- 2019-01-16 02:26:35
- ប្រដាល់
គង់ សំបូរ ចង់ប្រាប់ពិភពលោកពីសង្វៀន ONE ថា ក្បាច់គុនខ្មែរនៅតែខ្លាំង
- 2019-01-16 02:26:35
- ចំនួនមតិ 0 | ចំនួនចែករំលែក 0
គង់ សំបូរ ចង់ប្រាប់ពិភពលោកពីសង្វៀន ONE ថា ក្បាច់គុនខ្មែរនៅតែខ្លាំង
ចន្លោះមិនឃើញ
កីឡាកររបស់ក្លឹបអាណាចក្រប្រយុទ្ធ គង់ សំបូរ ត្រូវបានផ្គូផ្គងឲ្យឡើងសង្វៀន ONE ប៉ះជើងខ្លាំងចិន Zhang Chenglongនៅប្រទេសសិង្ហបុរី ថ្ងៃសុក្រ ទី២២ ខែកុម្ភៈ ព្រឹត្តិការណ៍ ONE: CALL TO GREATNESS។
ថ្វីបើ គង់ សំបូរ ដឹងថា ការប្រកួតមួយនេះមិនងាយស្រួលដូចការប្រកួតនៅក្នុងស្រុកមែន ប៉ុន្តែសម្រាប់រូបគេនឹងធ្វើឲ្យអស់ពីសមត្ថភាពយកជ័យជម្នះពីសិង្ហបុរីឲ្យកម្ពុជាឲ្យបាន។ កីឡាកររូបនេះថា៖ «ការប្រកួតមួយនេះវាសំខាន់ណាស់សម្រាប់ខ្ញុំ។ ខ្ញុំនឹងហាត់ឲ្យខ្លាំងហើយវាយឲ្យល្អ ពីព្រោះឥឡូវខ្ញុំវាយតំណាងឲ្យខ្មែរនៅបរទេស ទោះចាញ់ក៏ដោយ ឈ្នះក៏ដោយ ខ្ញុំមានមោទនភាពខ្លាំង ដោយសារខ្ញុំនឹងប្រើឲ្យពីកម្លាំងកាយចិត្ត»។
គង់ សំបូរ រស់នៅនិងហ្វឹកហាត់នៅខេត្តសៀមរាប កំពុងសម្រុកហាត់រឹតតែខ្លាំងដើម្បីត្រៀមបានត្រឹមត្រូវមុនចូលសង្វៀនប្រដាល់ធំជាងគេនេះ។ អ្នកលេងរន្ទះជើងបង្ហើប ៖ «ខ្ញុំហាត់ខ្លាំងសម្រាប់ប្រកួតនេះ ខ្ញុំអត់បានទៅណាទេពេលឆ្លងឆ្នាំហ្នឹង។ បន្ទាប់ពីហាត់នៅក្លឹបហើយ ខ្ញុំទៅទាត់បាល់។ ទាត់ផ្ទប់ជញ្ជាំងចុះឡើងៗ លេងបាល់វាជួយចលនាច្រើន ហើយឲ្យសរសៃដៃជើងបត់បែនល្អជាងមុន»។
ដៃគូរបស់កីឡាករកម្ពុជាគឺ Zhang ជាជើងខ្លាំងចិនមានកេរ្តិ៍ឈ្មោះល្អ និងបទពិសោធច្រើនសរុបប្រហែលជាង៥០ប្រកួត ព្រមទាំងធ្លាប់ប្រកួតនៅសង្វៀនលំដាប់អន្តរជាតិ Gloryច្រើនដងថែមទៀត។
អ្នកប្រដាល់តំណាងក្លឹបអាណាចក្រប្រយុទ្ធរូបនេះជឿថា ឱកាសដែលបានប្រកួតជាមួយជើងខ្លាំងដូចជា Zhang នេះជាកត្តាជម្រុញរូបគេឲ្យកាន់តែល្អជាងមុន។ច្បាស់ណាស់រូបគេពិតជាទន្ទឹងរង់ចាំការប្រកួតនេះណាស់។
សំបូរនិយាយថា ៖«Zhang ខ្លាំង ប៉ុន្តែប៉ះជាមួយអ្នកខ្លាំង បានធ្វើឲ្យយើងល្អ ប៉ះអ្នកខ្សោយៗ វាអត់សូវល្អទេ យើងមិនសូវសប្បាយខ្លាំង។ ខ្ញុំដឹងថា គាត់ល្អតែប្រើដៃ តែជើងគាត់អត់សូវល្អទេ។ អញ្ចឹងឥឡូវកំពុងហាត់ការពារច្រើន»។
«ខ្ញុំមានមោទនភាពខ្លាំងមែនទែនដែលបានឱកាសបញ្ចេញសមត្ថភាពនៅ ONE Championship ចង់បង្ហាញគេគ្រប់គ្នាទូទាំងពិភពលោកដឹងថា ក្បាច់គុនខ្មែរនៅតែខ្លាំង - មិនបានចុះខ្សោយឡើយ។ខ្ញុំចង់ប្រាប់ទៅបងប្អូនខ្មែរគ្រប់រូបដែលរង់ចាំមើលការប្រកួតរបស់ខ្ញុំនៅ ONE ថាខ្ញុំនឹងប្រកួតឲ្យអស់ពីលទ្ធភាព និងមិនធ្វើឲ្យបងប្អូនបាក់ទឹកចិត្តលើរូបខ្ញុំឡើយ»។
សូមបញ្ជាក់ថា នៅសង្វៀន ONE: CALL TO GREATNESS ថ្ងៃជាមួយគ្នានេះក៏មានអ្នកលេងគុនចម្រុះកម្ពុជា ខុន ស៊ីចាន់ ប៉ះកីឡាករឥណ្ឌូណេស៊ី៕