- 2018-11-25 04:46:03
- វិភាគ
ហេតុអ្វីកម្ពុជាដាក់កីឡាករក្មេងៗប្រកួតបង្គ្រប់កិច្ចយប់មិញ?
- 2018-11-25 04:46:03
- ចំនួនមតិ 0 | ចំនួនចែករំលែក 0
ហេតុអ្វីកម្ពុជាដាក់កីឡាករក្មេងៗប្រកួតបង្គ្រប់កិច្ចយប់មិញ?
ចន្លោះមិនឃើញ
ក្រុមបាល់ទាត់ជម្រើសជាតិកម្ពុជាបានប្រកួតបង្គ្រប់កិច្ចកាលពីយប់មិញជាមួយក្រុមខ្លាំងម្ចាស់ផ្ទះវៀតណាមដោយចាញ់ ៣-០ ដែលជម្រើស១១នាក់ដំបូងរបស់កម្ពុជាត្រូវបានអ្នកគាំទ្រមួយចំនួនមិនសូវពេញចិត្តឡើយ។
ជម្រើស១១នាក់ដំបូងរបស់កម្ពុជាខុសប្លែកនឹងពេលប្រកួតឈ្នះជម្រើសជាតិឡាវកាលពីប៉ុន្មានថ្ងៃមុន។ យប់មិញនេះមិនមានវត្តមានកីឡាករសំខាន់ជួរមុខ ចាន់ វឌ្ឍនាកា ប្រាក់ មុន្នីឧត្តម និង កែវ សុខផេងឡើយដែលអ្នកទាំង៣ជាអ្នកករគ្រាប់បាល់១គ្រាប់ម្នាក់ជួយឲ្យកម្ពុជាឈ្នះឡាវ ៣-១។
អវត្តមានកីឡាករសំខាន់៣នាក់ជំនួសវិញដោយកីឡាករវ័យក្មេង ប្រាក់ ធីវ៉ា, ស៊ីន កក្កដា និង រឹង ប៊ុនហៀងជាដើមដែលជាអ្នកដែលមានបទពិសោធខ្ចីលើឆាកអន្តរជាតិ។ អ្វីដែលគួរឲ្យកត់សំគាល់ឃើញថា កម្ពុជាលេងទៅមុខមិនរួចជាមួយខ្សែការពារវៀតណាមឡើយ ដូច្នេះជារឿយកម្ពុជាលេងនៅតំបន់មុខទីរបស់ខ្លួនដែលភាគច្រើនជាប់ជើងខ្សែការពារ។ ការដាក់កីឡាករឲ្យលេងជាមួយវៀតណាមក៏មិនសូវខុសប្លែកទៅនឹងការរៀបចំក្រុមលេងទល់នឹងក្រុមម៉ាឡេស៊ីដែលកម្ពុជាចាញ់១-០នៅទឹកដីខ្លួនឯង។
ប្រការទាំងនេះបានធ្វើឲ្យអ្នកគាំទ្រមួយចំនួនមិនពេញចិត្តនឹងការរៀបចំក្រុមលេងឡើយ។ ពួកគាត់ជឿថា លើកីឡាករជួរមុខសំខាន់ដែលតែងតែបង្កើតលទ្ធផលល្អប្រសើរដល់ក្រុមជម្រើសជាតិ។ ពិតណាស់ ការរិះគន់របស់ពួកគាត់ទាំងនោះមិនខុសនោះទេ ប៉ុន្តែពួកគាត់ក៏ពិចារណាឲ្យបានវែងឆ្ងាយដែរថា ហេតុអ្វីបានជាគ្រូបង្វឹករៀបចំកីឡាករបែបនេះ?
