជិះកង់ Sun Bike ផ្តល់ពានជាកំណត់ត្រា

ដើម្បីសម្រេចគោលដៅនេះ លោកបានកំណត់ផែនការសំខាន់ៗដូចខាងក្រោម៖

ទី១៖ ពេលវេលា

ពេលវេលាជាកត្តាសំខាន់បំផុតក្នុងការសម្រេចជិះកង់ផ្លូវឆ្ងាយ។ សួរខ្លួនឯងថា បើអ្នកចង់ជិះកង់ផ្លូវឆ្ងាយ តើអ្នកមានពេលវេលាគ្រប់គ្រាន់សម្រាប់ធ្វើដំណើរតាមផែនការកំណត់ទេ? ពេលវេលាជាតម្រូវការចាំបាច់ទី១។ តាមផែនការ លោកត្រូវមានពេល២៣ថ្ងៃទើបឆ្លងកាត់២២ដំណាក់ក្នុងចំណោម៥ប្រទេស ប៉ុន្តែត្រូវមានពេលវេលាបន្ថែមទៀតដើម្បីត្រៀមសម្រាប់កិច្ចការចាំបាច់។ ដូច្នេះលោកបានត្រៀម៣០ថ្ងៃសម្រាប់ធ្វើដំណើរនេះ ហើយបានចំណាយពេល២៥ថ្ងៃបានបញ្ចប់ចម្ងាយ៣០០០គីឡូម៉ែត្រដោយជោគជ័យ។

ទី២៖ យល់ច្បាស់ពីផែនទីធ្វើដំណើរ

លោកបានចេញដំណើរពីភ្នំពេញទៅខេត្តស្ទឹងត្រែងឆ្លងចូលប្រទេសឡាវ ឆ្លងទៅប្រទេសថៃ ហើយបន្តទៅប្រទេសម៉ាឡេស៊ី និងបញ្ចប់គោលដៅចុងក្រោយប្រទេសសិង្ហបុរី។ លោកបានពិនិត្យមើលផែនទីនៃផ្លូវធ្វើដំណើរពីដំណាក់កាលមួយទៅដំណាក់កាលមួយដែលសរុបទាំងអស់មាន២២ដំណាក់កាលស្មើនឹងចម្ងាយ៣០០០គីឡូម៉ែត្រ។ លោកបានត្រឡប់ពីប្រទេសសិង្ហបុរីមកខ្មែរវិញតាមជើងយន្តហោះ។

ទី៣៖ ឯកសារចាំបាច់

ការធ្វើដំណើរឆ្លងកាត់ប្រទេសបែបនេះត្រូវមានលិខិតឆ្លងដែនជាចាំបាច់។ មុនពេលធ្វើដំណើរត្រូវកំណត់ពេលវេលាច្បាស់លាស់ថាតើ ត្រូវប្រើពេលប៉ុន្មានថ្ងៃទើបឆ្លងកាត់ប្រទេសនីមួយៗស្របតាមផែនទី ហើយកំណត់គោលដៅស្នាក់នៅច្បាស់លាស់ដើម្បីបំពេញឯកសារឆ្លងដែន។

ទី៤៖ សម្ភារៈជាប់ខ្លួន

ឧបករណ៍សម្រាប់ជួលជុលកង់ ប្រសិនបើកងមានបញ្ហាតាមផ្លូវ តង់សម្រាប់ដេក និងសំលៀកបំពាក់ដែលសរុបទាំងអស់ទម្ងន់ប្រហែលជា១០គីឡូក្រាម ព្រមទាំងប្រាក់សម្រាប់ចាយ។ ចាប់តាំងពីចេញដំណើររហូតដល់សិង្ហបុរី និងត្រឡប់ភ្នំពេញវិញ លោកចាយសន្សំសំចៃ ដូច្នេះអស់ចន្លោះ១០០០ ទៅ១២០០ដុល្លារអាមេរិក។

សូមទស្សនាវីដេអូ លោក ចន ខារីន រៀបរាប់ពីការជិះ

សារសំខាន់របស់បុរសដើមកំណើតភ្នំពេញរូបនេះគឺថា ស្ទើរគ្រប់គ្នាបារម្ភរឿងបញ្ហាលំបាកខ្លាំង សូម្បីតែរូបលោកផ្ទាល់ក៏បារម្ភដែរមុនពេលចេញដំណើរ ប៉ុន្តែពេលធ្វើដំណើរទើបដឹងថា ងាយស្រួលហួសពីអ្វីដែលគិត។

ផ្លូវគ្មានអ្វីជាបញ្ហាធំ ៖ ផ្លូវនៅកម្ពុជាមិនមានបញ្ហាទេអាចជិះបាន។ ផ្លូវនៅប្រទេសឡាវ ថៃ ធំទូលាយស្រួលជិះ ប៉ុន្តែនៅម៉ាឡេស៊ីពិបាកជាងប្រទេសផ្សេងៗដោយសារមហាវិថីមិនមានគំនូសសម្រាប់កង់ ដូច្នេះពេលខ្លះត្រូវជិះផ្លូវផ្សេង។

ឆ្លងដែនកាន់តែស្រួល ៖ ពេលឆ្លងដែនពីប្រទេសមួយទៅប្រទេសមួយកាន់តែស្រួល។ គ្រាន់តែប្រាប់គេថា ជិះកង់ទេសចរណ៍ពីកម្ពុជា សមត្ថកិច្ចព្រំដែនបានជួយលើកទឹកចិត្ត និងលើកមេដាយជាសញ្ញាគាំទ្រ។

អាហារ ៖ អាហារក៏គ្មានបញ្ហាអ្វីចោទដែរ ប៉ុន្តែរឹតតែល្អសម្រាប់លោកដែលបានទទួលទានអាហារតាមតំបន់ដែលឆ្លងកាត់។ សម្រាប់ទឹក ឬភេសជ្ជៈវិញគឺមានតែប្រទេសម៉ាឡេស៊ីមួយប៉ុណ្ណោះដែលពិបាកខ្លះៗ ដោយសារផ្លូវខ្លះមិនសូវមាន Mini Mart ឬស្ថានីយប្រេង ប៉ុន្តែប្រទេស៤ផ្សេងទៀតគ្មានបញ្ហាចោទទេ។

លោក ចន ខារីនសង្កត់ធ្ងន់ថា បញ្ហាលំបាកបំផុតគឺពេលវេលា។ តើអ្នកមានពេលវេលាគ្រប់គ្រាន់ទេសម្រាប់ធ្វើដំណើរផ្លូវឆ្ងាយ ច្រើនថ្ងៃ ឆ្លងប្រទេស? ក្រៅពីនោះគ្មានលំបាកទេឲ្យតែមានលុយសម្រាប់ចំណាយ និងតាំងចិត្តធ្វើដំណើរ។ អ្វីដែលជំរុញឲ្យលោកសម្រេចគោលដៅនេះគឺមានពេលវេលាគ្រប់គ្រាប់ ការប្ដេជ្ញាចិត្តខ្លួនឯង ទទួលបានការលើកទឹកចិត្តពីមិត្តភក្តិលើ Facebook និងមន្ត្រីព្រំដែន។

សម្រាប់ការធ្វើដំណើរនេះដំបូងឡើយ លោកមានគ្នា២នាក់ ប៉ុន្តែពេលទៅដល់ប្រទេសថៃ ដៃគូម្នាក់ដែលមានវ័យចំណាស់បានវិលត្រឡប់មកខ្មែរវិញ ដូច្នេះមានតែលោកម្នាក់ឯងបន្តដំណើរទៅមុខរហូតដល់គោលដៅ៕