- 2019-04-01 07:06:23
- ប្រដាល់
ការតស៊ូដល់ទីបំផុត Jing Nanផ្តួល Angela ការពារខ្សែក្រវាត់ពិភពលោកបានសម្រេច
- 2019-04-01 07:06:23
- ចំនួនមតិ 0 | ចំនួនចែករំលែក 0
ការតស៊ូដល់ទីបំផុត Jing Nanផ្តួល Angela ការពារខ្សែក្រវាត់ពិភពលោកបានសម្រេច
ចន្លោះមិនឃើញ
មហាព្រឹត្តិការណ៍ប្រដាល់ជាប្រវត្តិសាស្ត្ររបស់ One Championship និងលើកដំបូងនៅប្រទេសជប៉ុនកាលពីថ្ងៃអាទិត្យ ទី៣១ មីនា ម្សិលមិញ បានធ្វើឲ្យកក្រើកទីក្រុងតូក្យូជាមួយនឹងការប្រកួតកម្រិតខ្សែក្រវាត់ជាច្រើនគូ។
ក្នុងនោះ កីឡាការិនីគុនចម្រុះចិន Xiong Jing Nan ការពារខ្សែក្រវាត់ពិភពលោករបស់ខ្លួនដោយជោគជ័យ បន្ទាប់ពីតស៊ូមិនបោះបង់ចោលការប្រកួតរហូតផ្តួលកីឡាការិនីប្រជាប្រិយរបស់សិង្ហបុរី Anglela Lee ឲ្យអាជ្ញាកណ្តាលបញ្ឈប់ការប្រកួតក្នុងទឹកទី៥។
នារីជើងខ្លាំងរបស់ចិន Xiong Jing Nan ពិតជាចេញអាវុធវ៉ៃបានល្អ និងពូកែអត់ទ្រាំបំផុត។ ការប្រកួត៣ទឹកដំបូងបញ្ជាក់យ៉ាងច្បាស់ថា កីឡាការិនីចិនម្នាក់នេះពោរពេញដោយទំនុកចិត្ត និងចេញកណ្តាប់បានយ៉ាងមានប្រសិទ្ធភាពដែលធ្វើឲ្យរូបនាងយកប្រៀបលើ Angela Lee។ យ៉ាងណា នៅទឹកទី៤ កីឡាការិនីសិង្ហបុរីបានប្រើក្បាច់ឃ្លេកាច់ដៃ Jing Nan យ៉ាងខ្លាំង ហើយអ្នកគាំទ្រគិតថា នឹងបោះបង់ចោលការប្រកួត ឬអាជ្ញាកណ្តាលបញ្ឈប់។
អ្វីដែលគួរឲ្យកត់សំគាល់គឺ អាជ្ញាកណ្តាលបានសួរបញ្ជាក់ថាតើទ្រាំបានទេនៅពេលត្រូវបាន Angela កាច់ដៃជាប់ប្រហែលជា២នាទី? ពេលនោះ Jing Nan បង្ហាញសញ្ញាដល់អាជ្ញាកណ្តាលថា មិនឈប់ ហើយកីឡាការិនីចិនម្នាក់នេះតស៊ូអត់ទ្រាំរហូតដល់ចប់ទឹកទី៤។
នៅទឹកទី៥គឺជាឱកាសរបស់កីឡាការិនីចិន Jing Nan វិញម្តងនៅពេលនាងបានទាត់លើពោះរបស់កីឡាការិនីសិង្ហបុរី ហើយវាយកណ្តាប់ដៃលើពោះបណ្តាលឲ្យ Angela ស្រុតចុះ តដៃលែងរួច ហើយទីបំផុតអាជ្ញាកណ្តាលបញ្ឈប់ការប្រកួតក្នុងទឹកទី៥។
តាមរយៈជ័យជម្នះនេះ Jing Nan បានក្លាយជាកីឡាការិនីគុនចម្រុះតែម្នាក់គត់ដែលផ្តួលដៃគូឲ្យសន្លប់ពីការប្រកួតការពារខ្សែក្រវាត់ពិភពលោកក្នុងប្រវត្តិសាស្ត្ររបស់ស្ថាប័ន One Championship៕