- 2018-12-07 07:47:04
- បាល់ទាត់
ជាគំរូល្អ ក្រុមហ៊ុននេះធ្វើតារាហ្វូតសាលជូនវិទ្យាល័យពងទឹក
- 2018-12-07 07:47:04
- ចំនួនមតិ 0 | ចំនួនចែករំលែក 0
ជាគំរូល្អ ក្រុមហ៊ុននេះធ្វើតារាហ្វូតសាលជូនវិទ្យាល័យពងទឹក
ចន្លោះមិនឃើញ
ក្រុមហ៊ុនតៃខា ខបភើរេសិន បានផ្តល់អំណោយជាតារាងបាល់ទាត់ហ្វូតសាលស្មៅសិប្បនិម្មិតដ៏ទំនើបដល់វិទ្យាល័យពងទឹក ស្ថិតនៅខណ្ឌដង្កោ រាជធានីភ្នំពេញដើម្បីចូលរួមចំណែកអភិវឌ្ឍវិស័យកីឡានៅកម្ពុជា ហើយសកម្មភាពបែបនេះជាគំរូដ៏ល្អដល់សង្គម។
ក្នុងពិធីប្រគល់អំណោយនៅព្រឹកថ្ងៃទី៧ ខែធ្នូនេះ លោក Suzuki Taito នាយកប្រតិបត្តិក្រុមហ៊ុនតៃខា ខបភើរេសិន លើកឡើងថា ក្រុមហ៊ុនកំពុងយកចិត្តទុកដាក់លើការបណ្ដុះបណ្ដាលក្នុងអាជីវកម្ម ការលើកកម្ពស់ឥរិយាបថក្នុងធុរកិច្ច ជំនាញ ភាសាដែលជាកត្តាចាំបាច់សម្រាប់ការអភិវឌ្ឍសង្គម។
«ក្នុងឱកាសគម្រប់ខួបលើកទី៦៥នៃបុណ្យឯករាជ្យជាតិ និងគម្រប់ខួប៦៥ឆ្នាំនៃទំនាក់ទំនងការទូតរវាងជប៉ុន-កម្ពុជា ក្រុមហ៊ុនតៃខា ខបភើរេសិន បានរៀបចំអំណោយដ៏ពិសេសគឺតារាងបាល់ទាត់ហ្វូតសាលដល់វិទ្យាល័យពងទឹក។ នេះជាផ្នែកមួយរួមចំណែកអភិវឌ្ឍវិស័យកីឡា ក៏ដូចជាលើកកម្ពស់សុខុមាលភាពតាមរយៈកីឡានៅកម្ពុជា ព្រមទាំងរួមចំណែកដល់ការរីកចម្រើនរបស់យុវជន។ តារាងបាល់ទាត់ហ្វូតសាលនេះត្រូវបានប្រើវត្ថុធាតុស្រួបរំញ័រ aGEL របស់យើងខ្ញុំ»។
ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡាបានលើកឡើងថា ក្នុងនាមឯកឧត្តមបណ្ឌិតសភាចារ្យ ហង់ ជូនណារ៉ុន និងក្រសួងសូមអរគុណ និងកោតសរសើរដល់ក្រុមហ៊ុន តៃខា ខបភើរេសិនដែលបានយកចិត្តទុកដាក់ និងចូលរួមអភិវឌ្ឍដល់វិស័យកីឡាកម្ពុជា ក៏ដូចជាកិច្ចការសង្គមនានា។ ទីលានបាល់ទាត់ដ៏ទំនើបនេះពិតជាមានតម្លៃណាស់សម្រាប់ប្អូនៗសិស្សានុសិស្សដែលនេះជាការខិតខំប្រឹងប្រែងរបស់ក្រុមតៃខា ខបភើរេសិន។
ឯកឧត្តមបានសង្កត់ធ្ងន់ថា ៖«ដើម្បីជាការថ្លែងអំណរគុណដល់ម្ចាស់ឧបត្ថម្ភ ខ្ញុំសូមស្នើឲ្យប្អូនៗទាំងអស់ខិតខំថែរក្សាឲ្យបានគងវង់យូរអង្វែង ជាពិសេសនាំគ្នាហ្វឹកហាត់កីឡា ក៏ដូចជាការប្រកួតឲ្យកាន់តែកាន់តែមានកម្រិតគុណភាពខ្ពស់។ ខ្ញុំសង្ឃឹមថា នៅឆ្នាំខាងមុខ ក្រុមបាល់ទាត់នៅសាលាពងទឹកនេះនឹងទទួលបានលទ្ធផលល្អប្រសើរក្នុងការចូលរួមប្រកួតនានា ជាពិសេសការប្រកួតជ្រើសរើសជើងឯក សិស្សថ្នាក់រាជធានី និងជាតិ»។
