- 2018-11-13 02:13:38
- បាល់ទះ
Nicholas ទាយពីអនាគតប្រដាល់ចម្រុះកម្ពុជាលើឆាកអន្តរជាតិ
- 2018-11-13 02:13:38
- ចំនួនមតិ 0 | ចំនួនចែករំលែក 0
Nicholas ទាយពីអនាគតប្រដាល់ចម្រុះកម្ពុជាលើឆាកអន្តរជាតិ
ចន្លោះមិនឃើញ
Nicholas Lee រហស្សនាម JJ" ជាកីឡាករប្រដាល់មានប្រវត្តិធ្លាប់វ៉ៃនៅសង្វៀន ONE Championship ស្ទើរគ្រប់ប្រទេសក្នុងតំបន់អាស៊ី និងមានបទពិសោធហ្វឹកហាត់ជាមួយអ្នកប្រដាល់ក្បាច់គុនចម្រុះលំដាប់ពិភពលោកខ្លាំងៗជាច្រើន។
សព្វថ្វៃគាត់មានក្លឹបហ្វឹកហាត់ដ៏ល្បីមួយនៅក្នុងទីក្រុងបាងកក ប្រទេសថៃឈ្មោះក្លឹប Yorky MMA។ឥឡូវនេះ គាត់ចង់ដាក់កម្លាំង និងពេលវេលាបន្ថែមទៀតមកក្នុងប្រទេសកម្ពុជា។ គ្រូបង្វឹកវ័យក្មេងអាយុ២៣ឆ្នាំរូបនេះកំពុងចាប់ដៃជាមួយមិត្តភ័ក្ដិជិតស្និទ្ធរបស់គាត់គឺលោកហ៊ុន ច័ន្ទរាជ ដែលជាម្ចាស់ក្លឹប Cambodian Top Team។
Nicholas បង្ហើបថា ៖«យើងទាំងពីរដូចបងប្អូនបង្កើតអញ្ចឹង ខ្ញុំបានជួបច័ន្ទរាជជាច្រើនឆ្នាំមុន។ គាត់មើលខ្ញុំតស៊ូពីបាតដៃទទេ រហូតបានជោគជ័យ។ ខ្ញុំវិញក៏មើលគាត់ពីពេលគាត់គ្មានអ្វីសោះ រហូតបានជោគជ័យដូចគ្នា។ ឥឡូវគាត់មានក្លឹបកីឡាល្បីឈ្មោះជាងគេនៅប្រទេសកម្ពុជា ហើយខ្ញុំវិញមានក្លឹបកីឡាមួយដែរល្បីល្បាញនៅបាងកក ដូច្នេះយើងក៏បានចាប់ផ្តើមធ្វើការជាមួយគ្នាតែម្តងទៅ»។
នៅពេលគ្រូក្មេងរូបនេះបានស្នាក់នៅរាជធានីភ្នំពេញកាលពីលើកមុន គាត់មានឱកាសបង្វឹកកីឡាករខ្មែរដែលមានទេពកោសខ្លាំងៗជាច្រើននាក់ ហើយក៏បានសង្កេតឃើញពីការវិវឌ្ឍខ្លាំងខាងវិស័យក្បាច់គុនរបស់កម្ពុជា។
ចាប់តាំងពីសហព័ន្ធកីឡាយុទ្ធគុនចម្រុះបានបង្កើតជាផ្លូវកាលពីពេលថ្មីៗកន្លងទៅនេះ និងមានកីឡាករឆ្នើមៗជាច្រើនបានចូលប្រកួតក្នុងស្ថាប័នក្បាច់គុនធំជាងគេនៅអាស៊ី ONE Championship ឃើញមានចលនាជាច្រើនកំពុងផុសឡើង។
Lee មានអារម្មណ៍ថា ក្បាច់គុនចម្រុះរបស់ប្រទេសកម្ពុជានាពេលខាងមុខនឹងទទួលស្គាល់កាន់តែខ្លាំងពីបណ្ដាលប្រទេសផ្សេងៗនៅតំបន់អាស៊ីអាគ្នេយ៍ និងកាន់តែល្បីល្បាញលើឆាកអន្តរជាតិដូចដែលបុព្វបុរសបានបន្សល់ទុកក្បាច់គុនដល់ពលរដ្ឋកម្ពុជាជំនាន់ក្រោយ។
គាត់ពន្យល់ថា ៖ «កាលខ្ញុំនៅក្មេង ខ្ញុំចាប់ផ្តើមចូលចិត្តរៀនប្រវត្តិសាស្ត្រកម្ពុជា និងប្រទេសក្នុងអាស៊ីដទៃទៀត។ ខ្ញុំមានអារម្មណ៍ថា ពិភពលោកមិនផ្តល់ជំនឿច្រើនមកលើតំបន់អាស៊ីអាគ្នេយ៍ទេ។ ខ្ញុំចាត់ទុកថា វាជាការប្រមាថមួយ។ យើងមានគុនខ្មែរ និងគុនមួយថៃ»។
«ប្រទេសកម្ពុជាធ្លាប់មានប្រវត្តិជូរចត់ដោយសារសង្គ្រាម ដូច្នេះអ្វីដែលយើងព្យាយាមធ្វើនាពេលនេះគឺ ព្យាយាមកសាងប្រវត្តិសាស្ត្រឡើងវិញ កែលម្អ ចាប់ផ្តើមជីវិតថ្មី និងធ្វើយ៉ាងណាឱ្យអនាគតកាន់តែប្រសើរឡើង ដូចគេនិយាយថា មនុស្សម្នាក់កាន់តែធ្លាប់លំបាក អនាគតទៅកាន់តែជោគជ័យ»។
Nicholas Lee មិនត្រឹមគិតថា កម្ពុជានឹងរីកចម្រើនប៉ុណ្ណោះទេ ប៉ុន្តែគាត់បានព្យាករថា កម្ពុជា នឹងមានជើងឯកពិភពលោកដំបូងគេបង្អស់ក្នុងឆ្នាំ២០១៩ខាងមុខនេះ។
ម្ចាស់ក្លឹបនៅបាងកកម្នាក់នេះបានហ្វឹកហាត់យ៉ាងជិតស្និទ្ធជាមួយកីឡាករ រិន សារត្ន័ ហើយជឿជាក់ថា គាត់មានទេពកោសល្យ និងលក្ខណៈគ្រប់គ្រាន់ដើម្បីឡើងប្រកួតកម្រិតសកលបាន។
ដោយមានទំនុកចិត្ត Lee និយាយថា ៖«កម្ពុជានឹងមានជើងឯកពិភពលោកជាលើកដំបូង។ អ្នកខ្លះគេថា ទៅមិនរួច តែខ្ញុំវិញមិនខ្វល់ទេ ខ្ញុំជឿជាក់ថា អាច។ ជាពិសេសខ្ញុំជឿលើ រិន (សារត្ន័)។ គាត់រៀនឆាប់ចេះណាស់ គាត់ពូកែសម្របខ្លួនបានល្អ ហើយគាត់មិនចេះក្អេងក្អាងទៀត គាត់ដូចកុំព្យូទ័រមួយអញ្ចឹង! គាត់នឹងក្លាយជាជើងឯកពិភពលោក»៕