តាមអ្នកដែលមានបទពិសោធបាល់ទាត់មួយចំនួនបានយល់ឃើញថា ការដាក់កីឡាករក្មេងលេងទល់នឹងក្រុមខ្លាំងវៀតណាមមិនមែនចេះតែដាក់នោះទេ។ ទោះជាលទ្ធផលយ៉ាងណាក៏ដោយក៏កម្ពុជានៅតែមិនអាចបន្តដំណើរទៅវគ្គពាក់កណ្តាលផ្តាច់ព្រ័ត្រដែរ។ ដូច្នេះបើទោះជាលេងដើម្បីបង្គ្រប់កិច្ច ប៉ុន្តែត្រូវលេងមើលឲ្យបានវែងឆ្ងាយទៅខាងមុខ។
ក្រុមបាល់ទាត់ជម្រើសជាតិកម្ពុជាមានភារកិច្ចសំខាន់សម្រាប់ឆ្នាំ២០១៩គឺវគ្គជម្រុះ AFC U23 ពូល H នៅទឹកដីកម្ពុជា និងក្រុមបាល់ទាត់ U22 នៅព្រឹត្តិការណ៍កីឡាស៊ីហ្គេម ប្រទេសហ្វីលីពីនជាដើម។ ពានរង្វាន់ទាំងនេះសុទ្ធតែត្រូវការកីឡាករក្រោមអាយុ២៣ឆ្នាំដើម្បីចូលរួមប្រកួត។ ក្រុម U22 ឬ U23 កម្ពុជាមិនសូវមានកម្មវិធីប្រកួតអន្តរជាតិឡើយ ដូច្នេះពួកគាត់មិនមានបទពិសោធច្រើនឡើយសម្រាប់ទល់នឹងក្រុមក្រៅប្រទេស។ ចំណុចនេះអាចជាហេតុផលមួយដែលគ្រូបង្វឹកដាក់ឲ្យពួកគាត់លេងដើម្បីទទួលបានបទពិសោធសម្រាប់ត្រៀមខ្លួនពានរង្វាន់សំខាន់ខាងមុខ។
ចំណែកកីឡាករសំខាន់ៗដូចជា ចាន់ វឌ្ឍនាកា កែវ សុខផេង និងប្រាក់ មុន្នីឧត្តមជាដើមលើសអាយុ២៣ឆ្នាំអស់ហើយ។ ពួកគាត់មិនបានលេងពេលប្រកួតសំខាន់ៗក្រោមអាយុ២៣ឆ្នាំឡើយ ប៉ុន្តែពួកគាត់លេងសម្រាប់កម្ពុជាក្រុមធំប៉ុណ្ណោះ។
កីឡាករអន្តរជាតិឆ្នើមរបស់ជប៉ុន Keisuke Honda ដែលជាអ្នកចាត់ការក្រុមជម្រើសជាតិកម្ពុជាបាននិយាយថា លោកមិនផ្ដោតសំខាន់ទៅលើលទ្ធផលឈ្នះ ឬចាញ់ឡើយ ប៉ុន្តែលោកផ្តោតលើការរីកចម្រើនរបស់ក្រុមពីមួយប្រកួតទៅមួយប្រកួត។ លោកសង្កត់ធ្ងន់ថា ការអភិវឌ្ឍបាល់ទាត់មិនមែនត្រឹមតែ១ថ្ងៃ ១សប្ដាហ៍ ២ឆ្នាំ ឬ២ឆ្នាំឡើយធ្វើទៅកើតនោះទេ ប៉ុន្តែត្រូវការពេលវេលាយូរទើបក្រុមបាល់ទាត់មួយខ្លំាងបាន។
ក្នុងព្រឹត្តិការណ៍ AFF Suzuki Cup 2018 នៅពូល A កម្ពុជាឆ្លងកាត់៤ប្រកួតគឺឈ្នះ១ និងចាញ់៣មាន៣ពិន្ទុស្ថិតនៅលេខរៀងទី៤។ ចំណែកឡាវស្ថិតនៅបាតតារាងមិនមានពិន្ទុរាប់ឡើយគឺចាញ់ទាំង៤ប្រកួត ខណៈមីយ៉ាន់ម៉ាចុកឈាមជាងគេដោយចាញ់ម៉ាឡេស៊ីធ្វើឲ្យក្រុមនេះធ្លាក់ បន្ទាប់ពីឈ្នះ២ប្រកួត ស្មើ១ប្រកួត និងចាញ់១ប្រកួតមាន៧ពិន្ទុស្ថិតនៅលេខ៣។ វៀតណាម ឈ្នះ៣ប្រកួត ស្មើ១មាន១០ស្ថិតនៅកំពូលតារាងចាប់ដៃក្រុមលេខ២ម៉ាឡេស៊ី ដែលឈ្នះ៣ ចាញ់១មាន៩ពិន្ទុឡើងទៅវគ្គពាក់កណ្ដាលផ្ដាច់ព្រ័ត្រ៕