តាមពិតទៅនេះ មិនមែនជាលើកទី១ទេដែលក្រុមហ៊ុន តៃខា ខបភើរេសិនបានចូលរួមចំណែកជួយជួយដល់សង្គមនៅក្នុងប្រទេសកម្ពុជា។ ជាក់ស្តែងកាលពីឆ្នាំ២០១៦ ក្រុមហ៊ុនបានផ្តល់អំណោយជាប៊ិច និងខ្មៅដៃចំនួន១ម៉ឺនដើមដល់សាលារៀនស្ថិតនៅខណ្ឌពោធិ៍សែនជ័យ និងឆ្នាំ២០១៧ចំនួន១ម៉ឺនដើមទៀតដល់សាលារៀនក្នុងខណ្ឌដង្កោ។
លើសពីនេះទៀត ក្រុមហ៊ុនក៏បានបង្កើតក្រុមបាល់ទាត់នារីឈ្មោះ «តៃខា សុបិន្ត» កាលពីឆ្នាំ២០១៧ដែលបានហ្វឹកហាត់ និងមានសកម្មភាពរហូតដល់សព្វថ្ងៃ។ ក្រុមនេះក៏មានគោលបំណងបញ្ជូនកីឡាការិនីរបស់ខ្លួនចូលរួមក្នុងក្រុមបាល់ទាត់ជម្រើសជាតិនារីដើម្បីធ្វើយ៉ាងណាឈានដល់ចូលរួមកីឡាអូឡាំពិក។ ពិសេសទៀតនោះ ក្រុមហ៊ុននឹងផ្តល់ឱកាសឲ្យបានទៅហ្វឹកហាត់នៅប្រទេសជប៉ុនដែលក្រុមហ៊ុនជឿជាក់ថា នឹងអាចបណ្ដុះបណ្ដាលអត្តពលិកឈានដល់កម្រិតអន្តរជាតិ។
កាលពីឆ្នាំ២០១៧កន្លងទៅ ក្រុមហ៊ុនក៏បានឧបត្ថម្ភ ក្នុងការរៀបចំកម្មវិធីប្រកួត កីឡាឡើងភ្នំ ដើម្បីជាការចូលរួមគាំទ្រដល់យុវជនវ័យក្មេង។
ក្រុមហ៊ុនតៃខា ខបភើរេសិនបានបើកប្រតិបត្តិការ នៅក្នុងប្រទេសកម្ពុជាកាលពីឆ្នាំ២០១៣ រហូតមកដល់បច្ចុប្បន្ន។ ក្រុមហ៊ុននេះមានប្រតិបត្តិការផលិត និងលក់ទាំងនៅជប៉ុន និងក្រៅប្រទេសដែលមានផលិតផលស្រួបរំញ័រ (អាល់ហ្វា ជែល) ការបោះពុម្ពលើផ្ទៃកោង (Cubi Printing) ពូក បរិក្ខារពេទ្យសម្រាប់ថែទាំងមនុស្សចាស់ជរា។ ចំពោះរោងចក្រក្នុងប្រទេសកម្ពុជានៅតែបន្តផលិត ផលិតផលសំខាន់ៗដូចជាអាល់ហ្វាជែល (αGEL) គ្រឿងបន្សំស្បែកជើង។ តាមគម្រោងក៏នឹងបង្កើតអាជីវកម្មភោជនីយដ្ឋានថ្មីនៅកម្ពុជានៅឆ្នាំ ក្រោយ។
ក្នុងពិធីប្រគល់អំណោយទីលានបាល់ទាត់ហ្វូតសាលដ៏វិសេសវិសាលនេះក៏មានការអញ្ជើញចូលរួមពីឯកឧត្តម ហ៊ីដេហ៊ឺសា ហូរីណូឈឺ ឯកអគ្គរាជទូតជប៉ុនប្រចាំនៅកម្ពុជា លោក តិម៉ា សោភា អភិបាលរងខណ្ឌដង្កោ លោក អ៊ុក សម្បត្តិ អនុប្រធានមន្ទីរអប់រំ យុវជន និងកីឡារាជធានីភ្នំពេញ លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ៕