- 2019-03-13 07:47:26
- កីឡាផ្សេងៗ
តួស្រីក្នុងរឿង «បោកចំបាប់» រំជួលចិត្តពេលនិយាយពីសាច់រឿងហើយទាក់ទងនិងឪពុក
- 2019-03-13 07:47:26
- ចំនួនមតិ 0 | ចំនួនចែករំលែក 0
តួស្រីក្នុងរឿង «បោកចំបាប់» រំជួលចិត្តពេលនិយាយពីសាច់រឿងហើយទាក់ទងនិងឪពុក
ចន្លោះមិនឃើញ
កីឡាការិនីចំបាប់ និងជាតួឯកក្នុងរឿង «បោកចំបាប់» នី សំណាង រំជួលចិត្តរហូតទប់ទឹកភ្នែកមិនបាននាថ្ងៃបើកសម្ពោធដាក់បញ្ចាំងជាផ្លូវការម្សិលមិញនេះ គ្រាដែលអ្នកនារំលឹកសាច់រឿងខ្លះៗ ទាក់ទងទៅនិងរឿងពិតរបស់ឪពុក ដែលមានក្ដីស្រមៃក្នុងជីវិតឈ្នះមេដាយមាសជូនជាតិនៅពេលណាមួយ។
នៅក្នុងសាច់រឿងខាងលើនេះ គឺនិយាយពីជីវិតពិតរបស់អតីតអ្នកចំបាប់បុរាណ លោក នុត នី ដែលស្រឡាញ់វិស័យកីឡាមួយនេះខ្លាំងបំផុត និងមានក្ដីស្រមៃចង់ឈ្នះមេដាយមាសជូនកម្ពុជានៅពេលណាមួយឲ្យបាន។ ប៉ុន្តែក្ដីស្រមៃនេះត្រូវបានរំលាយបន្តិចម្ដងៗដោយសារសង្គ្រាម និងវ័យចាស់ជរា ខណៈកូនប្រុសដែលក្ដីសង្ឃឹមបែរជាមិនចាប់អារម្មណ៍ ស្រប់ពេលកូនស្រីច្បងក៏មិនអាចបំពេញក្ដីស្រមៃនេះបាន។ ក្ដីស្រមៃនេះបែរជាបានសម្រេចដោយសារកូនស្រីពៅ ដែលជាតួឯកក្នុងរឿងខាងលើនេះទៅវិញ។ អ្នកនាង នី សំណាង តស៊ូប្រកួតរហូតឈ្នះមេដាយមាសក្នុងព្រឹត្តិការណ៍ស៊ីហ្គេមលើកទី២៧ នៅ មីយ៉ាន់ម៉ា ឆ្នាំ២០១៣ បំពេញក្ដីស្រមៃជូនឪពុកបាន។
ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជាអ្នកជ្រោមជ្រែងការផលិតខ្សែភាពយន្តខាងលើនេះបានឲ្យដឹងថា នេះជាភាពយន្តកីឡាទី១នៅកម្ពុជា ដែលនិយាយពីជីវិតពិតរបស់អ្នកកីឡា។ នេះជាភាពយន្តកម្សត់និយាយពីការតស៊ូលើប្រភេទកីឡាចំបាប់ ហើយតួសម្ដែងគឺសុទ្ធតែអ្នកកីឡា និងចាប់បញ្ចូលថតទាំងអស់ ដូច្នេះប្រសិនបើមានការខុសឆ្គង ឬមិនល្អត្រង់ចំណុចណាសូមអភ័យទោសផង។ ឯកឧត្ដម សំណូមពរដល់ប្រជាពលរដ្ឋទាំងអស់កុំភ្លេចចូលរួមទស្សនា និងគាំទ្រទាំងអស់គ្នា ឥលូវនេះមានដាក់បញ្ចាំងនៅតាមរោងកុន។
រំលឹកដែរថា ខ្សែភាពយន្ត «បោកចំបាប់» នេះបានធ្វើពិធីសម្ពោធដាក់បញ្ចាំងជាផ្លូវការហើយនៅល្ងាចថ្ងៃទី១២ ខែមីនា ឆ្នាំ២០១៩ នេះនៅឯរោងកុន Major Cineplex Aeon 1 ៕
វីដេអូ៖
