គុណតម្លៃ«Kun Khmer World Champion»រំលេចលើសង្វៀនធំ ONE

2019-02-20 03:18:21
ប្រដាល់

2019-02-20 03:18:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យ« Kun Khmer World Champion» ត្រូវបានអ្នកទស្សនាទូទាំងពិភពលោកបានចាប់អារម្មណ៍តាមរយៈសង្វៀនធំ ONE Championship នៅពេលកីឡាការិនីកម្ពុជា នៅ ស្រីពៅ បានបង្ហាញភាពអស្ចារ្យកាលពីចុងសប្តាហ៍កន្លងទៅ។

នៅ ស្រីពៅ (ខោស)ពេលវ៉ៃនៅសង្វៀន ONE

អ្នកស្នេហាប្រដាល់គុនខ្មែរប្រហែលជាចាប់អារម្មណ៍នឹងការអត្ថាធិប្បាយរបស់ពិធីករ ប្រចាំសង្វៀន ONE បានលើកឡើងម្តងហើយម្តងទៀតអំពីពាក្យ« Kun Khmer World Champion»ដែលមានន័យថា «ជើងឯកគុនខ្មែរពិភពលោក»របស់កីឡាការិនី នៅ ស្រីពៅ ដែលផ្សាយទៅកាន់ប្រទេសជាច្រើននៅលើពិភពលោក។ ការលើកឡើងបែបនេះជាសារបញ្ជាក់ឲ្យពិភពលោកដឹងច្បាស់ថា ក្បាច់គុនប្រដាល់ខ្មែរក៏មានតម្លៃ និងស្មើមុខមាត់ទៅនឹងក្បាច់គុនរបស់ប្រទេសផ្សេងៗទៀត។

កន្លងមកពិធីករសង្វៀនដ៏ធំប្រចាំអាស៊ីមួយនេះតែងតែលើកឡើងអំពីពាក្យថា «គុនខ្មែរ ឬ Kun Khmer»នៅពេលដែលកីឡាករ កីឡាការិនីកម្ពុជាប្រកួតនៅសង្វៀនមួយនេះ។ ប៉ុន្តែកាលពីចុងសប្តាហ៍កន្លងទៅនៅទីក្រុងបាងកក ប្រទេសថៃគឺជាលើកទី១ដែលម្ចាស់ខ្សែក្រវាត់គុនខ្មែរពិភពលោកគឺ នៅ ស្រីពៅ បានបង្ហាញខ្លួន ហើយទទួលបានជ័យជម្នះលើកីឡាការិនីម្ចាស់ផ្ទះថៃ។

តាមពិតទៅសហព័ន្ធកីឡាប្រដាល់គុនខ្មែរអន្តរជាតិបានរៀបចំការប្រកួតអន្តរជាតិ២លើកហើយក្នុងរយៈពេល២ឆ្នាំចុងក្រោយនេះដោយមានកីឡាករ និងកីឡាការិនីមួយចំនួនបានក្លាយជាម្ចាស់ខ្សែក្រវាត់គុនខ្មែរពិភពលោក។

ទូរទស្សន៍ដែលផ្សាយបន្តផ្ទាល់

នៅ ស្រីពៅ មិនត្រឹមតែត្រូវបានហៅថាជា Kun Khmer World Champion ប៉ុណ្ណោះទេ ប៉ុន្តែកីឡាការិនីកម្ពុជារូបនេះក៏ពិធីករហៅថាជា«កីឡាការិនីឆ្នើមប្រចាំឆ្នាំ២០១៨»នៅប្រទេសមីយ៉ាន់ម៉ា ក្នុងព្រឹត្តិការណ៍ World Lethwei Championship។

ដូចគ្នានេះដែរ ប្រទេសថៃបានរៀបចំការប្រកួតជើងឯក Muay Thai World Champion ជាច្រើនឆ្នាំមកហើយដែលមានកីឡាករ កីឡាការិនីរបស់ខ្លួន និងកីឡាករបរទេសជាឈ្នះជើងឯកនេះជាច្រើន។ នៅពេលដែលម្ចាស់ជើងឯកទាំងនោះឡើងប្រកួតលើឆាកអន្តរជាតិ ទាំងពិធីករ និងអ្នកសរសេរច្បាស់ណាស់នឹងប្រើពាក្យ World Lethwei Championship នេះ។

ជារួមប្រសិនបើ សហព័ន្ធកីឡាប្រដាល់គុនខ្មែរអន្តរជាតិរៀបចំការប្រកួតដណ្តើមខ្សែក្រវាត់ Kun Khmer World Champion កាន់តែច្រើន ហើយទាំងអ្នកប្រដាល់ខ្មែរ និងបរទេសបានឈ្នះខ្សែក្រវាត់នេះកាន់តែច្រើន ពួកគេនឹងកាន់តែមានតម្លៃប្រើប្រាស់ពាក្យ Kun Khmer World Champion លើឆាកអន្តរជាតិ ហើយពិភពលោកកាន់តែស្គាល់«គុនខ្មែរ»៕