- 2018-11-22 00:58:41
- វិភាគ
មកដឹង ស្នៀតពិសេសបេក្ខភាពប្រជែងនឹង កែវ រំចង់ នៅ Thai Fight
- 2018-11-22 00:58:41
- ចំនួនមតិ 0 | ចំនួនចែករំលែក 0
មកដឹង ស្នៀតពិសេសបេក្ខភាពប្រជែងនឹង កែវ រំចង់ នៅ Thai Fight
ចន្លោះមិនឃើញ
អ្នកលេងរន្ទះជើង កែវ រំចង់ ត្រូវលេចមុខថ្មីនៅសង្វៀនលំដាប់កំពូលរបស់ប្រទេសថៃ Thai Fight នាថ្ងៃសៅរ៍ ទី២៤ ខែវិច្ឆិកាដែលជាលក្ខណៈប្រកួតម៉ារ៉ាតុងដណ្តើមពានរង្វាន់។
បេក្ខភាព៤នាក់ត្រូវវ៉ៃលក្ខណៈម៉ារ៉ាតុងដណ្តើមពានរង្វាន់ដែលមានប្រាក់រង្វាន់ប្រហែល៣សែនបាតគឺកីឡាករម្ចាស់ផ្ទះថៃ Sensathan ជើងខ្លាំងកម្ពុជា កែវ រំចង់ អ្នកលេងឆ្លងទ្វីប Ruslan Ataev របស់រុស្ស៊ី និង Oleksandr Moisa មកពីអ៊ុយក្រែន។ បើនិយាយពីបទពិសោធលើសង្វៀនរបស់បេក្ខភាពទាំង៤នាក់គឺសុទ្ធតែជោកជាំដូចគ្នាលើសង្វៀនអន្តរជាតិ ហើយមិនអាចមើលស្រាគ្នាបានឡើយ។ យ៉ាងណា ស្នៀតពិសេសសម្រាប់ផ្តួលដៃគូរបស់ពួកគេខុសគ្នាខ្លះ។
ជើងខ្លាំងថៃ Sensathan
កីឡាករថៃរូបនេះកំពុងក្លាយជាតារាប្រដាល់លំដាប់ជួរមុខរបស់ប្រទេស។ ដោយមានបទពិសោធលើសង្វៀនជាង១០០ដង និងឈ្នះខ្សែក្រវាត់ជាច្រើនគ្រឿងផងនោះ រូបគេពិតជាទទួលបានការគាំទ្រខ្លាំងពីអ្នកពលរដ្ឋរបស់ខ្លួន។
កម្ពស់១.៨៣ម៉ែត្រ និងកម្លាំងស៊ុហ្វល្អជាមូលដ្ឋានគ្រឹះដ៏សំខាន់ដែលផ្តល់ឲ្យរូបគេទាត់បានយ៉ាងល្អ និងកណ្តាប់ដៃច្បាស់ ហើយជង្គង់ក៏មានប្រសិទ្ធភាព និងកែងដ៏គ្រោះថ្នាក់។ អាវុធពិសេសទាំង៤នេះហើយដែលរូបគេឧស្សាហ៍ផ្តួលដៃគូ។
ជើងខ្លាំងកម្ពុជា កែវ រំចង់
អ្នកលេងគុនខ្មែរមកពីខេត្តបាត់ដំបងរូបនេះគឺអ្នកគាំទ្រកម្ពុជាបានស្គាល់ច្បាស់ហើយទាំងសមត្ថភាពវ៉ៃ និងស្ថិតិនៃការប្រកួត។ រូបគេធ្លាប់ឆ្លងកាត់សង្វៀនធំៗច្រើនទាំងនៅប្រទេសថៃ និងអឺរ៉ុប។ ប្រៀបធៀបជាមួយកីឡាករ៣នាក់ទៀត រំចង់ ចាញ់ប្រៀបកម្ពស់។
បទពិសោធជាង១៥០លើក កែវ រំចង់ ត្រូវបានអ្នកគាំទ្រមើលឃើញថា ទាត់ជើងក្រោមជាអាវុធដែលរូបគេឧស្សាហ៍ផ្តួលដៃគូឲ្យបោះបង់ចោលការប្រកួត។ ចំណែកកណ្តាប់ដៃក៏ជាផ្លែដ៏គ្រោះថ្នាក់សម្រាប់រូបគេដែរ។ បូករួមទាំងកម្លាំង និងស្មារតីមោះមុតផងនោះពិតជាធ្វើឲ្យការប្រកួតរបស់គេល្អមើល។
ជើងខ្លាំងរុស្ស៊ី Ruslan Ataev
មិនទាន់ព័ត៌មានពិតប្រាកដពីចំនួនឡើងសង្វៀនរបស់គេឡើយ ប៉ុន្តែបើផ្អែកតាមស្ថិតិដែលបង្ហាញលើវីដេអូប្រកួតគិតត្រឹមឆ្នាំ២០១៨នេះគឺប្រហែលជា៣០លើក។ ក្នុងចំណោមប្រកួតទាំងនេះ រូបគេធ្លាប់វ៉ៃនៅសង្វៀនធំៗទាំងនៅប្រទេសថៃ និងប្រទេសផ្សេងៗទៀត។ រូបគេក៏ធ្លាប់ឈ្នះកីឡាករកម្ពុជា ពុធ ឆាយរិទ្ធី។
ស្នៀតពិសេស២យ៉ាងអាចធ្វើឲ្យដៃគូខ្លាចញញើតគឺទី១កណ្តាប់ដៃដែលរូបគេធ្លាប់ផ្តួលគូជាច្រើននាក់មកហើយដោយសារមានទម្ងន់ និងច្បាស់គោលដៅ។ ទី២គឺទាត់ដែលជាអាវុធធ្ងន់របស់គេងាយធ្វើឲ្យដៃគូខ្លាចញញើតដែលមិនហ៊ានវាយសម្រុកលើរូបគេផ្ដេសផ្ដាសទេ។
វីដេអូវ៉ៃជាមួយ ពុធ ឆាយរិទ្ធី
ជើងខ្លាំងអ៊ុយក្រែន Oleksandr Moisa
កីឡាករកម្ពស់១.៨២ម៉ែត្ររូបនេះឡើងសង្វៀនប្រហែលជា៤០លើកហើយដែលភាគច្រើនទទួលបានជ័យជម្នះ។ រូបគេធ្លាប់ប្រឡូកសង្វៀនធំៗដូចជា Thai Fight និង Max Mauy Thai ជាដើម។
កីឡាករអ៊ុយក្រែនរូបនេះពូកែខ្លាំងខាងវាយកែងដែលជាអាវុធដ៏គ្រោះថ្នាក់ដល់ដៃគូប្រកួត។ ការចេញកណ្តាប់ដៃ ជង្គង់ និងទាត់គ្រាន់តែជាអាវុធបន្ទាប់បន្សំប៉ុណ្ណោះ ប៉ុន្តែការចេញកែងពិតជាធ្វើឲ្យដៃគូមិនធ្វេសប្រហែសបានឡើយ៕