ឯកឧត្តមប្រធានសហព័ន្ធអញ្ជើញបើកកម្មវិធីប្រកួត MATIC 2019

2019-01-13 07:53:23
កីឡាផ្សេងៗ

2019-01-13 07:53:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាអេឡិចត្រូនិកអន្តរជាតិ MATIC 2019 ត្រូវបានបើកការប្រកួតផ្លូវការហើយកាលពីវេលាម៉ោង២រសៀលថ្ងៃអាទិត្យ ទី១៣ ខែមករា នៅផ្សារទំនើបអ៊ីអនសែនសុខ ក្រោមអធិបតីភាពឯកឧត្តម ជា ច័ន្ទបរិបូណ៍ រដ្ឋលេខាធិការក្រសួងព័ត៌មាន និងជាប្រធានសហព័ន្ធកីឡាអេឡិចត្រូនិកកម្ពុជា។

ឯកឧត្តម ជា ច័ន្ទបរិបូណ៌

ក្នុងពិធីបើកការប្រកួតនេះ ឯកឧត្តម ជា ច័ន្ទបរិបូណ៍ បានលើកឡើងថា នេះជាមោទនភាពដែលកម្ពុជាបានទទួលរៀបចំធ្វើម្ចាស់ផ្ទះជាលើកទី២ បន្ទាប់ពីលើកទី១ធ្វើម្តងហើយកាលពីឆ្នាំ២០១៤។ អ្វីដែលជាសារគួរឲ្យចាប់អារម្មណ៍នោះគឺឯកឧត្តមបញ្ជាក់ថា សហព័ន្ធកីឡាអេឡិចត្រូនិកកម្ពុជាកំពុងរៀបចំផែនការដើម្បីត្រៀមខ្លួនបញ្ជូនកីឡាករចូលរួមប្រកួតកីឡាស៊ីហ្គេម ឆ្នាំ២០១៩នេះនៅប្រទេសហ្វីលីពីន។ សូមយុវកីឡាករត្រៀមខ្លួនទាំងអស់គ្នាដើម្បីចូលរួមប្រកួតកីឡាស៊ីហ្គេមទាំងអស់គ្នា។

ឆ្លៀតក្នុងឱកាសនេះឯកឧត្តមក៏បានអរគុណដល់ក្រុម Sabay ដែលបានរៀបចំការប្រកួតព្រឹត្តិការណ៍កីឡាអេឡិចត្រូនិកជាតិឆ្នាំ២០១៨ដែលបញ្ចប់ទៅកាលពីម្សិលមិញ និងការប្រកួតកីឡាអេឡិចត្រូនិកអន្តរជាតិ MATIC 2019 នេះដ៏អស្ចារ្យ។

ព្រឹត្តិការណ៍ MATIC 2019 មាន៤ប្រទេសចូលរួមប្រកួតគឺម្ចាស់ផ្ទះកម្ពុជាក្រុម Klach Ey ដែលទើបឈ្នះជើងឯកទូទាំងប្រទេសកាលពីថ្ងៃសៅរ៍ ម្សិលមិញ។ ប្រទេសចិនបានបញ្ជូនក្រុម Ali Huaye ប្រទេសថៃបញ្ជូនក្រុម Safty First និងប្រទេសម៉ាឡេស៊ីបញ្ជូនក្រុម Suicide។

រូបមន្តនៃការប្រកួតត្រូវធ្វើឡើងវគ្គសន្សំពិន្ទុសម្រាប់ជុំដំបូងគឺក្រុមទាំង៤ត្រូវប៉ះគ្នាទាំងអស់។ ក្រុមដែលទទួលបានពិន្ទុខ្ពស់ជាងគេ២គឺលេខ១ និងលេខ២ត្រូវឡើងទៅប្រកួតវគ្គផ្តាច់ព្រ័ត្រតែម្តងដើម្បីស្វែងរកក្រុមជើងឯកពានអន្តរជាតិនេះ។

សហព័ន្ធកីឡាអេឡិចត្រូនិកកម្ពុជា និង Sabay ជាអ្នករៀបចំការប្រកួតនេះដែលទទួលបានការអនុញ្ញាតពីគណៈកម្មាធិការជាតិអូឡាំពិកកម្ពុជា (NOCC) ដោយមានការចូលរួមឧបត្ថម្ភពីក្រុមហ៊ុនទូរសព្ទ Huawei ទូរទស្សន៍ MYTV ផ្សារទំនើប AEON Mall និងក្លឹបកីឡាអេឡិចត្រូនិក MCT E-Sport Cambodia។