ចាន់ រតនា កត់ចំណាំក្បាច់ពិសេសរបស់ Rudy Agutian មុនជួបគ្នាដើមខែក្រោយ

2019-04-19 04:30:14
ប្រដាល់

2019-04-19 04:30:14
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងក្បាច់គុនចម្រុះមានឈ្មោះបោះសំឡេងនៅកម្ពុជា ចាន់ រតនា បានកត់ចំណាំចំណុចពិសេសមួយចំនួនអំពី គូបដិបក្ខកីឡាករម្ចាស់ផ្ទះ Rudy Agutian ដែលត្រូវជួបគ្នានៅសង្វៀន ONE: FOR HONOR នៅថ្ងៃទី ៣ ខែ ឧសភា ឆ្នាំ ២០១៩ ខាងមុខនៅប្រទេស ឥណ្ឌូណេស៊ី។

ចាន់ រតនា លើកឡើងពីចំណុចពិសេសគូប្រជែងបែបនេះ ៖«ខ្ញុំបានតាមដានវីដេអូ Rudy Agutian ជាច្រើន ហើយយល់ឃើញថា គាត់មានកម្លាំងខ្លាំងណាស់ រួមទាំងវីដេអូ កាច់ផ្ដួល ខុន ស៊ីចាន់ ត្រឹម ១ ទឹកប៉ុណ្ណោះ។ ក្រៅពីកម្លាំង ឬ ស៊ុហ្វ របស់គាត់ខ្លាំង ខ្ញុំមិនញញើតចំពោះបច្ចេកទេសរបស់គាត់ទេ។ ប៉ុន្តែខ្ញុំបានដឹងថា គាត់មានពិសោធន៍វ៉ៃនៅសង្វៀន One Championship ចំនួន ៣ ដងចុងក្រោយមិនដែលចាញ់ទេ។ ហើយប្រកួតចុងក្រោយទល់នឹងកីឡាករកម្ពុជា ខុន ស៊ីចាន់ គេក៏ឈ្នះដែរនៅ សិង្ហបុរី កាលខែ កុម្ភៈ។ ខ្ញុំផ្ដោតលើការការពារកម្លាំងបុករបស់គាត់ជាជាងក្បាច់របស់គាត់»។

កីឡាករ ចាន់ រតនា

កីឡាករវ័យ ៣៣ ឆ្នាំរូបនេះកំពុងដុតដៃដុតជើង ហ្វឹកហាត់យ៉ាងខ្លាំងក្លារយៈពេលជាង ១ ខែមកនេះជាប្រចាំ ដើម្បីត្រៀមប្រកួតទល់នឹងជើងខ្លាំងរបស់ ឥណ្ឌូណេស៊ី។ រតនា មិនបាននាំគ្រួសារទៅដើរលេងនៅទីណាទេ ជាពិសេសអំឡុងពេលចូលឆ្នាំថ្មីប្រពៃណីជាតិ ក៏ត្រូវសំងំហ្វឹកហាត់ស៊ុហ្វដែរ ពោលគឺខ្លាចចាញ់កម្លាំង Rudy ដែលភាគច្រើនគេផ្ដួលគូប្រកួតដោយប្រើក្បាច់គាប និងឃ្លេខ្លាំងមហាសាល។ ទោះជាបែបណាក្ដី ម្ចាស់ក្លឹបប្រដាល់សិល្បៈមិនហ៊ានកំណត់ថា ប្រើក្បាច់បែបណាដើម្បីស៊ី Rudy ក្នុងគោលដៅសងសឹកឲ្យមិត្តរួមជាតិ ខុន ស៊ីចាន់ ទេ ប៉ុន្តែផ្ដោតលើក្បាច់ណាអាចយកឈ្នះបាន និង មើលតាមកាលៈទេសៈ នៅលើសង្វៀនរួមនឹងបច្ចេកទេសវ៉ៃព្រមគ្នា។ គ្រូបង្វឹកប្រចាំក្លិបសិល្បៈ សង្កត់ធ្ងន់ថា ៖«រឿងសំខាន់ គឺ ចេះការពារដើម្បីកុំឲ្យចូលក្បាច់ឃ្លេ និង កម្លាំងគាបខ្លាំងរបស់គេ។» ទោះជាការប្រកួតលំដាប់អន្តរជាតិកាន់តែខិតជិតមកដល់ អ្នកលេងក្បាច់គុនយុទ្ធក្រមខម និង គុនខ្មែរដដែលនេះមិនបានចេញទៅហ្វឹកហាត់នៅបរទេសដូចជា ថៃ ឬ មីយ៉ាន់ម៉ា នោះឡើយពោលហ្វឹកហាត់នៅក្នុងស្រុកតែប៉ុណ្ណោះ និង ឆ្លៀតឱកាសមើលថែក្លិបប្រដាល់របស់ខ្លួនផង។ ប្រសិនបើមានការប្រកួតលើកក្រោយ និង ពេលវេលាសមរម្យណាមួយនោះ កីឡាករជួរមុខក្បាច់គុនចម្រុះរូបនេះ អាចនឹងទៅបង្កើនសមត្ថភាពក្បាច់គុននៅក្រៅប្រទេសពេលទទួលបានឱកាសទៅប្រកួតលើឆាកអន្តរជាតិលើកក្រោយៗទៀត។

កីឡាករ Rudy Agutian (រូបតត៖ONE)

គួរដឹងថា ចាន់ រតនា មានកំណត់ត្រប្រកួតលើសង្វៀន MMA ចំនួន ៨ ដង ដែលក្នុងនោះ ឈ្នះ ៥ ដង និងចាញ់ ៣ ដង។ ប្រកួតលើកចុងក្រោយនៅសង្វៀន One Championship នៅប្រទេស ហ្វីលីពីន កាលខែ ធ្នូ ឆ្នាំ ២០១៨ រតនា ឈ្នះ Abrou Fernandes ដោយវ៉ៃឲ្យគូប្រជែងចុះចាញ់ត្រឹម ទឹកទី២ ប៉ុណ្ណោះ។ មិនត្រឹមជាកីឡាករប្រចាំសង្វៀនកម្រិតពិភពលោក One Championship អ្នកលេង MMA ប្រចាំក្លិប ប្រដាល់សិល្បៈរូបនេះក៏ មានប្រវត្តិប្រកួតប្រដាល់សេរីនៅកម្ពុជា និង ឡើងសង្វៀនតាមទូរទស្សន៍ច្រើនដងដែរ។

នៅថ្ងៃទី ៣ ឧសភា ខាងមុខនាប្រទេស ឥណ្ឌូណេស៊ី ក្រៅពី ចាន់ រតនា ដែលតំណាងឲ្យកម្ពុជា តតាំងនឹងកីឡាករម្ចាស់ផ្ទះ Rudy Agutian នៅសង្វៀន ONE: FOR HONOR ក៏មានកីឡាការិនីឆ្នើមជម្រើសជាតិ នៅ ស្រីពៅ ជួបកីឡាការិនីជើងខ្លាំងម្ចាស់ផ្ទះ Priscilla Hertati Lumban Gaol ដែរ៕

អត្ថបទ៖ ស៊ីធី