- 2019-02-02 02:32:53
- បាល់ទាត់
Sarri ចង់បង្កើតរបៀបលេងផ្ទាល់ខ្លួនដូច Barcelona នៅ Chelsea
- 2019-02-02 02:32:53
- ចំនួនមតិ 0 | ចំនួនចែករំលែក 0
Sarri ចង់បង្កើតរបៀបលេងផ្ទាល់ខ្លួនដូច Barcelona នៅ Chelsea
ចន្លោះមិនឃើញ
គ្រូបង្វឹកតោខៀវ ជឿជាក់ខ្ពស់ថាលោកនឹងជោគជ័យបើលោកប្រកាន់ខ្ជាប់របៀបលេងនៅ Stamford Bridge បើទោះជាលទ្ធផលមិនសូវល្អនៅប៉ុន្មានសប្ដាហ៍ក្រោយនេះក៏ដោយចុះ។
Maurizio Sarri បាននិយាយថាលោកមិនចាប់អារម្មណ៍ក្នុងការផ្លាស់ប្ដូរវិធីសាស្ត្ររបស់លោកនៅ Chelsea ឡើយ ហើយលោកគិតថា ភាពអត់ធ្មត់ នឹងអាចឲ្យលោកបង្កើតរបៀបលេងផ្ទាល់ខ្លួនដូច Barcelona នៅ Chelsea។
បរាជ័យ ៤-០ របស់ Chelsea ទៅលើក្រុម Bournemouth កាលពីយប់ថ្ងៃពុធ បានធ្វើឲ្យពួកគេបាត់តំណែងក្រុមកំពូលតារាងទាំង៤។
គ្រូបង្វឹកកំពូលៗ នៃក្របខ័ណ្ឌ Premier League ដែលចូលចិត្តប្រើប្រព័ន្ធប្រយុទ្ធនឹងកម្រជោគជ័យណាស់នៅរដូវកាលដំបូងរបស់ពួកគេនៅអង់គ្លេស។
Mauricio Pochettino បានលេខ៥ នៅអាណត្តិដំបូងរបស់លោកនៅ Tottenham ដោយទទួលបានពិន្ទុតិចជាង Andre Villas-Boas និង Tim Sherwood ដែលត្រូវ Spurs បណ្ដេញចេញទៅទៀត។ Guardiola បានបញ្ចប់ក្នុងចំណាត់ថ្នាក់លេខ៣។ Liverpool របស់ Jurgen Klopp បានបញ្ចប់ក្នុងចំណាត់ថ្នាក់លេខ៨។ ប៉ុន្តែគ្រូបង្វឹកទាំងនោះមានពេលវេលាគ្រប់គ្រាន់ ហើយឥឡូវនេះក្លឹបរបស់ពួកគេកំពុងក្លាយជាក្លឹបដែលខ្លាំងបំផុតក្នុងលោក។
Goal បានរាយការណ៍ថា ក្រោយចប់ការប្រកួតដែលជាបរាជ័យដ៏អាក្រក់បំផុតក្នុងប្រវត្តិសាស្ត្ររបស់ក្លឹបសម្រាប់រយៈពេល២២ឆ្នាំចុងក្រោយ Sarri និងក្រុមកីឡាករ មានកិច្ចប្រជុំបន្ទាន់មួយ សូម្បីតែជំនួយការគ្រូបង្វឹក Gianfranco Zola ក៏ ត្រូវបានគេបណ្តេញចេញក្នុងអំឡុងពេលកិច្ចប្រជុំហើយទ្វារត្រូវបានចាក់សោ ខណៈដែល កីឡាករទាំងអស់ត្រូវបាន Sarri សួរចម្លើយថាហេតុអ្វីបានជាពួកគេលេងអត់ស៊ីសង្វាក់ក្រោយ Joshua King ស៊ុតចូល។
គ្រូបង្វឹកវ័យ៦០ឆ្នាំបាននិយាយថា លោកកំពុងរងសម្ពាធ ព្រោះលោកកំពុងដឹកនាំក្រុមដែលប្តូរអ្នកចាត់ការ១៥នាក់ ក្នុងរយៈពេល១៦ឆ្នាំ ចាប់តាំងពីពេលដែល Roman Abramovich បានក្លាយជាម្ចាស់ក្លឹបតោខៀវក្នុងឆ្នាំ ២០០៣។ ប៉ុន្តែលោកទទូចថានឹងមិនផ្លាស់ប្តូរទស្សនវិជ្ជាបាល់ទាត់ដើម្បីលទ្ធផលល្អមួយពេលឡើយ។ លោកនៅតែជឿថារបៀបលេងរបស់លោកនឹងធ្វើឲ្យ Chelsea ខ្លាំងយូរអង្វែង។
របៀបលេងរបស់ Sarri គឺស្រដៀងនឹងមិត្តភក្តិរបស់លោកគឺ Pep Guardiola នៅ Manchester City ហើយអ្នកជំនាញបាល់ទាត់ជាច្រើននាក់បាននិយាយថា style លេងរបស់ Sarri គេអាចទាយទុកមុនបាន ខណៈដែលគ្រូបង្វឹក Chelsea បានការពារថាសូម្បីតែក្រុមល្អបំផុតដូច Barcelona នៅតែគេអាចព្យាករណ៍បាន៕