ក្រុម Thunder លេងរបៀបម៉េចទើបទម្លាក់ម្ចាស់ជើងឯកឆ្នាំចាស់មណ្ឌលសៀមរាបមុននេះ?

2019-02-09 13:34:10
បាល់ទាត់

2019-02-09 13:34:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្រុមបាល់ទាត់ Thunder បង្ហើបថាបានរៀបចំផែនការច្បាស់ណាស់ ទើបអាចយកឈ្នះក្រុមខ្លាំងម្ចាស់ជើងឯករដូវកាលឆ្នាំ ២០១៨ ប្រចាំមណ្ឌលសៀមរាប ឲ្យធ្លាក់ត្រឹមវគ្គ៦៤ក្រុមនាថ្ងៃប្រកួតទី២ពានរង្វាន់ Tiger Street Football Festival 2019។

ក្រុម Thunder អាវលឿង

លោក តាំ ខ្វេងហ៊ុយ ប្រធានក្រុមបាល់ទាត់ខាងលើបានលើកឡើងថា ពួកគេបានត្រៀមខ្លួនយ៉ាងល្អមុនការប្រកួត Football Festival 2019 ជាពិសេសប៉ះជាមួយម្ចាស់ជើងឯកចាស់ប្រចាំមណ្ឌលសៀមរាប Next Step។ ក្រុមទាំងមូលបានមើលវីដេអូប្រកួតរបស់ដៃគូដែលលេងពីព្រឹក រួចពិភាក្សាគ្នាហើយរៀបចំចាត់ចែងកីឡាករលេង មិនបិទតារាឆ្នើមរបស់ Next Step ដូចជា Mr Chaly និងកូនស្វាមិនឲ្យលេងបានស្រួលឡើយ។ ធ្វើយ៉ាងណាក៏ដោយមិនឲ្យដៃគូបានបាល់ស្រួលឡើយ ទើបជាលទ្ធផលអាចឈ្នះបែបនេះ។

ក្រុម Thunder អាវលឿង

ចំណែកកីឡាករ ថន បូរ៉ា ក៏បានឲ្យដឹងដែរថា ដោយសារតែក្រុមមានទំនុកចិត្តខ្ពស់ លេងចេះស្ដាប់គ្នា បើចុះបិទគឺចុះទាំងអស់គ្នា បើឡើងគឺឡើងទាំងអស់គ្នា និងការរៀបចំការក្រុមបានល្អ មិនខ្លាចថាត្រូវប៉ះក្រុមខ្លាំងណាក៏ដោយគិតតែផ្ដោតលេងឲ្យអស់ពីសមត្ថភាព។ សមាជិករូបនេះក៏សង្ឃឹមថា លើកនេះអាចបំបែកឯត្តកម្មបានទៅចោះ ព្រោះរាល់ឆ្នាំមិនដែលឆ្លងផុតវគ្គ៣២ក្រុមនោះឡើយ ហើយស្អែកនេះដល់វគ្គនេះហើយ។

ក្រុម Thunder អាវលឿង

បញ្ជាក់ផងដែរ ក្រុមបាល់ទាត់ Thunder បានទម្លាក់ក្រុម Next Step ម្ចាស់ជើងឯកចាស់មណ្ឌលសៀមរាប នៅក្នុងវគ្គ៦៤ក្រុមចុងក្រោយ នាថ្ងៃទី៩ ខែកុម្ភៈ ឆ្នាំ២០១៩ ដែលត្រូវជាថ្ងៃប្រកួតទី២ផងដែរ។ ក្រុមខ្លាំងនេះនឹងត្រូវបន្តដំណើរនៅថ្ងៃស្អែកដើម្បីប្រជែងយកជើងឯកប្រចាំមណ្ឌលនេះតែម្ដង។ សម្រាប់មណ្ឌលនេះនឹងត្រូវជ្រើសរើសយកក្រុមខ្លាំងចំនួន១២ ដើម្បីទៅប្រកួតវគ្គផ្ដាច់ព្រ័ត្រនៅរាជធានីភ្នំពេញនាថ្ងៃទី១៦-១៧ ខែមីនា ២០១៩។

ក្រុម Thunder អាវលឿង

ប្រាក់រង្វាន់ប្រចាំមណ្ឌលសៀមរាប៖

១-ទទួលបាន ១៥០០ ដុល្លារអាមេរិក
២-ទទួលបាន ១០០០ ដុល្លារអាមេរិក
៣-ទទួលបាន ៥០០ ដុល្លារអាមេរិក
៤-ទទួលបាន ២០០ ដុល្លារអាមេរិក

ក្រុមជយលាភីទូទាំងប្រទេស៖

ក្រុមលេខ១៖ ១ ៥០០០ ដុល្លារអាមេរិក
ក្រុមលេខ២៖ ៥ ០០០ ដុល្លារអាមេរិក
ក្រុមលេខ៣៖ ២ ៥០០ ដុល្លារអាមេរិក
ក្រុមលេខ៤៖ ១ ០០០ ដុល្លារអាមេរិក

មណ្ឌលបន្ទាប់ពីខេត្តសៀមរាបនេះទៅគឺ៖

មណ្ឌល ខេត្តកំពង់ចាម ៖ មណ្ឌលនេះក្រុមខេត្តកំពង់ចាម ក្រចេះ ស្ទឹងត្រែង រតនគីរី មណ្ឌលគីរី ព្រៃវែង និងស្វាយរៀងមានសិទ្ធិចុះឈ្មោះចូលរួមប្រកួតបាន។ ប្រកួតថ្ងៃទី១៦-១៧ ខែកុម្ភៈ។
មណ្ឌល ខេត្តកណ្ដាល ៖ មណ្ឌលនេះក្រុមខេត្តកណ្ដាល ព្រៃវែង និងស្វាយរៀងមានសិទ្ធិចុះឈ្មោះចូលរួមប្រកួតបាន។ ប្រកួតថ្ងៃទី៣ ខែមីនា។
មណ្ឌល រាជធានីភ្នំពេញ ៖ ក្រុមនៅរាជធានីភ្នំពេញមានសិទ្ធិចុះឈ្មោះចូលរួមប្រកួត។ ប្រកួតថ្ងៃទី១៣-១៤-១៥ ខែមីនា។
ប្រកួតជុំផ្ដាច់ព្រ័ត្រទូទាំងប្រទេស ៖ ថ្ងៃទី១៦-១៧ ខែមីនា នៅរាជធានីភ្នំពេញ។ ចាប់ផ្ដើមប្រកួតចាប់ពីម៉ោង៧ព្រឹកដល់ ៨យប់៕

អត្ថបទ៖ នួន ស៊ីណា